పిల్లాడు, భార్యను తిడితే వరల్డ్ కప్ వస్తుందా?: ఫ్యాన్స్ వికృత చేష్టలు!

టీ20 ప్రపంచ కప్ సూపర్-8 దశలో ఇంగ్లాండ్ జట్టుతో జరిగిన ఉత్కంఠభరిత పోరులో పాకిస్థాన్ ఓడిపోవడాన్ని ఆ దేశ అభిమానులు అస్సలు జీర్ణించుకోలేకపోతున్నారు. ఈ క్రమంలో వారు తమ విజ్ఞతను మరచి పాకిస్థాన్ కెప్టెన్ సల్మాన్ అలీ ఆఘా కుటుంబ సభ్యులను టార్గెట్ చేశారు. సోషల్ మీడియా వేదికగా ఆయన భార్య సబ్బా మంజూర్, వారి కుమారుడిని ఉద్దేశించి అత్యంత అసభ్యకరమైన పదజాలంతో విమర్శలు గుప్పించారు. కేవలం ఆటలో ఓడిపోయినందుకు ఒక క్రీడాకారుడి కుటుంబాన్ని ఇలా హింసించడం ఇప్పుడు క్రీడా లోకంలో తీవ్ర చర్చకు దారితీసింది.

ఘాటుగా స్పందించిన సబ్బా మంజూర్
తమపై జరుగుతున్న ఈ డిజిటల్ దాడిని సల్మాన్ భార్య సబ్బా మంజూర్ తీవ్రంగా పరిగణించారు. ఆమె ఇన్‌స్టాగ్రామ్ వేదికగా స్పందిస్తూ అభిమానులకు గట్టి కౌంటర్ ఇచ్చారు. "నన్ను లేదా నా అమాయకపు కుమారుడిని దూషించినంత మాత్రాన మీకు ప్రపంచకప్ రాదు" అంటూ ఆమె ఆవేదన వ్యక్తం చేశారు. ఓటమికి ఆటగాళ్లను విమర్శించడం సహజమే అయినా.. వారి వ్యక్తిగత జీవితాలన, పసిబిడ్డలను వివాదాల్లోకి లాగడం అత్యంత హీనమైన చర్య అని ఆమె ఘాటుగా సమాధానమిచ్చారు.

విమర్శల వెనుక ఉన్న కారణాలు
సల్మాన్ అలీ ఆఘాపై ఇంతటి స్థాయిలో విమర్శలు రావడానికి ఆయన తీసుకున్న కొన్ని వివాదాస్పద నిర్ణయాలే కారణమని విశ్లేషకులు భావిస్తున్నారు. పల్లెకెలెలో జరిగిన ఈ మ్యాచ్‌లో సాయంత్రం వేళ మంచు ప్రభావం ఎక్కువగా ఉంటుందని తెలిసి కూడా.. టాస్ గెలిచిన సల్మాన్ బ్యాటింగ్ ఎంచుకోవడం అందరినీ ఆశ్చర్యపరిచింది. దీనికి తోడు బ్యాటర్‌గా ఆయన కేవలం 5 పరుగులు మాత్రమే చేసి నిరాశపరచడం.. హ్యారీ బ్రూక్ సెంచరీతో చెలరేగుతున్నా అతడిని అడ్డుకోవడంలో వ్యూహాత్మకంగా విఫలమవ్వడం వంటి అంశాలు అభిమానులకు ఆగ్రహాన్ని కలిగించాయి.

సల్మాన్ పేలవ ఫామ్.. సెమీస్ ఆశలు గాలిలో
ఈ మెగా టోర్నీలో సల్మాన్ అలీ ఆఘా కెప్టెన్‌గానే కాకుండా బ్యాటర్‌గానూ తీవ్రంగా విఫలమవుతున్నారు. టోర్నీలో ఇప్పటివరకు ఆడిన 6 ఇన్నింగ్స్‌ల్లో ఆయన కేవలం 60 పరుగులు మాత్రమే చేయగలిగారు. నంబర్ 3 వంటి కీలక స్థానంలో ఆడుతున్నా 12.00 సగటుతో పరుగులు చేయడం జట్టుకు పెద్ద భారంగా మారింది. ప్రస్తుతం పాకిస్థాన్ సెమీస్ ఆశలు ఇతర జట్ల ఫలితాలపై ఆధారపడి ఉన్నాయి. శనివారం శ్రీలంకతో జరగనున్న మ్యాచ్‌లో భారీ విజయంతో పాటు అదృష్టం కూడా కలిసి వస్తేనే పాక్ ముందడుగు వేయగలదు.