హైదరాబాద్: క్రికెట్ ఆడే క్రమంలో ఆటగాళ్ల గాయాలు పాలవడం సహజం. సాధారణంగా బ్యాట్స్మెన్ కొట్టిన బంతి అవతలి ఎండ్లో ఉన్న బ్యాట్స్ మెన్కో లేక బౌలర్ లేదంటే అంఫైర్కు తగలడాన్ని పలు సందర్భాల్లో మనం చూశాం. అయితే ఆస్ట్రేలియాలో జరిగిన ఓ స్ధానిక మ్యాచ్లో బౌలర్ వేసిన ఒక్క బంతి ముగ్గురు గాయాలకు కారణమైంది.
ఈ సంఘటన ఈ ఏడాది మొదట్లో జరిగినప్పటికీ, ఇందుకు సంబంధించిన వీడియో తాజాగా సోషల్ మీడియాలో వైరల్ అయింది. వివరాల్లోకి వెళితే విక్టోరియన్ ప్రిమియర్ లీగ్లో భాగంగా ఫుట్స్క్రే ఎడ్జ్వాటర్, ఫిట్జ్రోయ్ డాన్కాస్టర్ జట్ల మధ్య జరిగిన మ్యాచ్లో ఈ ఘటన జరిగింది.
స్ట్రైకింగ్లో ఉన్న బ్యాట్స్మన్ బలంగా కొట్టిన బంతి నాన్స్ట్రైకర్ కాళ్లకు తగలడంతో అతను గాయపడ్డాడు. ఆ షాట్ సరిగా ఆడకపోవడంతో బ్యాట్స్మన్ భుజానికి తీవ్ర గాయమైంది. ఆ తర్వాత మిడాఫ్లో ఉన్న ఫీల్డర్ ఆ బంతిని అందుకొని త్రో చేయడంతో అది కాస్తా బౌలర్ కంటిని బలంగా తాకింది.
ఇలా ఒకే బంతికి ముగ్గురు గాయపడటంతో ఆట చాలా సేపటి వరకు నిలిచిపోయింది. ఆ తర్వాత ఫిజియో రావడంతో బౌలర్కు చికిత్స అందించడంతో కొద్ది సేపటి తర్వాత మ్యాచ్ తిరిగి ప్రారంభమైంది.