Missing this little one: ధోని, జీవా త్రోబాక్ ఫోటోను పోస్ట్ చేసిన హార్దిక్ పాండ్యా

సోషల్ మీడియాలో ఫోటో వైరల్

ఈ ఫోటో ప్రస్తుతం సోషల్ మీడియాలో వైరల్ అయింది. ధోని, జీవాలతో కలిసి ఉన్న ఫోటోని పాండ్యా పోస్టు చేయడం ఇదే మొదటిసారి కాదు. గతంలో ఈ ముగ్గురూ స్విమ్మింగ్ పూల్‌లో ఉన్న ఫోటోని కూడా హార్ధిక్ పాండ్యా తన ట్విట్టర్‌లో పోస్టు చేసిన సంగతి తెలిసిందే. అందులో జీవా కలర్‌పుల్ స్విమ్మింగ్ కాస్ట్యూమ్‌ను ధరించింది.

గతంలో స్విమ్మింగ్ పూల్‌ ఫోటో

ఈ క్రమంలో జీవాకు ధోని స్విమ్మింగ్ ఎలా చేయాలో నేర్పుతుంటే సంతోషంగా కనిపించింది. ఇంగ్లాండ్ వేదికగా వరల్డ్‌కప్ ముగిసిన తర్వాత తొలుత భారత ఆర్మీకి సేవలందించేందుకు గాను ధోని విండిస్ పర్యటనకు దూరమయ్యాడు. ఆ తర్వాత సొంతగడ్డపై జరిగిన దక్షిణాఫ్రికాతో జరిగిన మూడు టీ20 సిరీస్‌కు కూడా అందుబాటులో లేడు.

బంగ్లా సిరిస్‌కు ఎంపిక కాని ధోని

నవంబర్ 3 నుంచి బంగ్లాతో జరిగే టీ20 సిరీస్‌కు ఎంపిక చేసిన భారత జట్టులో కూడా ధోనీకి చోటు దక్కలేదు. వచ్చే జనవరిలో ధోని పూర్తి ఫిట్‌నెస్‌తో సెలక్షన్ కమిటీకి అందుబాటులోకి రానున్నట్లు తెలుస్తోంది. ఇప్పటికే ధోని తన ట్రైనింగ్‌ను ప్రారంభించాడు. ఇందులో భాగంగా జిమ్‌లో ధోని కసరత్తులు చేసినట్లుగా తెలుస్తోంది. పూర్తి స్థాయి ఫిట్‌నెస్‌ అందుకోవడానికి జార్ఖండ్‌ అండర్‌-23 జట్టుతో కలిసి ధోని ప్రాక్టీస్ చేయనున్నాడు.

పాండ్యాకు లండన్‌లో వెన్నునొప్పి శస్త్రచికిత్స

ఇటీవలే పాండ్యాకు లండన్‌లో వెన్నునొప్పి శస్త్రచికిత్స జరిగిన సంగతి తెలిసిందే. శస్త్రచికిత్స అనంతరం డాక్టర్స్‌, ట్రైనర్స్‌ సమక్షంలో త్వరగా కోలుకోవడానికి ప్రయత్నిస్తున్నాడు. ఇటీవలే పాండ్యా తన ట్విట్టర్‌లో ఓ వీడియోని పోస్టు చేసి "బేబి స్టెప్... పూర్తి ఫిట్‌నెస్‌ సాధించడానికి నా ప్రయాణం మొదలైంది. నేను త్వరగా కోలుకోవాలని ఆకాంక్షించిన ప్రతీ ఒక్కరికి ధన్యవాదాలు" అంటూ కామెంట్ పెట్టాడు.