IND vs NZ: టీమిండియాకు ఆందోళన కలిగించే కివీస్ వీరులు వీరే..

IND vs NZ: ఛాంపియన్స్ ట్రోఫీలో భాగంగా గ్రూప్-ఏలోని భారత్, న్యూజిలాండ్ జట్ల మధ్య కీలక మ్యాచ్ నేడు దుబాయ్ లో జరగనుంది. రెండు జట్లు ఇప్పటికే సెమీ-ఫైనల్ కు చేరుకున్నాయి. కానీ సెమీ-ఫైనల్ లో ఓ జట్టు ఎవరిని ఎదుర్కొంటుందో ఇంకా నిర్ణయించబడలేదు. ఈ నేపథ్యంలో గ్రూప్ దశలో ఈ చివరి మ్యాచ్ చాలా ముఖ్యమైనది. ఛాంపియన్స్ ట్రోఫీ చరిత్రలో టీమిండియా ఇప్పటి వరకు కివీస్ పై నెగ్గలేదు.

2000 సంవత్సరంలో ఛాంపియన్స్ ట్రోఫీ ఫైనల్ లో భారత్ పై కివీస్ విజయం సాధించింది. దాదాపు 25 ఏళ్ల తర్వాత ఛాంపియన్స్ ట్రోఫీలో న్యూజిలాండ్ ను ఓడించే అవకాశం వచ్చింది. ఈ మ్యాచ్ లో ఛాంపియన్స్ ట్రోఫీలో ఉన్న రికార్డును చెరిపేయాలని భారత జట్టు యోచిస్తోంది. కానీ అది అంత తేలికైన విషయమేమీ కాదు. న్యూజిలాండ్ జట్టులో టీమిండియాకు ఆందోళన కలిగించే ఆటగాళ్లు చాలా మంది ఉన్నారు. అలాంటి ఐదుగురు కివీస్ ఆటగాళ్ల గురించి తెలుసుకుందాం.

అద్భుతంగా రాణిస్తున్న ఆల్‌రౌండర్ మైఖేల్ బ్రేస్‌వెల్
ప్రస్తుతం మైఖేల్ బ్రేస్‌వెల్ న్యూజిలాండ్ జట్టులో స్పిన్ బౌలింగ్ ఆల్‌రౌండర్ గా అద్భుతంగా రాణిస్తున్నాడు. బంగ్లాదేశ్ పై 4 వికెట్లు పడగొట్టి బ్రేస్‌వెల్ ప్లేయర్ ఆఫ్ ది మ్యాచ్ అయ్యాడు. ఇటీవల కాలంలో టీమిండియా బ్యాటర్లు స్పిన్ ను ఎదుర్కోవడంలో ఇబ్బందులు పడుతున్నారు. ముఖ్యంగా విరాట్ కోహ్లీ స్పిన్ బౌలింగ్ లో ఇబ్బందుల్లో పడ్డాడు. మైఖేల్ బ్రేస్‌వెల్ విధ్వంసకర బ్యాటింగ్ కూడా చేయగలడు.

గ్లెన్ ఫిలిప్స్ తో జాగ్రత్త
న్యూజిలాండ్ జట్టులో అత్యంత ప్రమాదకరమైన ఆయుధం వారి ఆల్ రౌండర్ గ్లెన్ ఫిలిప్స్. అద్భుతమైన బ్యాటర్ మాత్రమే కాకుండా ఫిలిప్స్ అద్భుతమైన స్పిన్ బౌలింగ్ చేయగల సామర్థ్యాన్ని కూడా కలిగి ఉన్నాడు. మరోవైపు ఫిలిప్స్ ప్రస్తుత కాలంలో బెస్ట్ ఫీల్డర్లలో ఒకరు. గత అనేక మ్యాచ్ లలో ఫిలిప్స్ చివరి 10 ఓవర్లలో చాలా రన్స్ చేశాడు. దీని కారణంగా కివీస్ భారీ స్కోర్లు సాధించడంలో సఫలమైంది. ఈ నేపథ్యంలో టీమిండియా గ్లెన్ ఫిలిప్స్ పట్ల జాగ్రత్తగా ఉండాలి.

కెప్టెన్ మిచెల్ సాంట్నర్ ప్రమాదకరం
న్యూజిలాండ్ జట్టు కెప్టెన్ మిచెల్ సాంట్నర్ అత్యంత తెలివైన ఆటగాళ్లలో ఒకడు. సాంట్నర్ స్పిన్ బౌలింగ్ టీమిండియాను చాలా ఇబ్బంది పెట్టిన సంగతి తెలిసిందే. ఇటీవల న్యూజిలాండ్ జట్టు స్వదేశంలో జరిగిన టెస్ట్ సిరీస్ ను క్లీన్ స్వీప్ చేసింది. ఈ క్రమంలో టీమిండియా జాగ్రత్తగా ఉండాల్సిన అవసరం ఉంది. కెప్టెన్ గా సాంట్నర్ మరింత ప్రమాదకరం.

రచిన్ రవీంద్ర.. డేంజరస్ బ్యాటర్
కివీస్ జట్టులో మరో ప్రమాదకరమైన ఆటగాడు ఉన్నాడు. అతని పేరు రచిన్ రవీంద్ర. రచిన్ రవీంద్ర న్యూజిలాండ్ జట్టులోని అత్యుత్తమ బ్యాటర్లలో ఒకరు. రచిన్ రవీంద్ర క్రీజులో నిలపబడితే సుదీర్ఘ ఇన్నింగ్స్ ఆడే సామర్థ్యం ఉంది. గతంలో రచిన్ రవీంద్ర న్యూజిలాండ్ జట్టుకు ఓపెనింగ్ చేసేవాడు. కానీ ఛాంపియన్స్ ట్రోఫీలో మిడిల్ ఆర్డర్ లో ఆడుతున్నాడు. బంగ్లాదేశ్ పై రచిన్ రవీంద్ర సెంచరీ కూడా సాధించాడు.

కేన్ విలియమ్సన్ ఔట్ అవ్వాలి..
న్యూజిలాండ్ దిగ్గజ బ్యాటర్ కేన్ విలియమ్సన్ అత్యుత్తమ బ్యాటర్లలో ఒకరు. విలియమ్సన్ సెట్ అయ్యేలోపు ఎలాగైనా ఔట్ చేయాలని టీమిండియా కోరుకుంటుంది. విలియమ్సన్ క్రీజులో ఉంటే సుదీర్ఘ ఇన్నింగ్స్ ఆడే అవకాశం ఉంది. విలియమ్సన్ గురించి అత్యంత ప్రత్యేకమైన విషయం ఏంటంటే.. అతనికి పరుగులు చేయడానికి ఎలాంటి పిచ్ అవసరం లేదు. బంతి ఎలా వచ్చినా బౌండరీకి తరలించగల సామర్థ్యం ఉంది.