ధోని ఐపీఎల్ రిటైర్మెంట్‌పై సీఎస్కే సీఈఓ సంచలనం!

MS Dhoni: 2026 ఐపీఎల్‌కు ముందు ఎంఎస్ ధోని భవిష్యత్తు గురించి మరోసారి పెద్ద ఎత్తున ఊహాగానాలు మొదలయ్యాయి. 2020లో అంతర్జాతీయ క్రికెట్ నుంచి రిటైర్మెంట్ తీసుకున్నప్పటి నుంచి ప్రతి సీజన్‌లో మాదిరిగానే 2026 వేలం, ఆటగాళ్ల రిటెన్షన్, విడుదల చేసిన ఆటగాళ్ల జాబితాకు ముందు ఎంఎస్ ధోని మళ్లీ సీఎస్కే(చెన్నై సూపర్ కింగ్స్) తరఫున ఆడతాడా లేదా అనే ప్రశ్న తలెత్తింది. ఈ క్రమంలో చెన్నై సూపర్ కింగ్స్ సీఈవో 19వ సీజన్ ప్లాన్ గురించి కీలక విషయాలు వెల్లడించారు.

ప్రస్తుతం 44 ఏళ్ల వయస్సుతో ఎంఎస్ ధోని లీగ్‪లో అత్యంత పెద్ద వయస్కుడిగా నిలిచాడు. లీగ్‌లో ఆడిన వారిలో మూడో అత్యంత పెద్ద వయస్కుడిగా ఉన్నాడు. గత సీజన్‌లో సీఎస్కే జట్టు పేలవమైన ఓటముల తర్వాత ధోని తిరిగి వస్తాడా అనే దానిపై ఉత్కంఠ పెరిగింది. రెగ్యులర్ కెప్టెన్ రుతురాజ్ గైక్వాడ్ సీజన్ మధ్యలో గాయం కారణంగా దూరమవ్వడంతో ఐదుసార్లు ఛాంపియన్ అయిన సీఎస్కే చరిత్రలో మొదటిసారిగా పట్టికలో చివరి స్థానంలో నిలిచింది. దీనికి చాలా వరకు ధోని నాయకత్వం వహించాడు.

ఎంఎస్ ధోని భవిష్యత్తు ఖరారు
ఫ్రాంఛైజీ రిలీజ్ చేసే ఆటగాళ్ల జాబితాను ప్రకటించడానికి కేవలం 10 రోజులు మాత్రమే మిగిలి ఉండగా.. సీఎస్కే సీఈఓ కాశీ విశ్వనాథ్ ఎంఎస్ ధోని గురించి కీలక విషయాలను ధ్రువీకరించారు. ధోని రిటైర్ కావాలని నిర్ణయించుకుంటే.. ఆయన విడుదల చేసిన ఆటగాళ్ల జాబితాలో ఉంటాడనడంలో సందేహం లేదు. ఎందుకంటే ఫ్రాంఛైజీ సాలరీ క్యాప్‌ను ఖాళీ చేసి, ఆయనకు ప్రత్యామ్నాయాన్ని కనుగొనడానికి తమ వేలం పర్స్‌కు జోడించుకోవాలనుకుంటుంది. అయితే విశ్వనాథ్ ధోని 2026 ఐపీఎల్ ఆడతాడని ధ్రువీకరించారు. ప్రొవోక్ లైఫ్‌స్టైల్‌తో వారి ఇన్‌స్టాగ్రామ్ అకౌంట్‌లో జరిగిన ఓ సంభాషణలో.. ఒక పిల్లవాడు సీఎస్కే సీఈఓను 'ధోని రిటైర్ అవుతాడా?' అని అడిగాడు. దానికి ఆయన.. 'లేదు, ధోని ఈ ఐపీఎల్‌కు రిటైర్ కావడం లేదు' అని సమాధానం ఇచ్చారు. ఇంతలో ధోని ఎప్పుడు రిటైర్ అవుతాడని అడిగిన మరొక ప్రశ్నకు ఆయన.. 'నేను ఆయన్ను అడిగి మీకు తిరిగి తెలియజేస్తాను' అని బదులిచ్చారు.

తన భవిష్యత్తు గురించి ఎంఎస్ ధోని ఏమన్నాడు?
ఎంఎస్ ధోనీ ఐపీఎల్ 2025 ముగిసిన అనంతరం తన మనసులోని మాటను బయటపెట్టిన సంగతి తెలిసిందే. తన శరీరం ఎలా సహకరిస్తుందనే దానిపై ఆధారపడి నిర్ణయం తీసుకుంటానని ఆయన అప్పుడు చెప్పారు. సీఎస్కే సీజన్ చివరి మ్యాచ్ తర్వాత ధోని ఈ వ్యాఖ్యలు చేశారు. ఆ తర్వాత ఎంఎస్ ధోని తన భవిష్యత్తు గురించి మౌనంగా ఉన్నారు. హర్షా భోగ్లేతో జరిగిన సంభాషణలో ధోని ఇలా అన్నాడు: "అది పరిస్థితిపై ఆధారపడి ఉంటుంది. మళ్లీ అదే చెబుతాను - నిర్ణయం తీసుకోవడానికి నాకు నాలుగు లేదా ఐదు నెలలు సమయం ఉంది. ఏమి చేయాలి అనే దాని గురించి నిర్ణయం తీసుకోవడానికి తొందరేమీ లేదు. నేను అయిపోయాను అని చెప్పడం లేదు, అదే సమయంలో నేను తిరిగి వస్తున్నానని కూడా చెప్పడం లేదు." అని ధోని అన్నారు.