బంతుల పరంగా వన్డే చరిత్రలోనే టీమిండియాకు అతిపెద్ద ఓటమి

India Vs New Zealand : New Zealand Consign India To Biggest ODI Loss In Terms Of Balls Remaining

హైదరాబాద్: హామిల్టన్ వేదికగా న్యూజిలాండ్‌తో జరిగిన నాలుగో వన్డేలో టీమిండియా చిత్తుగా ఓడి.... దాదాపు తొమ్మిదేళ్ల తర్వాత అతిపెద్ద ఓటమిని రుచి చూసింది. ఈ మ్యాచ్‌లో టాస్ ఓడి తొలుత బ్యాటింగ్‌కు దిగిన టీమిండియా కివీస్ బౌలర్ల దెబ్బకు 30.5 ఓవర్లలో కేవలం 92 పరుగులకే కుప్పకూలిపోయింది.

93 ప‌రుగుల ల‌క్ష్యంతో బరిలోకి

అనంతరం భారత్ నిర్దేశించిన 93 ప‌రుగుల ల‌క్ష్యాన్ని న్యూజిలాండ్ కేవ‌లం 14.4 ఓవ‌ర్ల‌లో రెండు వికెట్లు కోల్పోయి ఛేదించింది. దీంతో భారత జట్టుపై న్యూజిలాండ్ 8 వికెట్ల తేడాతో విజయం సాధించింది. ఈ క్రమంలో 212 బంతులు మిగిలి ఉండగానే ఓటమిపాలైన టీమిండియా బంతుల పరంగా 2010‌లో నమోదైన ఓటమి రికార్డుని సవరించింది.

209 బంతులు మిగిలి ఉండగానే

శ్రీలంకతో దంబుల్లా వేదికగా 2010లో జరిగిన వన్డేలో 209 బంతులు మిగిలి ఉండగానే 8 వికెట్ల తేడాతో టీమిండియా ఓటమిపాలైంది. ఆ తర్వాత మళ్లీ తొమ్మిదేళ్లకు 212 బంతుల తేడాతో గురువారం హామిల్డన్ వేదికగా జరిగిన నాలుగో వన్డేలో న్యూజిలాండ్ చేతిలో ఓడిపోయింది. మొత్తంగా ఎక్కువ బంతుల పరంగా భారత్ ఓడిపోయిన టాప్-5 వన్డే మ్యాచ్‌లను ఓసారి పరిశీలిస్తే..

Margin	Balls left	Toss	Opponents	Venue	Year
8 wickets	212	Lost	New Zealand	Hamilton	2019
8 wickets	209	Won	Sri Lanka	Dambulla	2010
9 wickets	181	Won	Sri Lanka	Hambantota	2012
7 wickets	176	Lost	Sri Lanka	Dharamsala	2017
9 wickets	175	Lost	Australia	Sydney	1981

212 బంతులతో జాబితాలో అగ్రస్థానంలో

హామిల్టన్ వేదికగా గురువారం జరిగిన ఈ మ్యాచ్‌ 212 బంతులతో జాబితాలో అగ్రస్థానంలో ఉండగా.. ఆ తర్వాత దంబుల్లా వన్డే 209 బంతులతో రెండో స్థానంలో ఉంది. ఇక మూడో స్థానంలో 181 బంతుల తేడాతో 2012లో శ్రీలంకతో హంబన్‌తోటలో జరిగిన వన్డే మ్యాచ్ నిలిచింది. నాలుగో స్థానంలో మళ్లీ శ్రీలంకతో 2017లో ధర్మశాల వేదికగా జరిగిన వన్డే 176 బంతులతో.. ఇక ఐదో స్థానంలో 1981లో సిడ్నీ వేదికగా ఆసీస్‌తో జరిగిన మ్యాచ్ 175 బంతులతో ఉంది.