నా ఫేవరెట్ ప్లేయర్ దొరికేశాడు: ప్యాట్ కమిన్స్

ఐపీఎల్ 2026 సీజన్లో యువ సెన్సేషన్ వైభవ్ సూర్యవంశీ తన బ్యాటింగ్‌తో ప్రకంపనలు సృష్టిస్తున్నాడు. శనివారం(ఏప్రిల్ 25) జైపూర్‌లోని సవాయ్ మాన్‌సింగ్ స్టేడియంలో రాజస్థాన్ రాయల్స్, సన్‌రైజర్స్ హైదరాబాద్ జట్ల మధ్య జరిగిన మ్యాచ్‌లో ఈ 15 ఏళ్ల కుర్రాడు ఆకాశమే హద్దుగా చెలరేగిపోయాడు. కేవలం 36 బంతుల్లోనే ఐపీఎల్ కెరీర్లో తన రెండో సెంచరీని పూర్తి చేసుకుని అందరినీ ఆశ్చర్యపరిచాడు. ఈ అద్భుత ఇన్నింగ్స్‌లో వైభవ్ సూర్యవంశీ 103 పరుగులు చేసి తన ఖాతాలో 12 సిక్సర్లు, 5 ఫోర్లను వేసుకున్నాడు.

వైభవ్ నా ఫేవరెట్ ప్లేయర్: కమిన్స్
వైభవ్ విధ్వంసకర ఇన్నింగ్స్‌పై సన్‌రైజర్స్ హైదరాబాద్ జట్టు కెప్టెన్, ఆస్ట్రేలియా దిగ్గజం ప్యాట్ కమిన్స్ ప్రశంసల వర్షం కురిపించాడు. మ్యాచ్ అనంతరం జరిగిన ప్రెస్ కాన్ఫరెన్స్‌లో ప్యాట్ కమిన్స్ మాట్లాడుతూ.. "వైభవ్ సూర్యవంశీ ఇప్పుడు నా కొత్త ఫేవరెట్ ఆటగాడు" అని పేర్కొన్నాడు. తన జట్టు బౌలర్లపై వైభవ్ సూర్యవంశీ విరుచుకుపడిన తీరును చూసి ప్యాట్ కమిన్స్ ముగ్ధుడయ్యాడు. కేవలం 15 ఏళ్ల వయసులోనే ఇంతటి పరిణతితో, వేగంగా రన్స్ సాధించడం విశేషమని కమిన్స్ కొనియాడాడు.

మ్యాచ్ పరిస్థితి ఇలా..
ఈ మ్యాచ్‌లో ముందుగా బ్యాటింగ్ చేసిన రాజస్థాన్ రాయల్స్.. వైభవ్ సూర్యవంశీ(103), ధ్రువ్ జురేల్(51) అద్భుత భాగస్వామ్యంతో నిర్ణీత 20 ఓవర్లలో 6 వికెట్ల నష్టానికి 228 పరుగుల భారీ స్కోరు సాధించింది. వైభవ్ సాధించిన ఈ సెంచరీ ఐపీఎల్ చరిత్రలోనే మూడో అత్యంత వేగవంతమైన సెంచరీగా రికార్డు సృష్టించింది. బీహార్‌కు చెందిన ఈ యువ ఆటగాడు వరుసగా భారీ స్కోర్లు సాధిస్తూ లీగ్‌లో టాక్ ఆఫ్ ది టౌన్‌గా నిలిచాడు.

అయితే రాజస్థాన్ రాయల్స్ నిర్దేశించిన భారీ లక్ష్యాన్ని సన్‌రైజర్స్ హైదరాబాద్ జట్టు సమర్థవంతంగా ఛేధించింది. రాజస్థాన్ ఫీల్డింగ్ తప్పిదాలను ఆసరాగా చేసుకున్న సన్‌రైజర్స్ బ్యాటర్లు 18.3 ఓవర్లలోనే 5 వికెట్లు కోల్పోయి 229 పరుగులు చేసి విజయాన్ని అందుకున్నారు. ఈ గెలుపుతో సన్‌రైజర్స్ హైదరాబాద్ జట్టు పాయింట్ల పట్టికలో మూడో స్థానానికి చేరుకుంది. ఓటమి పాలైనప్పటికీ.. వైభవ్ సూర్యవంశీ పోరాటం మాత్రం క్రికెట్ అభిమానుల గుండెల్లో నిలిచిపోయింది.