ధోని మార్గనిర్దేశకుడి పాత్రను సరిగ్గా పోషించాడు: ట్విట్టర్‌లో ప్రశంసల వర్షం

హైదరాబాద్: ఆసీస్ గడ్డపై టీమిండియా తొలిసారి 2-1 తేడాతో ద్వైపాక్షిక సిరీస్‌ సొంతం చేసుకోవడంలో టీమిండియా మాజీ క్రికెటర్ ధోని కీలకపాత్ర పోషించాడు. వరుసగా మూడు వన్డేల్లో హాఫ్ సెంచరీలు సాధించాడు. అడిలైడ్, మెల్ బోర్న్ వేదికగా జరిగిన రెండు, మూడు వన్డేలలో జరిగిన మ్యాచ్‌ల్లో ఛేదనలో రెండు సార్లు అజేయంగా నిలిచాడు.

పరుగులు తీయడం కష్టంగా ఉన్న పిచ్‌పై ముందుగా పాతుకుపోయాడు. దీంతో ఆసీస్ గడ్డపై సిరీస్ ఓటమి చవిచూడని మొదటి పర్యాటక జట్టుగా భారత్ అరుదైన రికార్డును సొంతం చేసుకుంది. దిగ్గజ కెప్టెన్లుగా పేరుగాంచిన గవాస్కర్, కపిల్‌దేవ్, గంగూలీ, ధోనీకి సాధ్యంకాని ఫీట్‌ను ప్రస్తుతం కెప్టెన్ కోహ్లీ అందిపుచ్చుకున్నాడు.

శుక్రవారం ఆసీస్‌తో జరిగిన ఆఖరిదైన మూడో వన్డేలో టీమిండియా 7 వికెట్ల తేడాతో విజయం సాధించడంలో కీలకపాత్ర పోషించాడు. ఆసీస్ నిర్దేశించిన 231 పరుగుల లక్ష్యాన్ని టీమిండియా మరో నాలుగు బంతులు మిగిలుండగానే విజయం సాధించింది. ధోని( 87 నాటౌట్), కేదార్ జాదవ్(61 నాటౌట్) అజేయ హాఫ్ సెంచరీలతో చిరస్మరణీయ విజయాన్ని కట్టబెట్టారు.

కేదార్‌ జాదవ్‌తో కలిసి నాలుగో వికెట్‌కు ధోని 121 పరుగుల అజేయ భాగస్వామ్యం అందించాడు. అంతకముందు తొలుత బ్యాటింగ్ చేసిన ఆస్ట్రేలియా 48.4 ఓవర్లలో 230 పరుగులకు ఆలౌటైంది. ఈ మ్యాచ్‌లో విజయం సాధించడంతో 2011 తర్వాత ధోని 'మ్యాన్‌ ఆఫ్ ది సిరీస్‌' అందుకున్నాడు. సిరీస్‌ విజయం సాధించడంతో ధోని, టీమిండియాపై ప్రశంసల జల్లు కురుస్తోంది.