తప్పలేదు.. అందుకే ముందుకొచ్చా; అశ్విన్

పర్‌ఫెక్ట్‌ టీమ్‌ కాదన్న సంగతి మాకు తెలుసు:

మేము పర్‌ఫెక్ట్‌ టీమ్‌ కాదన్న సంగతి మాకు తెలుసు. ప్రయోగాలు చేయకతప్పడంలేదు. వికెట్‌ టఫ్‌గా ఉంది. పోనుపోను బ్యాటింగ్‌కు అనుకూలిస్తుంది. కాబట్టి పవర్‌ ప్లేలో ప్రత్యర్థిని అటాక్‌ చేద్దామనుకున్నాం. అందుకే నేను 3వ స్థానంలో బ్యాటింగ్‌కు దిగాను. వాస్తవానికి మేం బౌలింగ్‌, ఫీల్డింగ్‌ సరిగా చెయ్యలేదు.

ఫలితం మరోలా ఉండేది:

కీలకమైన క్యాచ్‌లు పట్టిఉంటే రాజస్తాన్‌ స్కోరు ఓ 20 పరుగులు తగ్గిఉండేది. అప్పుడు ఫలితం మరోలా ఉండేది. ప్రయోగాలు చేసేటప్పుడు ఇలాంటి ఓటములు సర్వసాధారణమైన విషయాలే. ఈ ఓటమి ఈ రోజుకు మాత్రమే పరిమితం. మున్ముందు కూడా ప్రయోగాలు చేస్తాం. తప్పకుండా గెలిచి తీరతాం.

సోషల్‌ మీడియాలో విమర్శలు:

అశ్విన్‌ మూడో స్థానంలో బ్యాటింగ్‌కు దిగడంపై సోషల్‌ మీడియాలో విమర్శలు వస్తున్నాయి. ‘పిచ్‌ హిట్టర్‌ కాకపోయినా ఫస్ట్‌డౌన్‌లో ఎందుకొచ్చావ్‌?' తరహా ప్రశ్నలు వినిపిస్తున్నాయి. మూడోస్థానంలో వచ్చి రెండు బంతులు ఆడిన అశ్విన్‌.. గౌతం బౌలింగ్‌లో డకౌట్‌గా వెనుదిరిగిన సంగతి తెలిసిందే.

గణాకాంలూ ఏమంత గొప్పగా లేవు:

అటు ఐపీఎల్‌లో అశ్విన్‌ బ్యాటింగ్‌ గణాకాంలూ ఏమంత గొప్పగాలేవు. ఇప్పటివరకు 121 ఐపీఎల్‌ మ్యాచ్‌లు ఆడిన అశ్విన్‌.. 100.34 స్ట్రైక్‌ రేట్‌తో కేవలం 288 పరుగులు మాత్రమే చేశాడు. ఓవరాల్‌గా 206 టీ20ల్లో 542 రన్స్‌ మాత్రమే సాధించాడు. 10 మ్యాచ్‌ల్లో 6 విజయాలు సాధించి 12 పాయింట్లతో మూడో స్థానంలో కొనసాగుతున్న కింగ్స్‌ పంజాబ్‌.. తన తర్వాతి మ్యాచ్‌ మే 12న కోల్‌కతాతో ఆడనుంది.