IND vs AFG: అరంగేట్ర మ్యాచ్‌లోనే దుమ్మురేపిన భారత క్రికెటర్!

IND vs AFG: ముల్లాన్‌పూర్ వేదికగా ఆఫ్ఘనిస్థాన్‌తో జరుగుతున్న ఏకైక చారిత్రాత్మక టెస్ట్ మ్యాచ్‌లో భారత్‌కు చెందిన 23 ఏళ్ల యువ ఆల్‌రౌండర్ మానవ్ సుతార్ అద్భుత అరంగేట్రం చేశాడు. రాజస్థాన్‌కు చెందిన ఈ యువ ప్లేయర్ అంతర్జాతీయ క్రికెట్‌లో తను వేసిన మొదటి ఓవర్లోనే వికెట్ పడగొట్టి సంచలనం సృష్టించాడు. అంతకుముందు భారత తొలి ఇన్నింగ్స్‌లో బ్యాట్‌తో విలువైన పరుగులు జోడించిన మానవ్ సుతార్.. ఆ తర్వాత కెప్టెన్ శుభ్‌మన్ గిల్ తన చేతికి బంతిని ఇవ్వగానే తన స్పిన్ మాయాజాలాన్ని ప్రదర్శించడానికి అస్సలు సమయం తీసుకోలేదు.

ఆఫ్ఘనిస్థాన్ రెండో ఇన్నింగ్స్ ఆరో ఓవర్లో కెప్టెన్ శుభ్‌మన్ గిల్ బంతిని లెఫ్టార్మ్ స్పిన్నర్ మానవ్ సుతార్‌కు అప్పగించాడు. ఆ ఓవర్ నాలుగో బంతికే ఆఫ్ఘన్ ఓపెనర్ అబ్దుల్ మాలిక్.. సుతార్ వేసిన స్పిన్ బంతిని భారీ షాట్ ఆడేందుకు ప్రయత్నించి దొరికిపోయాడు. అబ్దుల్ మాలిక్ క్రీజులో పక్కకు జరిగి స్వీప్ షాట్ ఆడేందుకు ప్రయత్నించగా.. బంతి బ్యాట్ పైభాగాన్ని తాకుతూ గాల్లోకి లేచింది. ఈ క్రమంలో స్లిప్ నుంచి కేఎల్ రాహుల్, బ్యాక్‌వర్డ్ స్క్వేర్ లెగ్ నుంచి మహ్మద్ సిరాజ్ ఇద్దరూ క్యాచ్ అందుకోవడానికి పరిగెత్తారు. ఇద్దరి మధ్య చిన్నపాటి గందరగోళం జరిగేలా కనిపించినా.. సిరాజ్ బంతిపైనే దృష్టి పెట్టి అద్భుతమైన లో-క్యాచ్‌ను అందుకున్నాడు.

ఈ విధంగా మానవ్ సుతార్ తన అంతర్జాతీయ కెరీర్‌లో మొదటి చారిత్రాత్మక టెస్ట్ వికెట్‌ను ఖాతాలో వేసుకున్నాడు. వికెట్ పడగానే వికెట్ కీపర్ రిషబ్ పంత్ అందరికంటే ముందుగా పరిగెత్తుకుంటూ వచ్చి సుతార్‌ను గట్టిగా కౌగిలించుకుని అభినందించాడు. అంతకుముందు బ్యాటింగ్‌లోనూ సుతార్ 28 పరుగులతో రాణించి భారత్ భారీ స్కోరు సాధించడంలో తన వంతు పాత్ర పోషించాడు. మొత్తానికి అరంగేట్రం మ్యాచ్‌లోనే అటు బ్యాట్‌తో, ఇటు బంతితో మెరిసి మానవ్ సుతార్ అందరి దృష్టిని ఆకర్షించాడు. మళ్లీ వెంటనే రెండో వికెట్ కూడా సంపాదించడం విశేషం. 19.2వ ఓవర్లో ఆఫ్ఘన్ స్టార్ బ్యాటర్ రహ్మానుల్లా గుర్బాజ్‌ను ఔట్ చేశాడు. గుర్బాజ్ మానవ్ సుతార్ వేసిన బంతిని గాల్లోకి లేపగా.. సాయి సుదర్శన్ క్యాచ్ పట్టడంతో పెవిలియన్ చేరాడు.

ముల్లాన్‌పూర్‌ వేదికగా ఆఫ్ఘనిస్థాన్‌తో జరుగుతున్న ఏకైక టెస్ట్ మ్యాచ్‌లో టీమిండియా భారీ స్కోరు సాధించింది. మ్యాచ్ రెండో రోజైన ఆదివారం(జూన్ 7) భారత్ తన తొలి ఇన్నింగ్స్‌ను 8 వికెట్ల నష్టానికి 564 పరుగుల వద్ద డిక్లేర్ చేసింది. కెప్టెన్ శుభ్‌మన్ గిల్(126), కేఎల్ రాహుల్(100) అద్భుత సెంచరీలతో కదం తొక్కగా.. మిగతా బ్యాటర్లు కూడా రాణించడంతో టీమిండియా పటిష్ట స్థితికి చేరుకుంది.