బౌల‌ర్.. లేబ‌ర్‌లాంటోడు: బౌలింగ్ చేయాల‌ని ఎవ‌రూ కోరుకోరు

బ్యాట్స్‌మెన్ కావాల‌నుకున్నా..

బ్రేక్‌ఫాస్ట్ విత్ ఛాంపియ‌న్స్ పేరుతో యూట్యూబ్‌లో ప్ర‌సార‌మైన ఓ టాక్‌షోలో అశ్విన్ మాట్లాడారు. త‌న కేరీర్‌కు సంబంధించిన కొన్ని కీల‌క అంశాల‌ను ఆయ‌న వెలుగులోకి తీసుకొచ్చారు. తాను మొద‌ట బ్యాట్స్‌మెన్‌గా రాణించాల‌ని భావించిన‌ట్లు చెప్పారు. క్ర‌మంగా బౌల‌ర్‌గా అవత‌రించాన‌ని చెప్పుకొచ్చారు. ఓ జ‌ట్టు త‌ర‌ఫున అంత‌ర్జాతీయ మ్యాచ్‌ల‌ల్లో బ్యాటింగ్ చేయ‌డం అనేది బిజినెస్ క్లాస్ లేదా ఫ‌స్ట్‌క్లాస్‌తో స‌మాన‌మైన‌ది. అదే బౌలింగ్ లేబ‌ర్ క్లాస్‌తో స‌మానం. అందుకే- బౌలింగ్ చేయాల‌ని, బౌల‌ర్‌గా త‌యారు కావాల‌ని ఎవ‌రూ కోరుకోరు.. అని అశ్విన్ అభిప్రాయ‌ప‌డ్డారు. తాను బౌలర్‌గా రాణిస్తున్న స‌మ‌యంలో- ఈ విష‌యం త‌న‌కు బోధ‌ప‌డింద‌ని అన్నారు.

పోరాట స్ఫూర్తిని నింపే శ‌క్తి బౌల‌ర్‌కే..

ప్రేక్ష‌కుల్లో పోరాట స్ఫూర్తిని నింపే అవ‌కాశం మాత్రం ఒక్క బౌల‌ర్‌కే ద‌క్కుతుంద‌ని చెప్పారు. ఎలాంటి క‌ఠిన ప‌రిస్థితుల్లోనైనా రాణించి, జ‌ట్టుకు విజ‌యాన్ని అందించే సామ‌ర్థ్యం బౌల‌ర్‌కు ఉంటుంద‌ని అన్నారు. ప్ర‌జ‌లు, ప్రేక్షకులు ఓ బ్యాట్స్‌మెన్‌ను ఎంత‌గా ఆరాధిస్తారో అదే త‌ర‌హా అభిమానాన్ని బౌల‌ర్లపైనా చూపించాల్సిన అవ‌స‌రం ఉంద‌ని చెప్పారు. బౌల‌ర్‌ను బౌల‌ర్‌గా కాకుండా ఓ పోరాట యోధుడిగా చూడాల‌ని కోరారు. స్పిన్న‌ర్‌గా తాను కేరీర్ ఆరంభించిన తొలి రోజుల్లో అనిల్ కుంబ్లే నుంచి చాలా మెళ‌కువ‌ల‌ను నేర్చుకున్నాన‌ని అన్నారు. టీమిండియాలో బౌల‌ర్‌గా రాణించ‌గ‌లిగితే.. త‌న భ‌విష్య‌త్తు ఎలా ఉంటుందనే విష‌యాన్ని అనిల్ కుంబ్లే ద‌శాబ్దం కింద‌టే వెల్ల‌డించార‌ని అన్నారు.

టెస్టుల‌కే ప‌రిమిత‌మైన అశ్విన్‌..

ఇండియ‌న ప్రీమియర్ లీగ్ టోర్న‌మెంట్ల ద్వారా ర‌విచంద్న్ అశ్విన్ వెలుగులోకి వ‌చ్చారు. మొద‌ట్లో చెన్నై సూప‌ర్‌కింగ్స్ త‌ర‌ఫున ఆడిన ఆయ‌న బౌలింగ్‌కు దేశం ఆరాధించింది. అశ్విన్ విసిరే బంతులు ఓ ప‌ట్టాన బ్యాట్స్‌మెన్‌కు కొరుకుడు ప‌డ‌వు. అందుకే- అతి త‌క్కువ కాలంలో టీమిండియాలో కీల‌క బౌల‌ర్‌గా మారిపోయాడు. ఓ ద‌శ‌లో బౌలింగ్ విభాగానికి నేతృత్వం వ‌హించాడు. 2010లో జింబాబ్వేతో జ‌రిగిన వ‌న్డే సిరీస్ సంద‌ర్భంగా అరంగేట్రం చేశారు అశ్విన్‌. క్ర‌మంగా అన్ని ఫార్మ‌ట్ల‌లోనూ రాణించాడు. ప్ర‌స్తుతం వ‌న్డేల్లో ఆయ‌న‌కు చోటు ద‌క్క‌లేదు. టెస్ట్ క్రికెట్‌లో కొన‌సాగుతున్నారు. అన్ని ఫార్మ‌ట్ల‌లో క‌లిపి 550 వికెట్ల‌ను ప‌డ‌గొట్టిన మైలురాయిని అందుకున్నాడు అశ్విన్‌.