కోహ్లీసేనతో బిగ్‌ఫైట్: ఆ మైల్‌స్టోన్‌కు అతి చేరువగా కేఎల్ రాహుల్, డేల్ స్టెయిన్

ఆర్సీబీ వర్సెస్ కింగ్స్

కింగ్స్ ఎలెవెన్ పంజాబ్, రాయల్ ఛాలెంజర్స్ బెంగళూరు మధ్య ఐపీఎల్-2020 సీజన్‌లో ఆరో మ్యాచ్ దుబాయ్‌ వేదికగా ప్రారంభం కాబోతోంది. 13 ఎడిషన్‌లో కింగ్స్ ఎలెవెన్ పంజాబ్ ఒక మ్యాచ్‌లో ఓటమి చవి చూసింది. సూపర్ ఓవర్ దాకా మ్యాచ్‌ను తీసుకెళ్లగలిగినప్పటికీ.. భారీ లక్ష్యాన్ని నిర్దేశించలేక చతికిల పడింది. సూపర్ ఓవర్‌లో రెండు పరుగులు మాత్రమే సాధించిన తొలి మేజర్ టీమ్‌గా అవాంఛనీయ రికార్డును నెలకొల్పింది. సన్ రైజర్స్ హైదరాబాద్‌పై పైచేయి సాధించిన ఊపుతో జోరు మీదుంది కోహ్లీసేన. మరో విజయాన్ని నమోదు చేయడానికి ఉవ్విళ్లూరుతోంది.. కదం తొక్కుతోంది.

రెండు వేల క్లబ్‌కు రెండు పరుగుల దూరంలో..

ఈ మ్యాచ్‌తో కింగ్స్ ఎలెవెన్ పంజాబ్ టీమ్ కేప్టెన్ కేఎల్ రాహుల్.. ఓ మైలురాయిని అందుకోవడానికి సిద్ధంగా ఉన్నాడు. రెండు పరుగులు చేస్తే చాలు.. 2000 క్లబ్‌లో చేరతాడు. చేయాల్సింది రెండు పరుగులే కాబట్టి.. దీనిపై అనుమానాలు అనవసరం. ఆ రెండు పరుగులూ చేసేస్తే.. ఐపీఎల్‌లో 2000 క్లబ్‌లో చేరిన 20వ భారతీయ క్రికెటర్ అవుతాడు. విదేశీ క్రికెటర్ల పేర్లను కూడా పరిగణనలోకి తీసుకుంటే.. అతని నంబర్.. 32.

రెండేళ్లుగా పంజాబ్ తరఫున

ఇప్పటిదాకా ఐపీఎల్‌లో 68 మ్యాచ్‌లను ఆడాడు కేఎల్ రాహుల్. 41.62 అతని బ్యాటింగ్ యావరేజ్. స్ట్రయిక్ రేట్ మెరుగ్గా ఉంది. 137 స్ట్రయిక్ రేటును నమోదు చేశాడతను. కేఎల్ రాహుల్.. 2018లో కింగ్స్ ఎలెవెన్ పంజాబ్ టీమ్‌తో జట్టు కట్టాడు. ఈ టీమ్ తరఫున 28 మ్యాచ్‌లను ఆడాడు. 1252 పరుగులు చేశాడు. 2019లో అద్భుతంగా ఆడిన రాహుల్.. ఆ సీజన్‌లో సెంచరీ బాాదాడు. ఐపీఎల్‌లో అతని తొలి సెంచరీ అదే. బ్యాటింగ్ సగటు కూడా మెరుగుపర్చుకున్నాడు. ఆ సీజన్‌లో అతని బ్యాటింగ్ సగటు 53.90గా రికార్డయింది.

వంద వికెట్ల క్లబ్‌లో స్టెయిన్..

మరోవంక- ఫాస్ట్ బౌలర్ డేల్ స్టెయిన్ కూడా తనకంటూ ఓ మైల్‌స్టోన్‌ను అందుకోనున్నాడు. ఐపీఎల్‌లో వంద వికెట్లను పడగొట్టన బౌలర్ల జాబితాలో చేరడానికి మూడు వికెట్ల దూరంలో ఉన్నాడతను. రాయల్ ఛాలెంజర్స్ బెంగళూరు తరఫున ఆడుతోన్న స్టెయిన్‌కు ఐపీఎల్ ఫార్మట్‌లో మూడు వికెట్లను పడగొట్టడం కాస్త కష్టతరమే. ఉన్న నాలుగు ఓవర్లలో మూడు వికెట్లను పడగొట్టడం అంటే మాటలు కాదు. ఐపీఎల్‌లో వంద వికెట్ల మార్క్‌ను అందుకోవడానికి ఒకటి లేదా అంతకుమించిన మ్యాచ్‌లు అవసరం అయ్యే అవకాశాలు లేకపోలేదు.