స్పిన్నర్ల మ్యాజిక్.. 127 పరుగుల తేడాతో పాకిస్థాన్ ఘన విజయం

వెస్టిండీస్‌తో జరిగిన తొలి టెస్ట్‌ మ్యాచ్‌లో పాకిస్థాన్ 127 పరుగుల భారీ తేడాతో విజయం సాధించింది. ఈ మ్యాచ్‌లో పాకిస్థాన్ నిర్దేశించిన 251 పరుగుల లక్ష్యాన్ని ఛేదించలేక విండీస్‌ జట్టు చేతులెత్తేసింది. పాక్‌ స్పిన్నర్లు సాజిద్‌ ఖాన్‌ 5, అబ్రార్‌ అహ్మద్‌ 4 చెలరేగడంతో సెకెండ్‌ ఇన్నింగ్స్‌లో వెస్టిండీస్ జట్టు 123 పరుగులకే ఆలౌట్ అయింది.

తమ జట్టు వెస్టిండీస్ ను గెలిపించుకునేందుకు అలిక్‌ అథనాజ్‌ (55) ప్రయత్నించినా ఫలితం దక్కలేదు. టెవిన్‌ ఇమ్లాచ్‌ (14), మికైల్‌ లూయిస్‌ (13), క్రెయిగ్‌ బ్రాత్‌వైట్‌ (12), కెవిన్‌ సింక్లెయిర్‌ (10) నామమాత్రపు స్కోర్లు చేసారు. జస్టిన్‌ గ్రీవ్స్‌ 9, కీసీ కార్తీ 6, కవెమ్‌ హాడ్జ్‌, మోటీ, వార్రికన్‌ విఫలమయ్యారు.

వార్రికన్‌ @7
వెస్టిండీస్ లెఫ్ట్‌ ఆర్మ్‌ స్పిన్నర్ జోమెల్‌ వార్రికన్‌ 7 వికెట్లు పడగొట్టి రెండో ఇన్నింగ్స్‌లో పాకిస్థాన్ ను గట్టిగా దెబ్బ కొట్టాడు. దీంతో పాక్ జట్టు 157 పరుగులకే కుప్పకూలింది. పాక్‌ ఇన్నింగ్స్‌లో షాన్‌ మసూద్‌ (52) మినహా.. మహ్మద్ హురైరా 29, కమ్రాన్‌ గులామ్‌ 27, సల్మాన్‌ అఘా 14, నౌమన్‌ అలీ 9, సాజిద్‌ ఖాన్‌ 5, బాబర్‌ ఆజమ్‌ 5, సౌద్‌ షకీల్‌ 2, మహ్మద్‌ రిజ్వాన్‌ 2, అంతా విఫలమయ్యారు.

పాక్‌ స్పిన్నర్ల మ్యాజిక్
అంతకుముందు విండీస్ తొలి ఇన్నింగ్స్‌లో 137 పరుగులకే ఆలౌట్ అయింది. నౌమన్‌ అలీ 5, సాజిద్‌ ఖాన్‌ 4, అబ్రార్‌ అహ్మద్‌ 1 వికెట్లు తీయడంతో విండీస్‌ బ్యాటర్లు రాణించలేకపోయారు. వెస్టిండీస్ ఇన్నింగ్స్‌లో వార్రికన్‌ (31 నాటౌట్‌), జేడన్‌ సీల్స్‌ (22) మాత్రమే నామమాత్రంగా ఆడారు. మిగతా అందరూ చేతులెత్తేశారు.

పాకిస్థాన్ తొలి ఇన్నింగ్స్‌లో 230 పరుగులకు ఆలౌట్ అయింది. సౌద్‌ షకీల్‌ (84), మహ్మద్‌ రిజ్వాన్‌ (71) హాఫ్ సెంచరీలతో మెరిశారు. మిగతా వారిలో సాజిద్‌ ఖాన్‌ 18, షాన్‌ మసూద్‌ 11 కనీస పరుగులు చేశారు. విండీస్‌ బౌలర్లలో వార్రికన్‌, జేడన్‌ సీల్స్‌ తలో మూడు వికెట్లు తీశారు. కెవిన్‌ సింక్లెయిర్‌ 2, మోటీ ఓ వికెట్‌ పడగొట్టారు.

ఈ విజయంతో రెండు మ్యాచ్‌ల సిరీస్‌లో పాక్‌ 1-0 ఆధిక్యంలోకి వెళ్లింది. రెండో టెస్ట్‌ జనవరి 25న ప్రారంభం కానుంది.