చరిత్రకు అడుగుదూరం: ఫైనల్‌లో టీమిండియా తుది జట్టు ఇదే!

IND W vs SA W Final: నేడు (నవంబర్ 2) నవీ ముంబైలోని డీవై పాటిల్ స్టేడియం వేదికగా జరగనున్న ఐసీసీ మహిళల ప్రపంచ కప్ 2025 ఫైనల్ మ్యాచ్ యావత్ ప్రపంచ క్రికెట్ దృష్టిని ఆకర్షిస్తోంది. చారిత్రక సెమీ-ఫైనల్లో ఏడు సార్లు ఛాంపియన్ ఆస్ట్రేలియాపై 339 పరుగుల రికార్డు ఛేదనతో అద్భుత విజయం సాధించి ఫైనల్‌కు చేరుకున్న టీమిండియా.. తమ మొట్టమొదటి ఐసీసీ ట్రోఫీని గెలుచుకోవడానికి ఉవ్విళూరుతోంది. మరోవైపు దక్షిణాఫ్రికా జట్టు కూడా తమ చరిత్రలో తొలిసారి ఈ ఘనతను సాధించాలని తహతహలాడుతోంది. ఈ హై-వోల్టేజ్ మ్యాచ్‌లో ఇరు జట్లు ఎలాంటి కూర్పుతో బరిలోకి దిగుతాయో.. ఏ వ్యూహాలను అనుసరిస్తాయో తెలుసుకుందాం.

టీమిండియా ప్లేయింగ్ ఎలెవన్ ఇదే..
భారత జట్టు సెమీ-ఫైనల్లో ఆడిన జట్టును ఫైనల్లో మార్చకపోవడానికి కెప్టెన్ హర్మన్‌ప్రీత్ కౌర్ మొగ్గు చూపవచ్చు. ఈ విజయం జట్టులో సమన్వయాన్ని, ఆటగాళ్లపై ఉన్న అపారమైన విశ్వాసాన్ని సూచిస్తుంది. షెఫాలీ వర్మ, స్మృతి మంధానతో పటిష్టమైన ఓపెనింగ్ ద్వయం పరుగులు సాధించడం కీలకం. మిడిలార్డర్‌‌లో కెప్టెన్ హర్మన్‌ప్రీత్ కౌర్, జెమీమా రోడ్రిగ్స్ భారీ ఇన్నింగ్స్ ఆడటం భారత్ విజయావకాశాలను పెంచుతుంది. దీప్తి శర్మ ఆల్‌రౌండర్ పాత్రతో పాటు లోయర్ ఆర్డర్‌లో రిచా ఘోష్ వేగవంతమైన పరుగులు సాధించడం జట్టుకు బలంగా మారనుంది. బౌలింగ్‌లో రేణుకా సింగ్ ఠాకూర్ పేస్ అటాక్‌కు నాయకత్వం వహించగా.. స్పిన్ బాధ్యతలను రాధా యాదవ్, క్రాంతి గౌడ్ పంచుకోనున్నారు. ఫైనల్ వంటి కీలక మ్యాచ్‌లో ఏ చిన్న మార్పు చేసినా రిస్క్ అవుతుందని భావించి గెలిచిన జట్టుతోనే బరిలోకి దిగాలనేది భారత వ్యూహం.

దక్షిణాఫ్రికా ప్లేయింగ్ XI (అంచనా): మారే అవకాశం లేదు
దక్షిణాఫ్రికా సెమీస్‌లో బలమైన ఇంగ్లాండ్ జట్టును ఏకపక్షంగా ఓడించింది. విజయం సాధించిన జట్టులో మార్పులు చేయాల్సిన అవసరం వారికి కనిపించడం లేదు. కెప్టెన్ లారా వోల్వార్డ్ట్, తాజ్మిన్ బ్రిట్స్ మంచి ఆరంభాన్ని ఇవ్వడంపై దృష్టి పెడతారు. వారి బలం ఆల్‌రౌండర్లలో ఉంది. మారిజాన్ కాప్, క్లో ట్రయాన్, ముఖ్యంగా లీగ్ మ్యాచ్‌లో భారత్‌ను ఓడించిన నాదిన్ డీ క్లర్క్ అద్భుతమైన ఫామ్‌లో ఉన్నారు. వారి బౌలింగ్ విభాగం కూడా పటిష్టంగా ఉండటంతో సెమీస్ గెలిచిన జట్టు కూర్పుతోనే దక్షిణాఫ్రికా తొలి టైటిల్‌ను లక్ష్యంగా చేసుకుని బరిలోకి దిగనుంది.

లీగ్ ఓటమికి ప్రతీకారం తీర్చుకునే అవకాశం
భారత్ ఈ ప్రపంచ కప్ లీగ్ దశలో దక్షిణాఫ్రికా చేతిలో ఓటమిని చవిచూసింది. ఆ మ్యాచ్‌లో భారత్ నిర్దేశించిన 251 పరుగుల లక్ష్యాన్ని ఛేదించడంలో దక్షిణాఫ్రికా ఒకానొక దశలో 81/5తో కష్టాల్లో పడింది. అయితే అద్భుతమైన పోరాట పటిమ కనబరిచిన నాదిన్ డి క్లర్క్ ఆ ఓటమి నుంచి దక్షిణాఫ్రికాను గెలిపించింది. నేటి ఫైనల్ మ్యాచ్‌ ద్వారా ఆ లీగ్ ఓటమికి ప్రతీకారం తీర్చుకోవడానికి, అలాగే వారి తొలి ప్రపంచ కప్ టైటిల్‌ను గెలుచుకోవడానికి హర్మన్‌ప్రీత్ కౌర్ సేనకు ఇది సువర్ణావకాశం. ఈ రోజు మహిళల క్రికెట్‌కు కొత్త ఛాంపియన్ దక్కబోతుంది.