ఎట్టకేలకు యువీకి ఓ విజయం, కింగ్స్ ఎలెవన్ పంజాబ్‌ ఓటమి

మొహాలీ: పూణే వారియర్స్ కెప్టెన్ యువరాజ్ సింగ్‌కు ఎట్టకేలకు ఓ విజయం లభించింది. టోర్నీ ఆరంభంలో తొలి రెండు మ్యాచ్‌ల్లో నెగ్గిన యువరాజ్‌ సేన ఎట్టకేలకు పరాజయపరంపర నుంచి బయటపడింది. వరుసగా ఏడు ఓటముల అనంతరం గెలుపు రుచి చూసింది. ఆదివారం జరిగిన మ్యాచ్‌లో 5 వికెట్ల తేడాతో కింగ్స్‌ ఎలెవన్‌ పంజాబ్‌ను ఓడించింది. 'మ్యాన్‌ ఆఫ్‌ ద మ్యాచ్‌' రాహుల్‌శర్మ (2/17), భువనేశ్వర్‌ కుమార్‌ (2/14) విజృంభించడంతో మొదట పంజాబ్‌ను 119 (8 వికెట్లకు) పరుగులకే కట్టడి చేసిన పుణె లక్ష్యాన్ని మరో 17 బంతులు మిగిలి ఉండగానే 5 వికెట్లు కోల్పోయి ఛేదించింది. ఫిట్‌నెస్‌ లేకపోవడంతో గంగూలీ ఈ మ్యాచ్‌లో కూడా ఆడలేదు. ఈ మ్యాచ్‌లో గెలిచినా పుణెకు పెద్దగా లాభం లేదు. అద్భుతాలు జరిగితే తప్ప ఆ జట్టు సెమీస్‌కు వెళ్లలేదు.

పుణె లక్ష్యఛేదనలో మనీష్‌ పాండే (28), ఉతప్ప (22) రాణించారు. పాండే మూడో వికెట్‌ రూపంలో నిష్క్రమించాక పంజాబ్‌ కాస్త ఒత్తిడి తెచ్చే ప్రయత్నం చేసింది. కానీ యువరాజ్‌ (35; 15 బంతుల్లో 5X4, 2X6) రెచ్చిపోవడంతో పుణె లక్ష్యం త్వరగా పూర్తయింది. భార్గవ్‌ బట్‌ వేసిన 15వ ఓవర్లో యువరాజ్‌ వరుసగా 6, 4, 6, 4 బాదాడు.

పుణె బౌలర్లు కట్టుదిట్టంగా బౌలింగ్‌ చేయడంతో అంతకుముందు టాస్‌ గెలిచి బ్యాటింగ్‌ ఎంచుకున్న పంజాబ్‌ స్వల్ప స్కోరుకు పరిమితమైంది. రాహుల్‌శర్మ మరోసారి అద్భుతంగా బౌలింగ్‌ చేశాడు. అతనితోపాటు భువనేశ్వర్‌ పంజాబ్‌ను దెబ్బతీశాడు. పార్నెల్‌ (2/12), మిషెల్‌ మార్ష్‌ (2/26) కూడా రాణించారు. గిల్‌క్రిస్ట్‌ (3), వాల్తాటి (23) ఔటైనా దినేశ్‌ కార్తీక్‌ (30; 27 బంతుల్లో 3X4), షాన్‌ మార్ష్‌ (32; 28 బంతుల్లో 3X4, 1X6) రాణించడంతో పంజాబ్‌ 12 ఓవర్లు ముగిసేసరికి 79/2తో మెరుగ్గానే కనిపించింది. ఐతే చివరి 8 ఓవర్లలో 40 పరుగులు మాత్రమే చేసి 6 వికెట్లు చేజార్చుకుంది.