ఆ ఒక్కడే మా కొంపముంచాడు: పాక్ కెప్టెన్

టీ20 ప్రపంచకప్ 2026లో ఇంగ్లండ్ మరోసారి సత్తా చాటింది. పల్లెకెలె వేదికగా జరిగిన సూపర్-8 పోరులో పాకిస్థాన్‌ను 2 వికెట్ల తేడాతో చిత్తు చేసి, ఈ టోర్నీలో సెమీఫైనల్‌కు చేరుకున్న మొట్టమొదటి జట్టుగా అవతరించింది. ఇంగ్లండ్‌తో జరిగిన ఈ ఉత్కంఠభరిత పోరులో ఓటమి పాలైన అనంతరం పాకిస్థాన్ కెప్టెన్ సల్మాన్ అలీ ఆఘా స్పందించాడు. ఈ మ్యాచ్‌లో తమ ఓటమికి ప్రధాన కారణం హ్యారీ బ్రూక్ ఆడిన అద్భుత ఇన్నింగ్స్ అని ఆయన కొనియాడారు. మ్యాచ్ ముగిసిన తర్వాత ప్రెజంటేషన్ వేడుకలో సల్మాన్ మాట్లాడాడు.

బ్యాటింగ్‌లో తడబడ్డాం.. స్కోరు సరిపోలేదు
"మేము బ్యాటింగ్‌ను బాగానే ఆరంభించాం కానీ, అనుకున్న రీతిలో ముగించలేకపోయాం. మేము చేసిన స్కోరు (164) ఈ పిచ్‌పై కొంచెం తక్కువే అనిపించింది. లక్ష్య ఛేదనలో మా బౌలర్లు శాయశక్తులా ప్రయత్నించారు. ముఖ్యంగా షాహీన్ అఫ్రిది అద్భుతంగా బౌలింగ్ చేశాడు. ఆరంభంలోనే వికెట్లు తీయడంలో అతను దిట్ట అని మరోసారి నిరూపించుకున్నాడు" అని సల్మాన్ పేర్కొన్నాడు.

బ్రూక్ ఇన్నింగ్స్ అమోఘం
హ్యారీ బ్రూక్ బ్యాటింగ్‌ను ప్రశంసిస్తూ.. "కొన్ని రోజులు ప్రత్యర్థి బ్యాటర్ల ప్రతిభకు క్రెడిట్ ఇవ్వక తప్పదు. బ్రూక్ ఇన్నింగ్స్ అమోఘం. మైదానం నలుమూలలా అతను ఆడిన షాట్లు మాకు సవాలుగా మారాయి. మేము అతన్ని అడ్డుకోవడానికి అన్ని అస్త్రాలను ప్రయోగించాం కానీ, అతను ఒంటిచేత్తో మ్యాచ్‌ను మా చేతుల్లోంచి లాగేసుకున్నాడు. ఇంగ్లండ్‌పై మేము ఓడిపోయిన ప్రతిసారీ అతను తన బ్యాటింగ్‌తో మమ్మల్ని దెబ్బతీస్తూనే ఉన్నాడు. అతనికి హాట్సాఫ్ చెప్పాల్సిందే" అని సల్మాన్ కొనియాడాడు.

ఫర్హాన్ మెరిసినా.. ఇతరులు విఫలం
టోర్నీలో సాహిబ్జాదా ఫర్హాన్ ప్రదర్శనపై కెప్టెన్ సంతృప్తి వ్యక్తం చేశాడు. "ఫర్హాన్ ఈ వరల్డ్ కప్ అంతటా చాలా బాగా ఆడాడు. ఈ మ్యాచ్‌లో కూడా అతను అద్భుతమైన అర్ధ సెంచరీతో ఆదుకున్నాడు. అయితే ఇతర బ్యాటర్లు ఆశించిన స్థాయిలో రాణించలేకపోయారు. ప్రపంచకప్ లాంటి పెద్ద టోర్నీల్లో ఇలాంటివి జరుగుతుంటాయి" అని అభిప్రాయపడ్డాడు.

చివరి వరకు పోరాడాం..
చివరి ఓవర్లలో మొహమ్మద్ నవాజ్ బౌలింగ్‌ను సల్మాన్ మెచ్చుకున్నాడు. "నవాజ్ 19వ ఓవర్ వేసిన తీరు చూస్తే, మళ్ళీ గెలుస్తామేమో అన్న ఆశ కలిగింది. ఒక్క శాతం గెలుపు అవకాశం ఉన్నా.. మేము దాని కోసం చివరి వరకు పోరాడుతాం. ఈ రోజు మా ప్రణాళికలు ఫలించలేదు" అని సల్మాన్ అలీ ఆఘా ముగించాడు.