పరుగులు '0', వికెట్లు '0', క్యాచ్‌లూ '0'.. అయినా 'మ్యాన్ ఆఫ్ ది మ్యాచ్'

సాధారణంగా క్రికెట్‌లో 'మ్యాన్ ఆఫ్ ది మ్యాచ్' అవార్డు దక్కాలంటే ఆ ఆటగాడు మ్యాచ్‌లో అద్భుతంగా రాణించి ఉండాలి. అంటే బ్యాటింగ్‌లో ఎక్కువ పరుగులు చేయడమో, బౌలింగ్ లో కీలకమైన వికెట్లు పడగొట్టడమో లేదా అద్భుతమైన క్యాచ్‌లతో ఫీల్డింగ్‌లో సత్తా చాటడమో జరగాలి. కానీ 2010లో ఆస్ట్రేలియాకు చెందిన ఒక ఆటగాడు ఒక్క పరుగు కూడా చేయకుండా, ఒక్క వికెట్ కూడా తీయకుండా, కనీసం ఒక్క క్యాచ్ కూడా పట్టకుండానే ఈ అరుదైన అవార్డును గెలుచుకున్నాడు. ఇది ఎలా సాధ్యమైందో ఇప్పుడు వివరంగా తెలుసుకుందాం.

ఈ అరుదైన ఘటన 2010 ఫిబ్రవరి 15న సిడ్నీలో ఆస్ట్రేలియా, న్యూజిలాండ్ జట్ల మధ్య జరిగిన ఒక టీ20 మ్యాచ్‌లో చోటుచేసుకుంది. ఆ మ్యాచ్‌లో మొదట బ్యాటింగ్ చేసిన ఆస్ట్రేలియా జట్టు నిర్ణీత 20 ఓవర్లలో 150 పరుగులు చేసింది. అనంతరం 151 పరుగుల లక్ష్యంతో బరిలోకి దిగిన న్యూజిలాండ్ జట్టు ఆఖరి బంతివరకు పోరాడి 149 పరుగులు మాత్రమే చేసి ఒక్క పరుగు తేడాతో ఓడిపోయింది.

ఈ ఉత్కంఠభరితమైన మ్యాచ్‌లో ఆస్ట్రేలియా విజయం సాధించడంలో కీలక పాత్ర పోషించింది వారి బౌలర్ నాథన్ బ్రాకెన్. అతను బ్యాటింగ్‌లో ఒక్క పరుగు కూడా చేయలేదు. కానీ నాథన్ బ్రాకెన్ ప్రదర్శన అత్యంత ప్రభావవంతంగా ఉంది. టీ20 లాంటి ఫార్మాట్‌లో బ్యాటర్లు బౌలర్లపై విరుచుకుపడి పరుగులు రాబడుతుంటారు. అలాంటి మ్యాచ్‌లో నాథన్ బ్రాకెన్ తన 4 ఓవర్లలో ఒక మెయిడిన్ ఓవర్ కూడా ఉండడం అతని కట్టుదిట్టమైన బౌలింగ్‌కు నిదర్శనం.

ముఖ్యంగా న్యూజిలాండ్ జట్టు చివరి ఓవర్‌లో విజయానికి 14 పరుగులు చేయాల్సిన పరిస్థితుల్లో నాథన్ బ్రాకెన్ తన అనుభవాన్ని నైపుణ్యాన్ని ఉపయోగించి కేవలం 12 పరుగులు మాత్రమే ఇచ్చాడు. అతని ఈ ప్రదర్శనతో ఆస్ట్రేలియా జట్టు ఒక్క పరుగు తేడాతో విజయం సాధించింది. అందుకే ఈ మ్యాచ్‌లో పరుగులు, వికెట్లు, క్యాచ్‌లు లేకపోయినా, తన అద్భుతమైన, కట్టుదిట్టమైన బౌలింగ్ ప్రదర్శనతో జట్టు విజయంలో కీలక పాత్ర పోషించిన నాథన్ బ్రాకెన్‌కు మ్యాన్ ఆఫ్ ది మ్యాచ్ అవార్డు లభించింది. ఈ సంఘటన క్రికెట్ చరిత్రలో ఎప్పటికే గుర్తుండిపోయే అరుదైన ఘట్టంగా నిలిచిపోయింది.