52 బంతుల్లో 9 ఫోర్లు, 7 సిక్సర్ల సాయంతో 93 పరుగులు
ఓవైపు వికెట్లు పడుతున్నా 52 బంతుల్లో 9 ఫోర్లు, 7 సిక్సర్ల సాయంతో 93 పరుగులు చేసి జట్టుకు ఒంటిచేత్తో విజయాన్ని అందించాడు. ఈడెన్ గార్డన్స్ వేదికగా జరిగిన మ్యాచ్లో రాహుల్ త్రిపాఠి సూపర్ షోతో కోల్కతా నైట్ రైడర్స్పై రైజింగ్ పూణె సూపర్ జెయింట్స్ 4 వికెట్ల తేడాతో విజయం సాధించింది.
త్రిపాఠిపై కెప్టెన్ స్మిత్ ప్రశంసలు
మ్యాచ్ అనంతరం రాహుల్ త్రిపాఠి ప్రదర్శనతో ఉబ్బితబ్బిబైన పూణె కెప్టెన్ స్టీవ్ స్మిత్ అతడిని ప్రశంసల్లో ముంచెత్తాడు. 'రాహుల్ త్రిపాఠి అంటే ఏమిటో మాకు ఈ మ్యాచ్ తెలిసేలా చేసింది. మ్యాచ్లో రానురాను వికెట్ స్లోడౌన్ అవుతుందని మేం భావించాం. అందుకే ఆరంభ పవర్ ప్లేలోనే ఎక్కువ పరుగులు సాధించేందుకు ప్రయత్నించాం' అని స్మిత్ అన్నాడు.
సెంచరీకి త్రిపాఠి ఎంతో అర్హుడు
'త్రిపాఠి బౌలర్లను దీటుగా ఎదుర్కొన్నాడు. దురదృష్టవశాత్తు అతను సెంచరీ చేయలేదు. సెంచరీకి అతను ఎంతో అర్హుడు' అని స్టీవ్ స్మిత్ అన్నాడు. వరుసగా హ్యాట్రిక్ విజయాన్ని నమోదు చేయడంపై స్టీవ్ స్మిత్ హర్షం వ్యక్తం చేశాడు. గడిచిన ఏడు మ్యాచ్ల్లో ఆరింటిలో గెలుపొందడం ఆనందంగా ఉందని చెప్పాడు.
20 ఓవర్లకు 8 వికెట్లు కోల్పోయి 155 పరుగులు
ఈడెన్ గార్డెన్స్ వేదికగా రైజింగ్ పుణె సూపర్జెయింట్తో జరిగిన మ్యాచ్లో టాస్ ఓడి తొలుత బ్యాటింగ్ చేసిన కోల్కతా నైట్రైడర్స్ నిర్ణీత 20 ఓవర్లకు 8 వికెట్లు కోల్పోయి 155 పరుగులు చేసింది. అనంతరం 156 పరుగుల విజయ లక్ష్యంతో బరిలోకి దిగిన పూణె 19.2 ఓవర్లలో 6 వికెట్లు కోల్పోయి 158 పరుగులు చేసింది. రాహుల్ త్రిపాఠి 52 బంతుల్లో 9 ఫోర్లు 7 సిక్సర్ల సాయంతో 93 పరుగులతో రాణించాడు.