దాదా సౌరవ్ గంగూలీ దెబ్బకు దిగొచ్చిన షారూఖ్ ఖాన్

న్యూఢిల్లీ: దాదా అభిమానుల దెబ్బకు ఐపియల్ కోల్‌కత్తా నైట్ రైడర్స్ (కెకెఆర్) యజమాని, బాలీవుడ్ నటుడు షారూఖ్ ఖాన్ దిగొచ్చారు. దాదా సౌరవ్ గంగూలీ వేలంలో అమ్ముడుపోలేదు. దీంతో షారూఖ్ ఖాన్‌పై గంగూలీ అభిమానులు చెలరేగారు. గంగూలీని తీసుకోకపోవడాన్ని నిరసిస్తూ వారు పశ్చిమ బెంగాల్‌లో షారూఖ్ దిష్టిబొమ్మలను దగ్ధం చేశారు. సౌరవ్ గంగూలీ లేకుండా కోల్‌కత్తాలో ఐపియల్ జట్టు సాధ్యం కాదని షారూఖ్ అన్నారు.

తాను గంగూలీతో మాట్లాడుతానని, గంగూలీని తీసుకోవడానికి కెకెఆర్ ప్రయత్నిస్తుందని షారూఖ్ ఓ టీవీ చానెల్ ప్రతినిధికి ఇచ్చిన ఇంటర్వ్యూలో చెప్పారు. రెండో రోజు కూడా గంగూలీని ఏ ఫ్రాంచైజీ కూడా కొనుగోలు చేయలేదు. రెండో రోజు జరిగిన వేలం పాటలో మురళీ కార్తిక్‌ను అదృష్టం వరించింది. కార్తిక్ ‌ను సహారా వారియర్స్ 4 లక్షల డాలర్లకు కొనుగోలు చేసింది.