బీసీసీఐ అధ్యక్షుడితో ఆరోగ్యకరమైన చర్చ కోసం ఎదురు చూస్తున్నా: విరాట్ కోహ్లీ

గంగూలీ వ్యాఖ్యలపై

గురువారం ఓ కార్యక్రమానికి హాజరైన విరాట్ కోహ్లీ గంగూలీ వ్యాఖ్యలపై మాట్లాడుతూ "గంగూలీని కలవబోతున్నా. ఒక మంచి చర్చ కోసం ఎదురుచూస్తున్నా. గతంలో ఆయన ఎంతో క్రికెట్‌ ఆడారు. ఇప్పుడు మేము ఎలాంటి పరిస్థితిలో ఉన్నామో తెలుసు. భారత క్రికెట్‌, జట్టు అవసరాలేంటో తెలుసు" అని అన్నాడు.

అత్యున్నత సంభాషణ అవసరం

"ఇక్కడ చక్కని, వృత్తిపరమైన, అత్యున్నత సంభాషణ అవసరం. నేను ప్రస్తుతం ఆడుతున్నాను. ఆయన ఇంతకు ముందే ఆడారు కాబట్టి పరిస్థితులపై అవగాహన ఉంటుంది. గతంలోనూ దాదాతో చాలాసార్లు సంభాషించా. ఇప్పుడూ ఇలాగే జరుగుతుందని భావిస్తున్నా" అని విరాట్ కోహ్లీ చెప్పుకొచ్చాడు.

కోహ్లీ అద్భుతంగా నడిపిస్తున్నప్పటికీ!

టీమిండియాను విరాట్‌ కోహ్లీ అద్భుతంగా నడిపిస్తున్నాడని అయితే ఐసీసీ ట్రోఫీలు నెగ్గాల్సిన అవసరం ఉందని బీసీసీఐ అధ్యక్షుడు కాకముందు గంగూలీ అన్న సంగతి తెలిసిందే. కాగా, బుధవారం 47 ఏళ్ల గంగూలీ తనకు కోహ్లీ మరియు జట్టు అవసరాలపై సరైన అవగాహన ఉందని తన పదవీకాలంలో వాటిని నెరవేర్చడానికి కట్టుబడి ఉన్నానని చెప్పాడు.