Click it and Unblock the Notifications
నా కల నిజమైంది
ఈ సందర్భంగా మహమ్మద్ సిరాజ్ మీడియాతో మాట్లాడుతూ 'భారత జట్టులో చోటు దక్కించుకోవాలన్న నా కల నిజమైంది. భవిష్యత్తులో ఎప్పుడైనా ఆడతానని నమ్మాను కానీ ఇంత తొందరగా ఎంపికవుతానని అసలు ఏమాత్రం ఊహించలేదు. నేనెంత సంతోషంగా ఉన్నానో మాటల్లో చెప్పలేను. ఈ విషయం చెప్పినప్పుడు నా తల్లిదండ్రులు ఉద్వేగంతో ఏమీ మాట్లాడలేకపోయారు' అని సిరాజ్ అన్నాడు.
రంజీ ట్రోఫీ ప్రదర్శన కారణం
'ఈరోజు ఈ స్ధాయిలో ఉండటానికి ఐపీఎల్ కంటే రంజీ ట్రోఫీ ప్రదర్శన కారణం అని అనుకుంటున్నా. రంజీ ట్రోఫీలో ప్రదర్శనతోనే ఈ స్థితికి చేరుకున్నా. గత సీజన్లో తీసిన 41 వికెట్లు నాలో ఆత్మవిశ్వాసాన్ని నింపాయి. రంజీలో సత్తాచాటడంతో రెస్టాఫ్ ఇండియాకు ఎంపిక చేశారు. అన్ని రకాలుగా నా ఆటను తీర్చిదిద్దిన భరత్ అరుణ్ సార్కు రుణపడి ఉంటాను' అని సిరాజ్ తెలిపాడు.
కోచ్ భరత్ అరుణ్ సార్ సూచనల వల్లే
'భారత జట్టు బౌలింగ్ కోచ్ భరత్ అరుణ్ సార్ సూచనలు నాకెంతో పనికొచ్చాయి. గతేడాది భరత్ సార్ హైదరాబాద్ జట్టుతో ఉండడం నాకు చాలా కలిసొచ్చింది. అత్యున్నత స్థాయిలో రాణించాలంటే ఎలా బౌలింగ్ చేయాలన్నదానిపై అతనెంతో విలువైన సూచనలిచ్చారు. అతనిచ్చిన సలహాలు ఐపీఎల్ సందర్భంగా నాకెంతో తోడ్పడ్డాయి' అని సిరాజ్ పేర్కొన్నాడు.
సహజశైలిని మార్చుకోవాల్సిన అవసరం లేదని ద్రవిడ్ అన్నారు
'ఐపీఎల్లో సన్రైజర్స్కు ఆడినప్పుడు భువనేశ్వర్ భాయ్ ఎంతో ప్రోత్సహించాడు. ఇటీవల ‘ఎ' పర్యటనల్లో నా సహజశైలిని మార్చుకోవాల్సిన అవసరం లేదని కోచ్ ద్రవిడ్ సార్ సూచించారు. ఇప్పటివరకు ఎలా బౌలింగ్ చేశావో ఇక నుంచీ అలాగే బౌలింగ్ వేయమని ద్రవిడ్ సార్ చెప్పడం ఎంతో సంతోషం కలిగించింది' అని సిరాజ్ తెలిపాడు.
అమ్మానాన్నలు ఎంతో కష్టపడ్డారు
'నా కెరీర్ కోసం అమ్మానాన్నలు ఎంతో కష్టపడ్డారు. ఇప్పుడు వాళ్ల కష్టానికి ఫలితం దక్కింది. ఐపీఎల్కు ఎంపికైనప్పుడు కొంతమేరకు నా ఆర్థిక కష్టాలు తీరిపోయాయి. ఇప్పుడు జాతీయ జట్టులో చోటు దక్కడంతో నా ఆనందానికి అవధుల్లేవు. ఇప్పుడిప్పుడే కెరీర్లో సెటిలవుతున్నా' అని సిరాజ్ అన్నాడు.
సొంతిల్లు కట్టుకుంటున్నా
'నాన్నను ఆటో నడుపొద్దని ఐపీఎల్కు ఎంపికైనప్పుడే ఒట్టు వేయించుకున్నా. నాన్న ఆ మాట మీదే నిలబడ్డాడు. అమ్మానాన్నలు ఇకనుంచి ఎలాంటి కష్టాలు పడనీయరాదని నిర్ణయించుకున్నా. ఈ దశలో వాళ్లు హాయిగా ఉండాలనుకుంటున్నాను. ఇన్నాళ్లూ అద్దె ఇంట్లో ఉన్నాం. ఇప్పుడు సొంతిల్లు కట్టుకుంటున్నా' అని చెప్పాడు.
Continue with Google