సెమీఫైనల్‌లో పాకిస్థాన్ గెలవాలి..: పర్వేజ్ ముషారఫ్

క్రికెట్ ప్రపంచ కప్ 2011 సెమీఫైనల్‌లో భారత్-పాకిస్థాన్ దేశాలు తలపడనున్న నేపథ్యంలో.. తాను ఓ పాకిస్థాన్‌కు చెందిన వ్యక్తిగా తమ దేశమే గెలవాలని కోరుకుంటున్నట్లు ఆ దేశపు మాజీ అధ్యక్షుడు పర్వేజ్ ముషారఫ్ ఓ ప్రైవేట్ టెలివిజన్ ఛానెల్‌కు ఇచ్చిన టెలిఫోనిక్ ఇంటర్వ్యూలో చెప్పారు. అయితే ఇరు జట్లు సమానంగానే ఉన్నాయని, బౌలింగ్ పరంగా చూస్తే.. భారత జట్టు కన్నా పాకిస్థాన్ జట్టు మెరుగ్గా ఉందని, అలాగే.. బ్యాటింగ్ పరంగా చూస్తే.. పాకిస్థాన్ జట్టుగా కన్నా భారత జట్టు మెరుగ్గా ఉందని ప్రపంచ కప్‌పై ముషారఫ్ తన అభిప్రాయాలను ఎన్డీటీవితో పంచుకున్నారు.

కాగా.. ఈ మ్యాచ్‌ను వీక్షించడానికి పాక్ ప్రధాని యూసఫ్ రజా గిలానీని భారత ప్రధానమంత్రి డాక్టర్ మన్మోహన్ సింగ్ ఆహ్వానించడాన్ని ముషారఫ్ స్వాగతించారు. ఇరు దేశాల మధ్య సంబంధాలను పుమరుద్ధరించుకునేందుకు ఇండియా-పాకిస్థాన్ క్రికెట్ మ్యాచ్ ఓ మంచి వేదిక కానుందని ఆయన అభిప్రాయపడ్డారు. మరికొద్ద గంటల్లో యావత్ దేశం ఆసక్తితో ఎదురుచూస్తున్న బిగ్ క్రికెట్ సమరానికి మోహాలీ స్టేడియం సిద్ధంగా ఉంది. ఈ మ్యాచ్‌ను తిలకించేందుకు కాంగ్రెసు అధ్యక్షురాలు సోనియా గాంధీ, యువనేత రాహుల్ గాంధీలలో పలువురు రాజకీయ, సినీ ప్రముఖులు కూడా విచ్చేయనున్నారు.