పాకిస్తాన్ సరికొత్త డ్రామా!

ఆసియా కప్ 2025 సూపర్-4 మ్యాచ్‌లో భారత జట్టు మరోసారి పాకిస్తాన్ జట్టుపై 6 వికెట్ల తేడాతో సునాయాసంగా విజయం సాధించింది. అయితే వారి ఓటమి తర్వాత కూడా పాకిస్తాన్ జట్టు, వారి మేనేజ్మెంట్ డ్రామాలు ఆగడం లేదు. పాకిస్తాన్ క్రికెట్ బోర్డు(పీసీబీ) మీడియా సంభాషణలలో భారతీయ మీడియా ప్రతినిధుల పట్ల పక్షపాత వైఖరిని ప్రదర్శిస్తూ తీవ్ర విమర్శలు ఎదుర్కొంటోంది.

భారతీయ జర్నలిస్టులను తప్పించుకుంటున్న పాక్ మీడియా మేనేజర్
ఆసియా కప్ టోర్నమెంట్‌లో పాక్ మీడియా మేనేజర్ నయీమ్ గిలానీ భారతీయ జర్నలిస్టుల ప్రశ్నలను తప్పించుకోవడం ఇది రెండోసారి. భారత్‌తో ఓటమి తర్వాత జరిగిన పోస్ట్-మ్యాచ్ ప్రెస్ కాన్ఫరెన్స్‌లో ఈ సంఘటన జరిగింది. అంతేకాకుండా, పాకిస్తాన్ ఈ టోర్నమెంట్‌లో ఇప్పటివరకు రెండు ప్రీ-మ్యాచ్ ప్రెస్ కాన్ఫరెన్స్‌లను తప్పించుకుంది. ఒకటి యూఏఈతో మ్యాచ్‌కు ముందు, రెండోది భారత్‌తో సూపర్ 4 మ్యాచ్‌కు ముందు కావడం గమనార్హం. ఈ పక్షపాత వైఖరి రెండు దేశాల మీడియా మధ్య వృత్తిపరమైన సంబంధాలను దెబ్బతీస్తోంది.

గిలానీపై ఇతర ఆరోపణలు
పాక్ మీడియా మేనేజర్ గిలానీ ఇప్పటికే ఐసీసీ పరిశీలనలో ఉన్నాడు. అతను పాక్ కెప్టెన్, కోచ్‌ల సమావేశాన్ని మ్యాచ్ రిఫరీ ఆండీ పైక్రాఫ్ట్‌తో కలిసి రిఫరీ రూమ్‌లో రహస్యంగా చిత్రీకరించాడనే ఆరోపణలు ఉన్నాయి. ఇది ఆటగాళ్లు, మ్యాచ్ అఫీషియల్స్ ఏరియా (PMOA) నియమాలను స్పష్టంగా ఉల్లంఘించడమే.

భారత మీడియా మేనేజ్మెంట్ విభిన్న విధానం
దీనికి భిన్నంగా భారత మీడియా మేనేజర్ మౌలిన్ పారేఖ్ పాకిస్తాన్ జర్నలిస్టులకు ప్రశ్నలు అడగడానికి అవకాశం కల్పించి ఒక నిష్పాక్షికమైన విధానాన్ని ప్రదర్శించాడు. గత వారం జరిగిన పోస్ట్-మ్యాచ్ ప్రెస్ కాన్ఫరెన్స్‌లో భారత కెప్టెన్ స్వయంగా మేనేజర్‌కు పాకిస్తాన్ మీడియాను "వారు ఏమి కావాలనుకుంటే అది అడగనివ్వండి" అని చెప్పి పారదర్శకతకు ఉదాహరణగా నిలిచాడు.

వెన్యూ మేనేజర్ విచిత్రమైన వివరణ
మ్యాచ్‌లకు ముందు ప్రెస్ కాన్ఫరెన్స్‌లను ఎందుకు తప్పించుకుంటున్నారు అని దుబాయ్ ఇంటర్నేషనల్ క్రికెట్ స్టేడియం వెన్యూ మీడియా మేనేజర్ ఎమ్మద్ హమ్మద్‌ను ప్రశ్నించగా.. అతను స్పష్టమైన సమాధానం ఇవ్వడంలో విఫలమయ్యాడు. అతను ఆ ప్రశ్నలను పాకిస్తాన్ మీడియా మేనేజర్‌కు మళ్లించాడు. ఆసక్తికరమైన విషయం ఏంటంటే.. హమ్మద్ స్వయంగా పాకిస్తాన్‌లో జన్మించిన వ్యక్తి, గతంలో పాకిస్తాన్ క్రికెట్ బోర్డు కమ్యూనికేషన్స్ టీమ్‌లో పనిచేశాడు. ఇది అతని పాత్రలో నిష్పాక్షికతపై మరిన్ని ప్రశ్నలను లేవనెత్తుతుంది.

మేము త్వరలో మాట్లాడుతాం: మొహ్సిన్ నఖ్వీ
భారత్-పాకిస్తాన్ మ్యాచ్‌కు ముందు ఐసీసీ అకాడమీ వద్ద పీసీబీ చీఫ్ మొహ్సిన్ నఖ్వీని పాకిస్తాన్ ఎందుకు ప్రెస్ కాన్ఫరెన్సులు నిర్వహించడం లేదని అడగగా.. అతను చాలా సంక్షిప్తంగా సమాధాని ఇచ్చాడు. మేము త్వరలో మాట్లాడుతామంటూ నఖ్వీ అక్కడి నుంచి వెళ్లిపోయారు.