హోవ్ (సస్సెక్స్ ) : ఇంగ్లండ్ తో జరగనున్న వన్ డే అంతర్జాతీయ (ఒడిఐ) క్రికెట్ మ్యాచ్ లలో ఓపెనర్ గౌతమ్ గంభీర్ పాల్గొనడంపై నెలకొన్న అనిశ్చితి దాదాపుగా తొలగిపోయింది. గంభీర్ ఐదు మ్యాచ్ ల ఒడిఐ సీరీస్ కు ఫిట్ కావచ్చునని భారత జట్టు మేనేజర్ శివలాల్ యాదవ్ బుధవారం హోవ్ లో సూచించారు. గంభీర్ పై జరిపిన ఎంఆర్ ఐ స్కాన్ లో అవాంఛిత సమస్య ఏదీ బయటప డలేదని, దీనితో వచ్చే నెల ఒడిఐ సీరీస్ లో అతను పాల్గొనే అవకా శాలు మెరుగయ్యాయని యాదవ్ చెప్పారు. అయితే, గురువారం సస్సెక్స్ తో జరగనున్న ప్రాక్టీస్ గేమ్ లో అతను ఆడకపోవచ్చునని మేనేజర్ సూచించారు.ఎంఆర్ ఐ స్కాన్ అనంతరం గంభీర్ అందుబాటులో ఉండడంపై ఊహాగానాలకు తెర పడినప్పటికీ అతను బుధవారం తన సహచరులతో కలసి ప్రాక్టీస్ చేయడానికి మైదానానికి రాలేదు. మరొక ఓపెనర్ వీరేంద్ర సెహ్వాగ్ ఐదు వన్ డే మ్యాచ్ లలోను, ఒక ట్వంటీ20 మ్యాచ్ లోను ఆడే అవకాశం లేక పోవడంతో జట్టు వ్యూహంలో గంభీర్ పాత్ర కీలకంగా మారింది. ఇటీవల లండన్ ఓవల్ మైదానంలో నాలుగవ టెస్ట్ లో ఇంగ్లండ్ బ్యాట్స్ మన్ కెవిన్ పీటర్సన్ కొట్టిన బంతిని పట్టుకోవడానికి మిడాన్ లో ఉన్న గంభీర్ వెనుకకు పరుగెత్తుతూ కింద పడినప్పుడు గంభీర్ తల మొద్దుబారిపోయింది. గంభీర్ వెల్లకితలా పడినప్పుడు అతని తల గట్టిగా నేలకు తగల డంతో ఆ క్యాచ్ కూడా చేజారిపోయింది. వాస్తవానికి ప్రస్తుత సీరీస్ ఒకవిధంగా గంభీర్ కు దురదృష్ట కరమైనది. ఇక ఇది ఇలా ఉంటే ఇంగ్లండ్ తో టెస్ట్ సీరీస్ లో 0-4 పరాభవంతో ఆత్మ విశ్వాసం కుంచించుకుపోయిన భారత క్రికెట్ జట్టు రానున్న ఒడిఐ మ్యాచ్ లకు ముందుగా ముమ్మరంగా ఫీల్డింగ్ , బ్యాటింగ్ ప్రాక్టీస్ సాగించింది. గాయపడిన ఓపెనర్ గౌతమ్ గంభీర్ , టెస్ట్ సీరీస్ లో భారత అత్యుత్తమ క్రీడాకారుడు రాహుల్ ద్రావిడ్ మినహా మిగిలిన ఒడిఐ జట్టు సభ్యులందరూ బుధవారం ఉదయం హోవ్ లో ప్రాక్టీస్ సెషన్ లో పాల్గొన్నారు. భారత క్రికెటర్లు వివిధ రీతులలో క్యాచ్ లతో సహా ఉధృతంగా ఫీల్డింగ్ డ్రిల్ లో పాల్గొన్నారు. ఫీల్డర్లు బౌండరీ లైన్ వద్ద నిలబడి ఎక్కువ ఎత్తులో వచ్చిన బంతులను పట్టుకొనే ప్రయత్నం చేయడం ఆసక్తిదాయకంగా ఉంది. భారత జట్టు సారథి మహేంద్ర సింగ్ ధోని ఈ క్యాచింగ్ డ్రిల్ లో పాల్గొనలేదు. అయితే, అతను నెట్స్ లో కొంత సేపు బ్యాట్ తో ప్రాక్టీస్ చేశాడు. సురేష్ రైనా, రోహిత్ శర్మ, విరాట్ కోహ్లి కూడా బ్యాటింగ్ ప్రాక్టీస్ చేశారు. మునాఫ్ పటేల్ , వినయ్ కుమార్ , ప్రవీణ్ కుమార్ బౌలింగ్ ను వారు ఎదుర్కొన్నారు. భారత కోచ్ డంకన్ ఫ్లెచర్ బౌలింగ్ కోచ్ ఎరిక్ సిమ్మన్స్ తో కలసి నెట్స్ వెనుక నిలబడి ఈ ప్రాక్టీస్ ను గమనించారు. బ్యాట్స్ మన్ లలో రోహిత్ శర్మ ఎక్కువ ఆకట్టుకున్నాడు. #13;