IND vs PAK: కోహ్లీని ఔట్ చేసేందుకు ఆయుధం ఉంది.. పాకిస్థాన్ ప్లాన్ లీక్!

IND vs PAK: భారత్, పాక్ మధ్య ఛాంపియన్స్ ట్రోఫీ మ్యాచ్ ఆదివారం దుబాయ్ లో జరగనుంది. ఈ మ్యాచ్ లో అందరి కళ్లు మరోసారి విరాట్ కోహ్లీపైనే ఉంటాయి. ఎందుకంటే విరాట్ కోహ్లీ పాకిస్థాన్ అంటే చాలు తన బ్యాట్ కు చక్కగా పని చెప్తాడు. చాలా ఏళ్లుగా పాక్ జట్టును విరాట్ ఇబ్బంది పెడుతున్నాడు. కానీ పాకిస్థాన్ జట్టులో విరాట్ కోహ్లీ అనే అస్త్రానికి ప్రతిగా సంధించే మరో అస్త్రం ఉన్నట్లుగా తెలుస్తోంది.

ఆ బౌలర్ వల్ల ప్రమాదంలో విరాట్..
టెస్ట్ క్రికెట్ లో ఆఫ్ స్టంప్ వెలుపల బంతులతో విరాట్ కోహ్లీ ఇబ్బంది పడుతున్నప్పటికీ.. వన్డే ఫార్మాట్ లో లెగ్ స్పిన్నర్లు కొంతకాలంగా విరాట్ ను చాలా ఇబ్బంది పెడుతున్నారు. ఇంగ్లాండ్ తో జరిగిన వన్డే సిరీస్ లోని రెండు మ్యాచ్ లలో కోహ్లీని ఆదిల్ రషీద్ ఔట్ చేశాడు. ఛాంపియన్స్ ట్రోఫీ తొలి మ్యాచ్ లో బంగ్లాదేశ్ లెగ్ స్పిన్నర్ రిషాద్ హుస్సేన్ బంతికి విరాట్ ఔటయ్యాడు.

2024 నుంచి ఇప్పటివరకు విరాట్ కోహ్లీ లెగ్ స్పిన్నర్లపై 5 వన్డే ఇన్నింగ్స్ లలో 5 సార్లు ఔటయ్యాడు. లెగ్ స్పిన్నర్లపై విరాట్ సగటు కేవలం 4.2 మాత్రమే. ఈ క్రమంలో పాకిస్థాన్ తో జరిగే మ్యాచ్ లో విరాట్ కోహ్లీ ఓ బౌలర్ తో జాగ్రత్తగా ఉండాలి. అతడే పాక్ స్టార్ స్పిన్నర్ అబ్రార్ అహ్మద్. అబ్రార్ ను పాకిస్థాన్ మిస్టరీ స్పిన్నర్ అని పిలుస్తారు. అబ్రార్ మంచి లెగ్ స్పిన్ కూడా బౌలింగ్ చేస్తాడు. ఈ పరిస్థితిలో పాకిస్థాన్ విరాట్ ను ఔట్ చేసేందుకు కచ్చితంగా ఉపయోగించుకుంటుంది. ఇటీవల న్యూజిలాండ్ తో జరిగిన మ్యాచ్ లో కూడా అబ్రార్ పొదుపుగా బౌలింగ్ చేశాడు.

అందరి కళ్లు హై-వోల్టేజ్ మ్యాచ్ పైనే..
ఛాంపియన్స్ ట్రోఫీలో పాకిస్థాన్ పై భారత జట్టు ప్రతీకారం తీర్చుకోవాలి. 2017లో చివరిసారిగా ఈ రెండు జట్లు ఫైనల్ లో తలపడినప్పుడు పాకిస్థాన్ టీమిండియాను ఓడించి తొలిసారి ఛాంపియన్స్ ట్రోఫీ టైటిల్ ను గెలుచుకుంది. ఛాంపియన్స్ ట్రోఫీ తొలి మ్యాచ్ లో పాకిస్థాన్ న్యూజిలాండ్ చేతిలో 60 పరుగుల తేడాతో ఓడిపోగా.. టీమిండియా బంగ్లాదేశ్ ను 6 వికెట్ల తేడాతో ఓడించింది.