3211 రోజుల నిరీక్షణ ఫలం: కేఎల్ రాహుల్ విధ్వంసం!

IND vs WI: భారత్, వెస్టిండీస్ జట్ల మధ్య జరుగుతున్న తొలి టెస్ట్ మ్యాచ్‌లో టీమిండియా స్టార్ బ్యాటర్ కేఎల్ రాహుల్ రాణించాడు. గత కొంతకాలంగా అద్భుతమైన ఫామ్‌లో ఉన్న కేఎల్ రాహుల్.. ఈ మ్యాచ్‌లో కూడా తన పరుగుల వేటను కొనసాగించి.. వెస్టిండీస్ బౌలర్లకు పెద్ద సమస్యగా మారాడు. ఓపెనర్‌గా బరిలోకి దిగిన కేఎల్ రాహుల్.. ఒక ఎండ్‌లో వికెట్ పడకుండా జాగ్రత్తగా ఆడుతూ జట్టు ఇన్నింగ్స్ ను ముందుకు నడిపించాడు. టాపార్డర్ బ్యాటర్లు పెద్దగా రాణించకపోయినా.. కేఎల్ రాహుల్ మాత్రం గట్టిగా నిలబడి 190 బంతుల్లో తన సెంచరీని పూర్తి చేశాడు.

ప్రస్తుత భారత టెస్ట్ జట్టులో తాను మంచి బ్యాటర్‌నని ఈ సెంచరీతో మరోసారి నిరూపించుకున్నాడు. యశస్వి జైస్వాల్‌తో కలిసి 68 పరుగుల భాగస్వామ్యాన్ని, శుభ్‌మన్ గిల్(అర్థ సెంచరీతో ఔట్)తో కలిసి 98 పరుగుల భాగస్వామ్యాన్ని కేఎల్ రాహుల్ నెలకొల్పాడు. ఈ రెండు కీలక భాగస్వామ్యాల్లోనూ కేఎల్ రాహుల్ తన పాత్రను సమర్థవంతంగా పోషించడంతో టీమిండియా ఈ టెస్ట్ మ్యాచ్‌లో పటిష్టమైన స్థితిలో నిలబడగలిగింది.

3211 రోజుల తర్వాత స్వదేశంలో సెంచరీ
కేఎల్ రాహుల్‌కు ఈ సెంచరీ చాలా ప్రత్యేకమైనది. ఎందుకంటే కేఎల్ రాహుల్ ఇండియాలో 3211 రోజుల తర్వాత సెంచరీ చేయడం గమనార్హం. ఈ గణాంకాలు ఆశ్చర్యకరంగా ఉన్నా, ఇది నిజం. విదేశీ గడ్డపై పలు సెంచరీలు సాధించిన కేఎల్ రాహుల్.. భారత్‌లో మాత్రం చాలా సార్లు సెంచరీకి దగ్గరగా వచ్చి విఫలమయ్యాడు. సుదీర్ఘ విరామం తర్వాత స్వదేశంలో ఆయన సాధించిన రెండో టెస్ట్ సెంచరీ ఇది. ఈ అద్భుత ఇన్నింగ్స్ కేఎల్ రాహుల్ కెరీర్‌కు మరింత బలాన్ని చేకూర్చింది.

162 పరుగులకే ఆలౌట్
మొదటి టెస్టులో టాస్ గెలిచి ముందుగా బ్యాటింగ్ చేసిన వెస్టిండీస్ జట్టు 162 పరుగులకే ఆలౌట్ అయింది. అనంతరం బ్యాటింగ్ కు దిగిన టీమిండియా లంచ్ బ్రేక్ వరకు 3 వికెట్లు కోల్పోయి 218 పరుగులు చేసింది. టీమిండియా కెప్టెన్ శుభ్‌మన్ గిల్ హాఫ్ సెంచరీ చేశాడు. ప్రస్తుతం భారత్ 59 పరుగుల లీడ్‌లో ఉంది.