వార్న్ చెప్పింది వింటే రిటైర్మెంట్ ఇవ్వాల్సిందే!!

తరచూ గాయాల పాలవుతూ లయ కోల్పోయాడని

టీమిండియాతో టెస్టు సిరీస్‌ సందర్భంగానూ స్టార్క్‌పై వార్న్‌ విమర్శలు చేశాడు. తరచూ గాయాల పాలవుతుండటంతో అతడు లయ కోల్పోయాడని అన్నాడు. దీనిపై స్టార్క్‌ మీడియాతో మాట్లాడాడు. అతడి మాటలు వింటూ పోతే క్రికెట్‌కు వీడ్కోలు పలకాల్సిందే అని పేర్కొన్నాడు. ‘అతడేమన్నాడో నాకు తెలియదు. ఆయన మాటల గురించి నాకు చెబుతున్నారు. వార్న్‌ మాటలు వింటూ పోతే నేనిక రిటైర్‌ కావాల్సిందే. నా సామర్థ్యాలను మెరుగుపరుచుకుంటూ వెళ్తాను' అని స్టార్క్‌ అన్నాడు. టీమిండియాతో తొలి టెస్టులో 5, పెర్త్‌ టెస్టులో 3 వికెట్లు తీశాడు.

మురళీ విజయ్ తొలి వికెట్‌ను డక్ అవుట్‌గా

రెండో టెస్టు తొలి ఇన్నింగ్స్‌లో 79 పరుగులు ఇచ్చి 2 వికెట్లు తీశాడు. మురళీ విజయ్ తొలి వికెట్‌ను డక్ అవుట్‌గా పంపించాడు. మ్యాచ్‌కు ముందు కెప్టెన్ టిమ్ పైనె మాట్లాడుతూ.. రెండో టెస్టులో స్టార్క్ అద్భుతాలు సృష్టిస్తాడంటూ తెలిపినా మురళీ విజయ్ అవుట్ మినహాయించి ఆశించినంత మేర రాణించలేకపోయాడు.

కోహ్లీని ప్రశంసలతో ముంచెత్తుతూ

అయితే ఆదివారం జరిగిన మ్యాచ్‌లో పెర్త్ వేదికగా విరాట్ కోహ్లీ రెచ్చిపోయి సెంచరీ బాదిన సంగతి తెలిసిందే. దీంతో కోహ్లీపై ప్రశంసల వర్షం కురిపించాడు. నాలుగు టెస్టు మ్యాచ్‌ల సిరీస్‌లో మరెవ్వరూ ఆడలేనంత దూకుడును ప్రదర్శించి క్రీజులో నిలబడ్డాడు. ఈ విషయంపై స్పందించిన షేన్ వార్న్ పొగడ్తలతో ముంచెత్తాడు. 'విరాట్ కోహ్లీకి అభినందనలు. అద్భుతమైన సెంచరీని బాదాడు. అంతర్జాతీయ క్రికెట్‌లో ఈ గ్రహంపైన ఇంతబాగా రాణించగల మరో క్రికెటర్ లేడు. అది చూసి చాలా ఎంజాయ్ చేశాను' అంటూ ట్వీట్ ద్వారా తన ఆనందాన్ని పంచుకున్నాడు.