LSG vs SRH: లక్నో ఔట్.. మ్యాచ్ టర్నింగ్ పాయింట్ అదే!

LSG vs SRH: సన్‌రైజర్స్ హైదరాబాద్ ఆటగాళ్లు అభిషేక్ శర్మ 20 బంతుల్లో 59 పరుగులు, హెన్రిచ్ క్లాసెన్(28 బంతుల్లో 47), కమిందు మెండిస్(21 బంతుల్లో 32), ఇషాన్ కిషన్(28 బంతుల్లో 35) అద్భుతంగా రాణించడంతో ఎస్ఆర్‌హెచ్ సోమవారం జరిగిన ఐపీఎల్ మ్యాచ్‌లో లక్నో సూపర్ జెయింట్స్‌ను 6 వికెట్ల తేడాతో ఓడించింది. ఈ ఓటమితో లక్నో సూపర్ జెయింట్స్ ప్లేఆఫ్ రేసు నుంచి నిష్క్రమించింది. 12 మ్యాచ్‌ల్లో లక్నోకు ఇది ఏడో ఓటమి. ఆ జట్టు 10 పాయింట్లతో పాయింట్ల పట్టికలో ఏడో స్థానంలో ఉంది. 12 మ్యాచ్‌ల్లో నాలుగో విజయంతో సన్‌రైజర్స్ హైదరాబాద్ ఎనిమిదో స్థానంలో ఉంది. ముందుగా బ్యాటింగ్‌కు దిగిన లక్నో సూపర్ జెయింట్స్ 7 వికెట్ల నష్టానికి 205 పరుగుల భారీ స్కోరు చేసింది.

కానీ సన్‌రైజర్స్ హైదరాబాద్18.2 ఓవర్లలో నాలుగు వికెట్లు కోల్పోయి లక్ష్యాన్ని చేరుకుంది. లక్ష్యాన్ని ఛేదించే జట్టు 200 కంటే ఎక్కువ పరుగులు చేసి గెలవడం ఈ మైదానంలో ఇదే తొలిసారి. ఒకే ఒక్క ఓవర్ ఈ మ్యాచ్ కు టర్నింగ్ పాయింట్‌గా మారింది. మ్యాచ్ లక్నో చేతుల్లోంచి పూర్తిగా చేజారిపోయి సన్‌రైజర్స్ హైదరాబాద్ చేతుల్లోకి వెళ్లింది.

ఒకే ఓవర్లో 26 పరుగులు
సన్‌రైజర్స్ హైదరాబాద్ ఇన్నింగ్స్‌లో లక్నో సూపర్ జెయింట్స్ లెగ్ స్పిన్నర్ రవి బిష్ణోయ్ ఏడో ఓవర్ బౌలింగ్ చేశాడు. ఆ సమయంలో సన్‌రైజర్స్ హైదరాబాద్ బ్యాటర్లు ఇషాన్ కిషన్, అభిషేక్ శర్మ క్రీజులో ఉన్నారు. రవి బిష్ణోయ్ ఈ ఒక్క ఓవర్లోనే 26 పరుగులు సమర్పించుకున్నాడు. బిష్ణోయ్ వేసిన ఓవర్ మొదటి బంతి వైడ్ అయింది. దీని తర్వాత స్ట్రైక్‌లో ఉన్న ఇషాన్ కిషన్ డాట్ బాల్ ఆడాడు. ఆ ఓవర్లోని రెండో బంతికి సింగిల్ తీసుకుని స్ట్రైక్‌ను తిప్పాడు. అనంతరం అభిషేక్ శర్మ వరుసగా నాలుగు బంతుల్లో నాలుగు సిక్సర్లు కొట్టాడు. ఆ ఓవర్లో మూడో సిక్స్‌తో అభిషేక్ శర్మ 18 బంతుల్లో తన అర్ధశతకం పూర్తి చేసుకున్నాడు. రవి బిష్ణోయ్ వేసిన ఈ ఒక్క ఓవర్లో మొత్తం 26 పరుగులు వచ్చాయి. ఇక్కడి నుంచి ఆట పూర్తిగా హైదరాబాద్ చేతుల్లోనే ఉంది.