'ఆటగాళ్లను గాడిదల్లా వాడుకుంటూ చంపేస్తున్నారు!'

ఐపీఎల్ వ్యవస్థాపకుడు, మాజీ ఛైర్మన్ లలిత్ మోదీ బీసీసీఐపై తీవ్రస్థాయిలో విరుచుకుపడ్డారు. ప్రస్తుతం కొనసాగుతున్న ఐపీఎల్ 2026 షెడ్యూలింగ్, ఆ తర్వాత భారత్ ఆడబోయే సిరీస్‌ల మధ్య తగినంత విరామం లేకపోవడాన్ని లలిత్ మోదీ దారుణమంటూ అభివర్ణించారు. బీసీసీఐ కేవలం డబ్బు సంపాదనపైనే దృష్టి పెట్టిందని.. ఆటగాళ్ల సంక్షేమాన్ని గాలికొదిలేసిందని ఆయన ఎక్స్ వేదికగా ధ్వజమెత్తారు.

గౌతమ్ గంభీర్ అసంతృప్తిపై స్పందన
టీమిండియా హెడ్ కోచ్ గౌతమ్ గంభీర్ బీసీసీఐ షెడ్యూలింగ్‌పై అసంతృప్తిగా ఉన్నట్లు వచ్చిన ఓ వార్తా కథనంపై లలిత్ మోదీ స్పందించారు. ఐపీఎల్ 2026 ఫైనల్ మే 31న ముగియనుండగా.. కేవలం ఆరు రోజుల వ్యవధిలోనే అంటే జూన్ 6 నుంచి ఆఫ్ఘనిస్థాన్‌తో ఏకైక టెస్ట్ మ్యాచ్ ప్రారంభం కానుంది. ఇంత తక్కువ సమయంలో ఆటగాళ్లు కోలుకోవడం అసాధ్యమని.. బీసీసీఐ తన ఆటగాళ్లను చంపేస్తోందని లలిత్ మోదీ విమర్శించారు. ప్లేయర్లకు వారి కుటుంబాలతో గడిపే సమయం ఇవ్వాలని.. వారిని కేవలం డబ్బు సంపాదించే యంత్రాల్లా(గాడిదల్లా) చూడటం ఆపాలని లలిత్ మోదీ హితవు పలికారు.

భారత్ వైఫల్యాలు.. విశ్రాంతి అవసరం
గత రెండేళ్లుగా భారత్ స్వదేశంలో టెస్ట్ క్రికెట్లో గడ్డుకాలాన్ని ఎదుర్కొంటోంది. 2024లో న్యూజిలాండ్ చేతిలో, 2025లో దక్షిణాఫ్రికా చేతిలో భారత్ వైట్‌వాష్‌కు గురైంది. ఈ ఓటముల వల్ల భారత జట్టు ప్రపంచ టెస్ట్ ఛాంపియన్‌షిప్ ఫైనల్‌కు అర్హత సాధించే అవకాశాలు కూడా దెబ్బతిన్నాయి. ఈ నేపథ్యంలో సీనియర్ ఆటగాళ్లకు విశ్రాంతి ఇవ్వాలా లేక వరుసగా మ్యాచులు ఆడించాలా అనే చర్చ జరుగుతోంది. ఇప్పటికే టెస్ట్ కెప్టెన్ శుభ్‌మన్ గిల్ ప్రతి సిరీస్‌కు ముందు 15 రోజుల సన్నాహక శిబిరం ఏర్పాటు చేయాలని బోర్డును కోరిన విషయాన్ని ఈ సందర్భంగా నిపుణులు గుర్తు చేస్తున్నారు.

బీసీసీఐకి లలిత్ మోదీ సూచనలు
బీసీసీఐ తన పనితీరును మార్చుకోవాలని లలిత్ మోదీ సూచించారు. బోర్డులో ప్రధానంగా మాజీ ఆటగాళ్లు ఉండాలని.. ఓ ప్రొఫెషనల్ సీఈవోను నియమించుకోవాలని ఆయన అన్నారు. "ఆటగాళ్ల అభివృద్ధిని సంస్థ లక్ష్యంగా పెట్టుకోవాలి. వారికి అత్యున్నత జీతాలు ఇవ్వండి. వారి మానవ వనరుల నిర్వహణపై దృష్టి పెట్టండి" అని లలిత్ మోదీ పేర్కొన్నారు. అంతేకాకుండా స్టేడియాలలో అభిమానుల అనుభవాన్ని మెరుగుపరచాలని, బోర్డు డబ్బు కంటే హృదయంతో ఆలోచించాలని వ్యాఖ్యానించారు. ప్రస్తుతానికి ఆఫ్ఘనిస్తాన్ టెస్ట్ మ్యాచ్‌కు సీనియర్ ఆటగాళ్లకు విశ్రాంతి ఇచ్చే అవకాశం ఉన్నప్పటికీ.. బీసీసీఐ బిజీ షెడ్యూల్ వల్ల ఆటగాళ్లపై పడుతున్న శారీరక, మానసిక ఒత్తిడి ఇప్పుడు క్రీడా ప్రపంచంలో చర్చనీయాంశంగా మారింది.