అవకాశం వస్తే పీఎస్ఎల్‍ను వదిలేసి ఐపీఎల్‌లో ఆడతా: పాక్ క్రికెటర్

Mohammad Amir: పాకిస్థాన్ మాజీ ఫాస్ట్ బౌలర్ మహమ్మద్ ఆమిర్ చేసిన ప్రకటన పాకిస్థాన్ క్రికెట్ అభిమానులకు నచ్చకపోవచ్చు. ఐపీఎల్‌లో ఆడే అవకాశం వస్తే ఈ లీగ్‌లో కచ్చితంగా పాల్గొనాలని కోరుకుంటున్నానని ఆమిర్ చెప్పాడు. తాను మొదట ఇండియన్ ప్రీమియర్ లీగ్‌కు ఎంపికైతే పాకిస్థాన్ సూపర్ లీగ్‌ను విస్మరిస్తానని కూడా ఆమిర్ చెప్పుకొచ్చాడు. ఐపీఎల్ లో ఆడాలనే కోరికను ఆమిర్ ఇప్పటికే వ్యక్తం చేశాడు.

ఐపీఎల్‌లో ఆడడానికి ఆసక్తిగా చూపిస్తోన్న ఆమిర్
పాకిస్థాన్ న్యూస్ ఛానల్ జియోతో మహమ్మద్ ఆమిర్ మాట్లాడుతూ .."నిజాయితీగా చెప్పాలంటే నాకు ఆడే అవకాశం వస్తే నేను ఖచ్చితంగా ఐపీఎల్‌లో ఆడతాను. నేను ఈ విషయాన్ని బహిరంగంగా చెబుతున్నాను. నాకు అవకాశం రాకపోతే నేను పీఎస్ఎల్‌లో మాత్రమే ఆడతాను. వచ్చే ఏడాది నాటికి నాకు ఐపీఎల్‌లో ఆడే అవకాశం వస్తే నేను ఎందుకు ఆడను? నేను ఖచ్చితంగా ఐపీఎల్‌లో పాల్గొంటాను. వచ్చే ఏడాది ఐపీఎల్, పీఎస్ఎల్ షెడ్యూళ్ల మధ్య ఘర్షణ ఉంటుందని నేను అనుకోను." అని మహమ్మద్ ఆమిర్ చెప్పుకొచ్చాడు. ఈ ఏడాది ఛాంపియన్స్ ట్రోఫీ సందర్భంగా ఆమిర్ ఐపీఎల్ ఆడాలనే కోరికను వ్యక్తం చేశాడు.

మాజీ ఫాస్ట్ బౌలర్ ఇంకా మాట్లాడుతూ.. "నేను పీఎస్ఎల్‌లో ముందుగా ఎంపికైతే.. నేను దాని నుంచి నా పేరును ఉపసంహరించుకోలేను. ఎందుకంటే అప్పుడు నేను టోర్నమెంట్ లో ఆడవలసి ఉంటుంది. నేను ఐపీఎల్‌లో ముందుగా ఎంపికైతే ఆ లీగ్ నుంచి కూడా నా పేరును ఉపసంహరించుకోను. ఇప్పుడు నేను ముందుగా ఎంపిక చేయబడిన లీగ్ పై ఆధారపడి ఉంటుంది. ఐపీఎల్ వేలం ముందుగా జరిగి నన్ను కొనుగోలు చేస్తే నేను పీఎస్ఎల్‌లో ఆడను. పాకిస్థాన్ సూపర్ లీగ్ డ్రాఫ్ట్ ముందుగా జరిగి నేను ఎంపికైతే ఈ టోర్నమెంట్ నుంచి నా పేరును ఉపసంహరించుకోలేను." అని అన్నాడు.