16వ టైటిల్: ప్రపంచ బిలియర్డ్స్‌ ఛాంపియన్ అద్వానీ

హైదరాబాద్: ఐబీఎస్ఎఫ్‌ వరల్డ్‌ బిలియర్డ్స్‌ చాంపియన్‌షిప్‌లో భారత స్టార్‌ క్యూయిస్ట్‌ పంకజ్‌ అద్వానీ తన అద్భుత ప్రదర్శనతో టైటిల్‌ కైవసం చేసుకున్నాడు. (బిలియర్డ్స్, స్నూకర్‌)లో పంకజ్‌కు ఇది 16వ టైటిల్ కావడం విశేషం. ఈ టోర్నీ ఆరంభం నుంచే పంకజ్ అత్యుత్తమ ప్రదర్శనను కనబరుస్తోన్న సంగతి తెలిసిందే.

సోమవారం జరిగిన ప్రపంచ బిలియర్డ్స్‌ 150 అప్‌ ఫార్మాట్‌ ఫైనల్లో 31 ఏళ్ల పంకజ్‌ 6-3తో పీటర్‌ గిల్‌క్రిస్ట్‌ (సింగపూర్‌)పై విజయం సాధించాడు. 150-33, 150-95, 124-150, 101-150, 150-50, 150-35, 86-150, 150-104, 150-15 ఫ్రేమ్‌ల తేడాతో పీటర్‌ గిల్‌క్రిస్ట్‌ (సింగపూర్‌)ను ఓడించాడు.

ఇది పంకజ్‌కు 11వ ప్రపంచ బిలియర్డ్స్‌ టైటిల్‌. ఆరంభంలో పంకజ్‌కు గట్టిపోటీ ఇచ్చిన గిల్‌క్రిస్ట్‌ ఆ తర్వాత ఎంత మాత్రం ధాటిగా ఆడలేకపోయాడు. వరుస పాయింట్లతో ఆధిపత్యం ప్రదర్శించిన ఆద్వానీ అద్భుత ప్రదర్శనతో టైటిల్‌ను సొంతం చేసుకున్నాడు.

అంతకుముందు జరిగిన సెమీ్‌స్‌లో పంకజ్‌ 5-0తో ఆంగ్‌ హతయ్‌ (మయన్మార్‌) చిత్తుగా ఓడించాడు. గతంలో పంకజ్‌ బిలియర్డ్స్‌ టైమ్‌ ఫార్మాట్‌లో ఏడుసార్లు, పాయింట్స్‌ ఫార్మాట్‌లో మూడుసార్లు, టీమ్‌ ఫార్మాట్‌లో ఒకసారి, స్నూకర్‌లో రెండుసార్లు, సిక్స్‌ రెడ్‌ స్నూకర్‌లో రెండుసార్లు ప్రపంచ చాంపియన్ గా నిలిచాడు.