ఒకే టీంలో ఉండండి: పఠాన్ల మమ్మీ

న్యూఢిల్లీ: తమ కొడుకులిద్దరు ఐపియల్ లో ఒకే జట్టులో ఉండాలని క్రికెట్ సోదరులు ఇర్ఫాన్, యూసుఫ్ పఠాన్లు అంటున్నారు. ఆదివారం ప్రసారమయ్యే తేరే మేరే బీచ్ మే కార్యక్రమం కోసం వారిద్దరిని ఫర్హా ఖాన్ ఇంటర్వ్యూ చేశారు. వారిద్దరి నిజ జీవితాలను ఆమె ఈ ఎపిసోడ్ లో ఆమె రాబట్టారు. ఐపియల్ లో రెండు వేర్వేరు జట్లలో పోటీ పడుతున్నప్పుడు మీరు సోదరులమని అనుకుంటారా, ప్రత్యర్థులుగా చూసుకుంటారా అని ఫర్హా ఖాన్ అడిగితే ప్రత్యర్థులుగానే పోటీ పడతామని వారు చెప్పారు. తామిద్దరం వేర్వేరు జట్లలో ఉండి పోటీ పడడం తమ కుటుంబ సభ్యులకు ఇబ్బందిగా ఉంటుందని యూసుఫ్ అన్నాడు.

మీ కుటుంబ సభ్యులు పంజాబ్ జట్టును సమర్థిస్తారా, రాజస్థాన్ జట్టును సమర్థిస్తారా అని అడిగితే తన సోదరుడి వైపు ఇర్ఫాన్ వేలు పెట్టి చూపించాడు. ఆ విషయాన్ని యూసుఫ్ అంగీకరించాడు. తనకు తల్లిదండ్రులు, సోదరీల మద్దతు లభిస్తుందని చెప్పాడు. బేచారా ఇర్ఫాన్, కేవలం అమ్మాయిల మద్దతే ఉంటుందా అని ఫర్హా వ్యాఖ్యానించారు. అంత మంది అమ్మాయిల సపోర్టు దొరికిన తర్వాత ఇంకేం కావాలని యూసుఫ్ ప్రశ్నించాడు. ఇర్ఫాన్ నవ్వి - మీ ఇద్దరూ ఒకే జట్టులో ఉండండని, తాము ఒత్తిడి తట్టుకోలేకపోతున్నామని తమ తల్లి చెప్పిందని చెప్పాడు.