యూసుఫ్, యూనిస్ లపై జీవిత కాలం నిషేధం

కరాచీ: క్రికెట్ క్రీడా చరిత్రలో కనీవినీ ఎరుగని రీతిలో పాకిస్తాన్ క్రికెట్ బోర్డు బుధవారం ఇద్దరు సీనియర్ క్రికెటర్లపై క్రమశిక్షణా చర్యలు తీసుకుంది. వారిద్దరిపై జీవత కాలం నిషేధం విధించింది. మరో మాజీ కెప్టెన్ షోయబ్ మాలిక్, ఆల్ రౌండర్ రాణా నవీద్ లపై ఏడాది పాటు నిషేధం విధించింది. వీరికి 20 లక్షల రూపాయలేసి జరిమానా కూడా వేసింది.

ఆల్ రౌండర్ షాహిద్ అఫ్రిదీ, అక్మల్ సోదురులు కమ్రాన్, ఉమర్ లకు కూడా జరిమానా విధించింది. వీరికి 30 లక్షల రూపాయలేసి జరిమానా వేసింది. వచ్చే ఆరు నెలల పాటు ఈ ముగ్గురిని ప్రొబెషన్ కింద పెట్టాలని కూడా బోర్డు నిర్ణయించింది. ఆస్ట్రేలియా పర్యటన ఘోర వైఫల్యం నేపథ్యంలో వేసిన విచారణ కమిటీ సిఫార్సుల మేరకు పాకిస్తాన్ క్రికెట్ బోర్డు ఆ క్రికెటర్లపై కఠిన చర్యలకు పూనుకుంది.