అంపైర్లు.. మీ కళ్లు దొబ్బినయా?: కేకేఆర్ స్టార్ ప్లేయర్

లక్నో సూపర్ జెయింట్స్ చేతిలో ఓటమి పాలైన అనంతరం కేకేఆర్ ఆటగాడు రోవ్‌మన్ పావెల్ అంపైర్ల తీరుపై తీవ్ర అసహనం వ్యక్తం చేశాడు. ఈ మ్యాచ్‌లో జరిగిన వివాదాస్పద నిర్ణయాలు,పిచ్ పరిస్థితుల గురించి పావెల్ ప్రెస్ కాన్ఫరెన్స్‌లో కీలక వివరాలను వెల్లడించాడు. ఈ మ్యాచ్‌లో కేకేఆర్ ఓపెనర్ ఫిన్ అలెన్ ఔట్ అయిన తీరు వివాదాస్పదంగా మారింది. డీప్ థర్డ్ మ్యాన్ వద్ద దిగ్వేష్ రాఠీ పట్టిన క్యాచ్ క్లీన్‌గా లేదని.. బౌండరీ లైన్‌ను అతని కాలి వేళ్లు తాకినట్లు రీప్లేలో కనిపిస్తోందని పావెల్ పేర్కొన్నాడు. ఇంతటి కీలకమైన నిర్ణయం తీసుకునే ముందు ఫీల్డ్ అంపైర్లు థర్డ్ అంపైర్ సహాయం తీసుకోకపోవడం తనను ఆశ్చర్యానికి గురిచేసిందని రోవ్‌మన్ పావెల్ విమర్శించాడు. ఐపీఎల్‌లో చిన్న చిన్న విషయాలకు కూడా థర్డ్ అంపైర్‌ను సంప్రదించే అంపైర్లు.. ఇలాంటి పెద్ద విషయంలో ఎందుకు తడబడ్డారో అర్థం కాలేదని మండిపడ్డాడు.

పిచ్ పరిస్థితులపై పావెల్ విశ్లేషణ
ఈడెన్ గార్డెన్స్ పిచ్ సాధారణంగా బ్యాటింగ్‌కు అనుకూలంగా ఉంటుందని.. కానీ ఈ మ్యాచ్‌లో పిచ్ చాలా నెమ్మదిగా ఉందని రోవ్‌మన్ పావెల్ అభిప్రాయపడ్డాడు. "ఇది 220 పరుగులు చేసే వికెట్ కాదు. బ్యాటర్లు షాట్లు ఆడటం కష్టంగా మారింది. ముఖ్యంగా బౌలర్లు స్లోయర్ బంతులు వేసినప్పుడు పిచ్ నుంచి వారికి మంచి సహకారం లభించింది" అని పావెల్ పేర్కొన్నాడు. తమ సొంత మైదానాన్ని కంచుకోటగా మార్చుకోవాలనుకున్నామని.. కానీ పిచ్ తీరు వల్ల అది సాధ్యం కాలేదని పావెల్ ఆవేదన వ్యక్తం చేశాడు.

ముకుల్ చౌదరిపై పావెల్ ప్రశంసల జల్లు
తమ ఓటమికి అంపైర్ల తప్పులే కారణమని తాము అనడం లేదని.. లక్నో యువ ప్లేయర్ ముకుల్ చౌదరి అద్భుతమైన ఇన్నింగ్స్ ఆడాడని రోవ్‌మన్ పావెల్ కొనియాడాడు. ఒత్తిడిలో ముకుల్ చౌదరి ఆడిన తీరు మ్యాచ్‌ను తమ నుంచి లాగేసుకుందని.. ఆ క్రెడిట్ అంతా అతనికే దక్కుతుందని పావెల్ అన్నాడు. ఓ దశలో మ్యాచ్ కేకేఆర్ చేతుల్లోనే ఉన్నప్పటికీ.. ముకుల్ చౌదరి మెరుపు ఇన్నింగ్స్ వల్ల విజయం చేజారిందని పావెల్ నిజాయితీగా అంగీకరించాడు.

ముందున్న 10 మ్యాచ్‌లపై ఆశలు
ప్రస్తుతం కేకేఆర్ ఆడిన 4 మ్యాచ్‌ల్లో ఒక్క విజయం కూడా నమోదు చేయలేదు. ఒక మ్యాచ్ వర్షం వల్ల రద్దు కావడంతో కేవలం ఒక పాయింట్ మాత్రమే ఉంది. అయితే టోర్నమెంట్ ఇంకా ముగియలేదని రోవ్‌మన్ పావెల్ ఆశాభావం వ్యక్తం చేశాడు. ఐపీఎల్ చరిత్రలో విజేతలుగా నిలిచిన జట్లు టోర్నీ మధ్యలో లేదా చివరలో ఫామ్ అందుకున్న సందర్భాలు ఉన్నాయని గుర్తు చేశాడు. ఇంకా తమకు 10 మ్యాచ్‌లు ఉన్నాయని.. పోరాడి ప్లేఆఫ్స్‌కు చేరుతామని పావెల్ ధీమా వ్యక్తం చేశాడు.

టెక్నికల్ టీమ్ అప్రమత్తం
అంపైర్ల తప్పిదాల వల్ల పాయింట్లు కోల్పోవడం బాధాకరమైనప్పటికీ.. దీనిని ఇక్కడితో వదిలేసి తదుపరి మ్యాచ్‌లపై దృష్టి సారించనున్నట్లు రోవ్‌మన్ పావెల్ వెల్లడించాడు. జట్టు యాజమాన్యం ఈ వివాదాస్పద ఔట్ గురించి అధికారికంగా చర్చించే అవకాశం ఉన్నట్లు తెలుస్తోంది. కేకేఆర్ అభిమానులు కూడా సోషల్ మీడియాలో అంపైర్ల తీరును తప్పుబడుతూ పోస్టులు పెడుతున్నారు.