సచిన్ టెండూల్కర్ సెంచరీ చేశాడు, ముంబై ఇండియన్స్ ఓడింది

ముంబై‌: సచిన్ టెండూల్కర్ సెంచరీ చేశాడు, ముంబై ఇండియన్స్ ఓడింది. మరోసారి సచిన్ విషయంలో సెంటిమెంటు ప్రతికూల ప్రభావం చూపింది. ముంబై ఇండియన్స్‌పై విజయం రుచి చూడని కొచ్చి టస్కర్స్ కేరళ 8 వికెట్ల తేడాతో గెలిచింది. మొదట సచిన్‌ టెండూల్కర్‌ (100 నాటౌట్‌; 66 బంతుల్లో 12X4, 3X6) మెరుపు శతకానికి, అంబటి రాయుడు (53; 33 బంతుల్లో 3X4, 4X6) దూకుడైన ఇన్నింగ్స్‌ తోడవడంతో ముంబయి 20 ఓవర్లలో 2 వికెట్లు కోల్పోయి 182 పరుగులు చేసింది. అనంతరం ఓపెనర్లు బ్రెండన్‌ మెక్‌కలమ్‌ (81; 60 బంతుల్లో 10X4, 2X6), మహేల జయవర్దనే (56; 36 బంతుల్లో 9X4) చెలరేగడంతో కోచి మరో ఓవర్‌ మిగిలుండగానే విజయాన్నందుకుంది. మెక్‌కలమే 'మ్యాన్‌ ఆఫ్‌ ద మ్యాచ్‌'గా ఎంపికయ్యాడు.

కొచ్చి టస్కర్స్ కేరళ జట్టు ఓపెనర్లు మెక్‌కలమ్‌, జయవర్దనేలు వ్యూహాత్మకంగా ఆడి, విజయానికి బాటలు వేశారు. మలింగను దెబ్బ కొడితే సగం పని పూర్తయినట్లేనని గ్రహించిన ఈ జోడీ ఆ పనిని సమర్థంగా పూర్తి చేసింది. మూడో ఓవర్లో బ్రెండన్‌ మూడు ఫోర్లు, జయవర్దనే ఒక ఫోర్‌ బాదారు. ఆ తర్వాత ఇద్దరూ పొలార్డ్‌ను లక్ష్యంగా చేసుకున్నారు. 2 ఓవర్లలో అతను 30 పరుగులు సమర్పించుకున్నారు. తర్వాతి బాధితుడు హర్భజన్‌. 3 ఓవర్లలో 28 పరుగులు. మిగిలిన బౌలర్లు కూడా కోచి ఓపెనర్లను అడ్డుకోలేకపోయారు. 13 ఓవర్లలో ఆ జట్టు స్కోరు 116/0. ఈ స్థితిలో కోచి సునాయాసంగా గెలుస్తుందనిపించింది.

అయితే మలింగ జయవర్దనేను ఔట్‌ చేయడంతో 128 పరుగుల తొలి వికెట్‌ భాగస్వామ్యానికి తెరపడింది. ఐతే మెక్‌కలమ్‌ ధాటిని కొనసాగించడంతో కోచి విజయానికి చేరువైంది. 18 బంతుల్లో 27 పరుగులు చేయాలి. ఈ దశలో మలింగ.. మెక్‌కలమ్‌ను బౌల్డ్‌ చేయడంతో ముంబయి మళ్లీ రేసులోకొచ్చింది. కానీ రవీంద్ర జడేజా (25 నాటౌట్‌; 11 బంతుల్లో 2X4, 2X6), బ్రాడ్‌ హాడ్జ్‌ (11; 7 బంతుల్లో 2X4)తో కలిసి కోచికి విజయాన్ని కట్టబెట్టాడు.