హెలికాప్టర్ షాట్ ఆడొద్దు: పిల్లలకు ధోని హెచ్చరిక

నేనెప్పుడూ ఫలితాన్ని నమ్మను

'నేనెప్పుడూ ఫలితాన్ని నమ్మను. కేవలం నా చేతుల్లో ఉన్న ప్రక్రియను మాత్రమే నమ్ముతాను. ఫలితం గురించి ఆలోచిస్తూ అనవసరంగా ఒత్తిడికి గురికాను. ఒకసారి మ్యాచ్‌ అయిపోయాక అద్దంలో చూసుకుని, అత్యుత్తమంగా ప్రయత్నించానని నాకు నేను చెప్పుకుంటే అప్పుడు నేను ఫలితాన్ని అంగీకరించగలను' అని ధోని తెలిపాడు.

పిల్లలు హెలికాప్టర్ షాట్ ఆడొద్దు

హెలికాప్టర్‌ షాట్‌ ఆడే క్రమంలో గాయమయ్యే అవకాశముందని, పిల్లలు ఆ షాట్‌ ఆడొద్దని ధోని కోరాడు. 'రోడ్లపై టెన్నిస్‌ బంతితో ఆడుతూ నేను నేర్చుకున్న షాట్‌ అది. అది చాలా కష్టమైంది. టెన్నిస్‌ బంతి అయితే పూర్తిగా బ్యాటు కింది భాగం తగిలినా ఎంతో దూరం వెళ్తుంది. మామూలు క్రికెట్లోనైతే బంతి.. బ్యాట్ మధ్య భాగంలో తగలాలి' అని ధోని అన్నాడు.

ఆ షాట్ ఆడాలంటే బాగా కష్టపడాలి

'కాబట్టి ఆ షాట్‌ బాగా ఆడడం రావాలంటే చాలా కష్టపడాలి. గాయపడే అవకాశం ఉన్నందున చిన్నారులు హెలికాప్టర్‌ షాట్‌ ఆడొద్దనే కోరుకుంటున్నా' అని ధోని చెప్పాడు. కెప్టెన్‌గా 2007 టీ20 వరల్డ్ కప్, 2011 వరల్డ్ కప్‌లు గెలిచిన ధోని కివీస్‌తో రాజ్‌కోట్ వేదికగా జరిగిన రెండో టీ20లో కోహ్లీతో కలిసి దూకుడుగా ఆడటంలో విఫలమయ్యాడు.

ధోని టీ20 భవిష్యత్తుపై ప్రశ్నలు

దీంతో ఈ మ్యాచ్‌లో భారత్‌ 40 పరుగుల తేడాతో ఓటమి పాలైంది. ఈ నేపథ్యంలో ధోని టీ20 భవిష్యత్తుపై ప్రశ్నలు మొదలయ్యాయి. ఇదిలా ఉంటే 2014లో ఆస్ట్రేలియా పర్యటన సందర్భంగా టెస్టు క్రికెట్‌‌కు వీడ్కోలు పలికిన ధోని.. 2016లో పరిమిత ఓవర్ల కెప్టెన్సీ నుంచి తప్పుకున్న సంగతి తెలిసిందే.