అంతర్జాతీయ క్రికెట్‌కు పాక్ మాజీ కెప్టెన్ వీడ్కోలు!

పాక్ క్రికెట్ జట్టులో తనదైన ముద్ర వేసిన మాజీ కెప్టెన్, వెటరన్ వికెట్ కీపర్ సర్ఫరాజ్ అహ్మద్ అంతర్జాతీయ క్రికెట్‌కు గుడ్ బై చెప్పాడు. దాదాపు రెండు దశాబ్దాల పాటు పాకిస్థాన్ జెర్సీని ధరించి దేశం గర్వించేలా చేసిన ఈ క్రీడాకారుడు.. తన కెరీర్‌కు అధికారికంగా స్వస్తి పలికాడు. సుదీర్ఘ కాలం పాటు జట్టుకు సేవలందించిన ఆయన.. ఎన్నో మధుర జ్ఞాపకాలను, అద్భుత రికార్డులను వెనుక ఉంచి రిటైర్మెంట్ ప్రకటించడం పాక్ క్రీడాభిమానులను భావోద్వేగానికి గురిచేస్తోంది.

సర్ఫరాజ్ కెరీర్ గణాంకాలిలా..
2007లో భారత్‌తో జరిగిన వన్డే మ్యాచ్ ద్వారా అంతర్జాతీయ క్రికెట్లోకి అడుగుపెట్టిన సర్ఫరాజ్ అహ్మద్.. తన కెరీర్లో మొత్తం 54 టెస్టులు, 117 వన్డేలు, 61 టీ20 మ్యాచ్‌లు ఆడాడు. మొత్తంగా 6,164 పరుగులు సాధించిన సర్ఫరాజ్.. అందులో 6 సెంచరీలు, 35 అర్థసెంచరీలను నమోదు చేశాడు. బ్యాటింగ్‌తోనే కాకుండా, వికెట్ కీపర్ గా కూడా అద్భుతంగా రాణించాడు. అంతర్జాతీయ క్రికెట్‌లో మొత్తం 315 క్యాచ్‌లు, 56 స్టంపింగ్‌లు సాధించి పాక్ జట్టు విజయాల్లో కీలక పాత్ర పోషించాడు.

కెప్టెన్‌గా తిరుగులేని రికార్డులు
సర్ఫరాజ్ అహ్మద్ కెరీర్‌లో కెప్టెన్సీ ఘట్టం అత్యంత కీలకం. మూడు ఫార్మాట్లలో కలిపి 100 అంతర్జాతీయ మ్యాచ్‌లకు కెప్టెన్సీ వహించిన అతికొద్ది మంది పాక్ కెప్టెన్లలో సర్ఫరాజ్ ఒకడు. ముఖ్యంగా 2017 చాంపియన్స్ ట్రోఫీ విజయం సర్ఫరాజ్ అహ్మద్ కెరీర్‌కు కిరీటం వంటిది. ఫైనల్‌లో టీమిండియాపై 180 పరుగుల భారీ తేడాతో విజయం సాధించి, పాక్ క్రికెట్ చరిత్రలో కొత్త అధ్యాయాన్ని లిఖించాడు. అంతేకాకుండా సర్ఫరాజ్ అహ్మద్ కెప్టెన్సీలో పాక్ టీ20 జట్టు ఐసీసీ ర్యాంకింగ్స్‌లో నంబర్ 1 స్థానానికి చేరుకోవడమే కాకుండా.. వరుసగా 11 సిరీస్‌లను గెలిచి ప్రపంచ రికార్డును సృష్టించడం విశేషం.

భారత్‌కు సవాలుగా మారిన ఆటగాడు
సర్ఫరాజ్ అహ్మద్ కెప్టెన్‌గా ఉన్నప్పుడు భారత్‌కు ఓ పెద్ద సవాలుగా నిలిచాడు. ముఖ్యంగా 2006 అండర్-19 ప్రపంచకప్ ఫైనల్, 2017 చాంపియన్స్ ట్రోఫీ ఫైనల్స్‌లో భారత్‌ను ఓడించి, భారత అభిమానుల కలలను భగ్నం చేయడంలో ఆయన వ్యూహాలు అద్భుతంగా పనిచేశాయి. జూనియర్, సీనియర్ స్థాయిలో ఐసీసీ ట్రోఫీలను గెలిచిన ఏకైక పాక్ కెప్టెన్‌గా సర్ఫరాజ్ నిలిచిపోయాడు.

కోచింగ్ వైపు సర్ఫరాజ్ ప్రయాణం?
ప్రస్తుత పాకిస్థాన్ జట్టులో యువ వికెట్ కీపర్ మహమ్మద్ రిజ్వాన్ రాకతో సర్ఫరాజ్ అహ్మద్‌కు అవకాశాలు తగ్గుతూ వచ్చాయి. ఈ నేపథ్యంలోనే ఆయన రిటైర్మెంట్ నిర్ణయం తీసుకున్నట్లు తెలుస్తోంది. అయినప్పటికీ పాక్ క్రికెట్‌కు తన సేవలను కొనసాగించే యోచనలో సర్ఫరాజ్ ఉన్నట్లు సమాచారం. త్వరలో కోచింగ్ స్టాఫ్ లేదా టీమ్ మేనేజ్‌మెంట్‌లో ఆయన కీలక బాధ్యతలు చేపట్టే అవకాశం ఉందని క్రీడా విశ్లేషకులు భావిస్తున్నారు. రిటైర్మెంట్ ప్రకటన సందర్భంగా "పాకిస్థాన్ జెర్సీ ధరించి దేశానికి ప్రాతినిధ్యం వహించడం నా జీవితంలో దక్కిన అత్యున్నత గౌరవం" అని ఆయన పేర్కొన్న తీరు సర్ఫరాజ్ దేశభక్తిని, క్రికెట్ పట్ల ఆయనకున్న నిబద్ధతను తెలియజేస్తోంది.