Click it and Unblock the Notifications
గతంలో కంటే భిన్నంగా:
పాకిస్థాన్ ఎవరూ ఊహించని విధంగా టీ20 ప్రపంచకప్ 2021లో అదిరే ప్రదర్శన చేసింది. ప్రస్తుత టోర్నమెంట్లో ఓటమి చవిచూడని ఏకైక జట్టు పాకిస్థానే. పటిష్ట జట్లను ఓడించి సెమీస్ చేరింది. ఇక్కడ కూడా అదే ఫామ్ కొనసాగించాలని చూస్తోంది. యూఏఈలో పాకిస్థాన్ వరుసగా 16 మ్యాచ్లు గెలిచింది. గతంలో కంటే భిన్నంగా కనిపిస్తోన్న పాకిస్థాన్ ఒత్తిడికి తలవంచకుండా సాగుతోంది. యూఏఈలో చాలా సౌకర్యంగా కనపడుతోంది. అక్కడ అనేక పీఎస్ఎల్ మ్యాచ్లు ఆడడం, సొంతగడ్డపై ఆడాల్సిన అనేక సిరీస్లకు అక్కడ ఆతిథ్యమివ్వడమే అందుకు కారణం. మెగా టోర్నీ తొలి మ్యాచ్లో చిరకాల ప్రత్యర్థి భారత్పై విజయం సాధించాక పాకిస్థాన్.. దుర్భేద్యంగా మారిపోయింది. అన్ని విభాగాల్లో సత్తాచాటుతూ దూసుకుపోతోంది.
రిజ్వాన్, మాలిక్ డౌటే:
అయితే కీలక సెమీస్ మ్యాచుకు ముందు పాక్ జట్టుకు భారీ షాక్ తగిలేలా ఉంది. స్టార్ ఓపెనర్ మొహ్మద్ రిజ్వాన్, సీనియర్ ప్లేయర్ షోయబ్ మాలిక్ స్వల్పంగా ఫ్లూ లక్షణాలతో బాధపడుతున్నారు. దాంతో బుధవారం ఇద్దరూ ట్రైనింగ్ సెషన్కు హాజరుకాలేదు. అయితే ఇద్దరికీ కోవిడ్ పరీక్షలు చేయగా.. వాళ్లు నెగటివ్ తేలారు. టోర్నమెంట్ జరుగుతున్న సమయంలో ఐసీసీ నియమావళి ప్రకారం కూడా ఆటగాళ్లకు కోవిడ్ టెస్టులు చేస్తున్నారు. ఈరోజు వారిని వైద్య బృదం మరోసారి పరీక్షించనుంది. ఆస్ట్రేలియాపై వారు ఆడడం డౌటే అని తెలుస్తోంది. అయితే కీలక మ్యాచ్ కాబట్టి పాక్ కెప్టెన్ బాబర్ ఆజామ్ వారిని పక్కనపెట్టే సాహసం చేయకపోవచ్చు. ముఖ్యంగా రిజ్వాన్ను. ఎందుకంటే.. అతడు మంచి ఫామ్లో ఉన్నాడు.
పటిష్టంగా పాక్:
బాబర్ అజామ్ నేతృత్వంలోని ఆ జట్టు టాప్ ఆర్డర్ బలంగా ఉంది. బాబర్ 264 పరుగులతో టోర్నీ టాప్ స్కోరర్గా ఉన్నాడు. ఓపెనర్లు బాబర్, మొహ్మద్ రిజ్వాన్ మంచి ఆరంభాలు ఇస్తున్నారు. ఒకవేళ రిజ్వాన్ ఆడకుంటే.. అతడి స్థానంలో హైదర్ అలీ జట్టులోకి వచ్చే అవకాశం ఉంది. ఫకర్ జామన్, అసిఫ్ అలీ, షోయబ్ మాలిక్, మొహ్మద్ హఫీజ్ రూపంలో పాక్కు మిడిల్ ఆర్డర్లో మ్యాచ్ విన్నర్లున్నారు. గాయపడిన మాలిక్ స్థానంలో సర్ఫరాజ్ అహ్మద్ ఆడే అవకాశాలు ఉన్నాయి. ఇక పాకిస్థాన్ బౌలింగ్ కూడా టోర్నీ ఆరంభం నుంచి ఆకట్టుకుంటోంది. పేసర్లు షహీన్ షా అఫ్రిది, రవూఫ్ ప్రత్యర్థి బ్యాట్స్మెన్కు సమస్యలు సృష్టిస్తున్నారు. ఇక స్పిన్నర్లు ఇమాద్ వసీమ్, మహ్మద్ హఫీజ్, షాద్బ్ ఖాన్లు ప్రధాన అస్త్రాలుగా మారారు. వీరిని ఎదుర్కోవడం ఆస్ట్రేలియాకు కష్టమనే చెప్పాలి.
పాకిస్తాన్ తుది జట్టు (అంచనా):
బాబర్ ఆజామ్, మొహ్మద్ రిజ్వాన్/హైదర్ అలీ, ఫకర్ జామన్, షోయబ్ మాలిక్/సర్ఫరాజ్ అహ్మద్, మొహ్మద్ హఫీజ్, అసిఫ్ అలీ, ఇమాద్ వసీమ్, షాద్బ్ ఖాన్, షహీన్ షా అఫ్రిది, హారిస్ రవూఫ్.
Continue with Google