కోహ్లీ-ఏబీడీ కలిస్తే బౌలర్లకు దబిడిదిబిడే!: ఈ మ్యాజిక్ వెనుక రహస్యమిదే!

క్రికెట్ ప్రపంచంలోనే అత్యంత విధ్వంసకరమైన జోడీల గురించి చెప్పాలంటే.. ఆర్సీబీ ప్లేయర్లు ఏబీ డివిలియర్స్, విరాట్ కోహ్లీ జోడీ గుర్తుకు వస్తుంది. 'మిస్టర్ 360'గా అభిమానుల మనసుల్లో నిలిచిపోయిన ఏబీడీ, 'కింగ్ కోహ్లీ'గా అభిమానుల గుండెల్లో కొలువై ఉన్న విరాట్.. క్రీజులో కలిస్తే బౌలర్లకు చుక్కలు కనిపించేవి. తమ 11 సీజన్ల అనుబంధంలో వారిద్దరూ క్రీజులో చూపిన మాయాజాలం మర్చిపోలేనిది. ఇటీవల ఏబీ డివిలియర్స్ ఒక పాడ్‌కాస్ట్‌లో విరాట్ కోహ్లీతో కలిసి బ్యాటింగ్ చేసిన తన అనుభవాలను పంచుకుంటూ ఆ బంధం గురించి ఎన్నో ఆసక్తికర విషయాలు వెల్లడించారు.

మరపురాని రికార్డులు.. మర్చిపోలేని భాగస్వామ్యాలు
విరాట్ కోహ్లీ, ఏబీ డివిలియర్స్ కలిసి ఐపీఎల్‌లో 500 పరుగుల భాగస్వామ్యాలు, రెండు అసాధారణమైన 200 పరుగుల భాగస్వామ్యాలు నెలకొల్పారు. ఈ అసాధారణమైన ఘనత ప్రపంచంలో మరే జంటకూ సాధ్యం కాలేదు. ఇందులో అత్యంత కీలకమైనది 2016లో గుజరాత్ లయన్స్‌పై చేసిన భాగస్వామ్యం. బెంగళూరులోని చిన్నస్వామి స్టేడియంలో జరిగిన ఆ మ్యాచ్‌లో వీరిద్దరూ కలిసి రెండో వికెట్‌కు ఏకంగా 229 పరుగులు జోడించారు. ఈ అద్భుతమైన ప్రదర్శనలో ఇద్దరూ సెంచరీలు సాధించడం విశేషం. వారి బ్యాటింగ్ చూస్తున్న ప్రేక్షకులు బౌలర్లను దాడి చేసి పడగొట్టే మిలిటరీ సైనికుల్లా వారు కనిపించారని వ్యాఖ్యాతలు కూడా అభివర్ణించారు. ఆ స్కోరు ఇప్పటికీ ఐపీఎల్ చరిత్రలో అత్యధిక భాగస్వామ్యంగా నిలిచి ఉంది. అంతకు ఒక సంవత్సరం ముందు.. అంటే 2015లో ముంబై ఇండియన్స్ తో జరిగిన మ్యాచ్‌లో వారు 215 పరుగుల అజేయ భాగస్వామ్యం నెలకొల్పారు. వాంఖడే స్టేడియం హోరెత్తుతుండగా.. వీరి బ్యాటింగ్ విధ్వంసానికి బౌలర్లు నిస్సహాయంగా తలవంచారు.

ఒకే ఆటతీరు.. అదే మైండ్ సెట్
"మేమిద్దరం ఒకే రకమైన ఆటతీరును కలిగి ఉన్నాం" అని ఏబీ డివిలియర్స్ చెప్పారు. క్రీజులో వీరి చురుకుదనం, పరుగుల కోసం వారి ప్రయత్నం ప్రత్యేకంగా కనిపిస్తాయి. కేవలం బౌండరీలు కొట్టడంపైనే కాకుండా.. సింగిల్స్, డబుల్స్ వేగంగా తీయడం ద్వారా బౌలర్లపై నిరంతరం ఒత్తిడి పెడతారు. "బౌలర్ల వ్యూహాలను ముందుగానే పసిగట్టి, వారిపై దాడి చేయడానికి ప్రయత్నిస్తాం" అని ఆయన పేర్కొన్నారు. ఈ మైండ్ సెట్ వల్లనే వారు బౌలర్లను మానసికంగా కూడా దెబ్బతీసేవారు. ఈ పాడ్‌కాస్ట్‌లో వ్యాఖ్యాత వీరిద్దరినీ ఫుట్‌బాల్ దిగ్గజాలు క్రిస్టియానో ​​రొనాల్డో, లియోనెల్ మెస్సీలతో పోల్చగా.. ఇంగ్లాండ్ లెగ్ స్పిన్నర్ ఆదిల్ రషీద్ వీరిని మిక్స్‌డ్ మార్షల్ ఆర్ట్స్ (MMA) లెజెండ్స్ ఖబీబ్ నూర్మగోమెడోవ్, కోనార్ మెక్‌గ్రెగర్‌లతో పోల్చారు. వీరిద్దరి వ్యక్తిగత ప్రతిభ, క్రీజులో వారి దూకుడు కలగలిసి ప్రదర్శించే విద్వంసం ఈ పోలికలకు కారణం.

పోటీతత్వం.. అద్భుతమైన అనుభూతి
"కోహ్లీతో నేను బ్యాటింగ్ చేయడాన్ని చాలా ఇష్టపడతాను. అతను కూడా నా లాగే చాలా పోటీతత్వం కలవాడు. బౌలర్లను అటాక్ చేయడం మా ఇద్దరికీ చాలా ఇష్టం" అని ఏబీ డివిలియర్స్ చెప్పారు. "పెద్ద ఎత్తున ఉన్న ప్రేక్షకుల ముందు అతనితో ఆ అనుభూతిని పొందడం అద్భుతంగా ఉంటుంది" అని ఆయన అన్నారు.