అభిషేక్‌ను 6 బంతుల్లోపే ఔట్ చేస్తా: పాక్ పేసర్ 'ఓవర్ కాన్ఫిడెన్స్'!

ఆసియా కప్ 2025లో భారత్ ఆధిపత్యం తర్వాత పాకిస్తాన్ పేసర్ ఇహ్సానుల్లో భారత బ్యాటింగ్ సంచలనం అభిషేక్ శర్మకు ధైర్యంగా సవాల్ విసిరాడు. తన వేగవంతమైన బౌలింగ్ అభిషేక్ శర్మను కచ్చితంగా ఇబ్బంది పెడుతుందని ఇహ్సానుల్లా భావిస్తున్నాడు. పంజాబ్‌కు చెందిన 25 ఏళ్ల ఈ బ్యాటర్ ఆసియా కప్‌లో 7 మ్యాచ్‌ల్లో దాదాపు 200 స్ట్రైక్ రేట్‌తో 314 పరుగులు చేసి.. భారత్ ఆసియా కప్ టైటిల్‌ను గెలవడంలో కీలక పాత్ర పోషించాడు. అయినప్పటికీ.. 2023 పాకిస్తాన్ సూపర్ లీగ్‌లో 152.65కేఎంపీహెచ్ వేగంతో బౌలింగ్ చేసిన ఇహ్సానుల్లా ప్రపంచ నంబర్ వన్ బ్యాటర్‌ను ఇబ్బంది పెట్టగలనని నమ్మకంగా ఉన్నాడు.

ఒకవేళ తనకు భారత్‌తో ఆడే అవకాశం వస్తే.. 3 నుంచి 6 బంతుల్లో అభిషేక్ శర్మను ఔట్ చేస్తానని ఇహ్సానుల్లో ఓ వైరల్ వీడియోలో ప్రకటించి క్రికెట్ అభిమానులలో చర్చకు దారితీశాడు. గాయం కారణంగా వైదొలగకముందు పాకిస్తాన్ తరఫున ఓ టీ20, ఓ వన్డే ఆడిన ఈ ఫాస్ట్ బౌలర్ ఆ వీడియోలో.. "నా 140 కేఎంపీహెచ్ బౌలింగ్ అతడికి 160 కేఎంపీహెచ్ లా అనిపిస్తుంది. వాటిని అతను అంచనా వేయలేడు" అని ఇహ్సానుల్లా ప్రకటించడం గమనార్హం. "నేను ఎడమచేతి వాటం బ్యాటర్లకు ఇన్‌స్వింగర్లు వేస్తాను, అలాంటి బంతులకు అతను ఇబ్బంది పడ్డాడు. అందుకే నేను ఇలా చెబుతున్నాను. నేను నా బౌన్సర్లతో ఎడమచేతి వాటం బ్యాటర్ల కుడి భుజాన్ని లక్ష్యంగా చేసుకుంటాను. నా బౌన్సర్‌లు చాలా ప్రభావవంతంగా ఉంటాయి" అని ఇహ్సానుల్లా వివరించాడు.

అభిషేక్ శర్మ మెరుపు ఫామ్: లారా ప్రశంసలు
ఇహ్సానుల్లా ధైర్యవంతమైన ప్రకటనలు చేసినప్పటికీ.. అభిషేక్ శర్మ తన కెరీర్‌లో అద్భుతంగా దూసుకుపోతున్నాడు. సన్‌రైజర్స్ హైదరాబాద్ స్టార్ అయిన అభిషేక్ శర్మ..ఆసియా కప్‌లో మూడు అర్థ శతకాలు నమోదు చేయడమే కాకుండా మొత్తం 12 టీ20 అంతర్జాతీయ మ్యాచ్‌లలో 49.41 సగటుతో, 208.80 స్ట్రైక్ రేట్‌తో 593 పరుగులు చేసి నిలకడగా రాణించాడు. అతని ఈ ఫామ్ క్రికెట్ దిగ్గజాల ప్రశంసలను అందుకుంది.

ఐపీఎల్‌లో అభిషేక్‌తో కలిసి బ్యాటింగ్ కోచ్‌గా పనిచేసిన వెస్టిండీస్ దిగ్గజం బ్రయాన్ లారా మాట్లాడుతూ.. "అభిషేక్ అద్భుతమైన యువ ఆటగాడు... చాలా ప్రత్యేకమైనది అతనిలో ఉంది. యువరాజ్ సింగ్ అతనిపై పెద్ద ప్రభావం చూపాడు, అతని బ్యాట్ వేగం, అతను బంతిని కొట్టే విధానం అద్భుతం. టీ20 క్రికెట్‌లో 50 ఓవర్ల ఫార్మాట్‌లో విజయం సాధిస్తున్నప్పటికీ, అతను ఇంకా టెస్ట్ జట్టులోకి రావాలని కోరుకుంటున్నాడు, ఇది గొప్ప విషయం. అతను మెరుగుపడటం, కొత్త స్థాయికి చేరుకోవడం చూడటం చాలా సంతోషంగా ఉంది" అని కొనియాడారు.

అక్టోబర్ 29 నుంచి ఆస్ట్రేలియాలో ప్రారంభం కానున్న ఐదు మ్యాచ్‌ల టీ20I సిరీస్‌కు భారత్ సన్నద్ధమవుతున్న తరుణంలో, భారత కొత్త బ్యాటింగ్ సంచలనంపై అందరి దృష్టి నెలకొంది.