చరిత్ర తిరగరాసిన కింగ్ కోహ్లీ: టెండూల్కర్ రికార్డులు బద్ధలు!

రాంచీలోని JSCA అంతర్జాతీయ స్టేడియంలో దక్షిణాఫ్రికాతో జరిగిన తొలి వన్డేలో భారత సూపర్ స్టార్ విరాట్ కోహ్లీ తన 52వ వన్డే సెంచరీతో అద్భుత రికార్డులు సృష్టించాడు. ఈ ఒక్క ఇన్నింగ్స్‌లోనే కోహ్లీ సచిన్ టెండూల్కర్‌కు చెందిన పలు చారిత్రక రికార్డులను బ్రేక్ చేశాడు.

విరాట్ 52వ సెంచరీ
ఐడెన్ మార్‌క్రమ్ నేతృత్వంలోని దక్షిణాఫ్రికా టాస్ గెలిచి భారత్‌ను బ్యాటింగ్‌కు ఆహ్వానించింది. 25 పరుగులకే తొలి వికెట్ కోల్పోయిన తర్వాత క్రీజులోకి వచ్చిన విరాట్ కోహ్లీ.. ఫిబ్రవరి 2025 తర్వాత స్వదేశంలో ఆడిన తొలి ఇన్నింగ్స్‌లోనే మెరుపులు మెరిపించాడు. ఎడమచేతి వాటం పేసర్ నాండ్రే బర్గర్‌పై క్లాసిక్ ఆఫ్-డ్రైవ్‌తో ఇన్నింగ్స్‌ను ప్రారంభించిన కోహ్లీ వెనుదిరిగి చూడలేదు. కోహ్లీ, రోహిత్ శర్మతో కలిసి పటిష్టమైన భాగస్వామ్యాన్ని నెలకొల్పాడు. ఈ పిచ్ బ్యాటింగ్‌కు అనుకూలంగా ఉండటంతో, వీరిద్దరూ దక్షిణాఫ్రికా బౌలింగ్‌ను సమర్థవంతంగా ఎదుర్కొన్నారు.

టెండూల్కర్‌ రికార్డులు బ్రేక్
రాంచీలో దక్షిణాఫ్రికాపై విరాట్ కోహ్లీ సాధించిన 52వ వన్డే సెంచరీ, అంతర్జాతీయ క్రికెట్‌లో అతని ఆధిపత్యాన్ని మరోసారి చాటింది. ఈ అద్భుతమైన ఇన్నింగ్స్‌తో కోహ్లీ పలు కీలక రికార్డులను తిరగరాశాడు, వాటిలో కొన్ని క్రికెట్ దిగ్గజం సచిన్ టెండూల్కర్‌కు చెందినవి కావడం విశేషం.కోహ్లీ సాధించిన అతిపెద్ద రికార్డులలో ఒకటి, ఒకే అంతర్జాతీయ ఫార్మాట్‌లో అత్యధిక సెంచరీలు చేసిన ఆటగాడిగా నిలవడం. తన 52వ వన్డే సెంచరీతో అతను టెస్టుల్లో సచిన్ టెండూల్కర్ పేరిట ఉన్న 51 సెంచరీల రికార్డును అధిగమించాడు. ఇది క్రికెట్ చరిత్రలో ఒక బ్యాటర్ ఒకే ఫార్మాట్‌లో సాధించిన అత్యధిక శతకాలుగా రికార్డుకెక్కింది. అంతేకాకుండా వన్డే క్రికెట్‌లో అత్యధిక సెంచరీలు (49) చేసిన రికార్డును 2023 ప్రపంచకప్‌లోనే అధిగమించిన కోహ్లీ, ఈ ఫార్మాట్‌లో తన సెంచరీల సంఖ్యను ఇప్పుడు 52కు పెంచుకుని తన రికార్డును మరింత పటిష్టం చేసుకున్నాడు.

స్వదేశంలో ఆడే విషయంలో కూడా కోహ్లీ తన ప్రత్యేకతను నిరూపించుకున్నాడు. ఈ సెంచరీతో అతను స్వదేశంలో వన్డేలలో 25 సెంచరీలు సాధించిన మొదటి ఆటగాడిగా నిలిచాడు. ఇది 50 ఓవర్ల ఫార్మాట్‌లో ఒకరి సొంతగడ్డపై ఒక బ్యాటర్ సాధించిన అత్యధిక శతకాల మైలురాయిగా నిలిచింది. అలాగే దక్షిణాఫ్రికాపై వన్డేలలో అత్యధిక సెంచరీలు సాధించిన రికార్డును కూడా కోహ్లీ సొంతం చేసుకున్నాడు. కేవలం 30 ఇన్నింగ్స్‌లలో 6 సెంచరీలు సాధించి, 57 ఇన్నింగ్స్‌లలో 5 సెంచరీలు సాధించిన సచిన్ టెండూల్కర్ రికార్డును అతను బద్దలు కొట్టాడు.

ఇతర గణాంకాలను పరిశీలిస్తే, విరాట్ కోహ్లీ అంతర్జాతీయ క్రికెట్‌లోని అన్ని ఫార్మాట్‌లలో నంబర్ 3 స్థానంలో ఆడుతూ 218 సిక్సర్లు కొట్టాడు. దీనితో ఆస్ట్రేలియా దిగ్గజం రికీ పాంటింగ్ (217 సిక్సర్లు) రికార్డును అధిగమించాడు. ఇకపోతే మైదానంలో కెప్టెన్ రోహిత్ శర్మతో అతని భాగస్వామ్యం కూడా అద్భుతం. దక్షిణాఫ్రికాపై వీరిద్దరూ కలిసి 136 పరుగుల భాగస్వామ్యాన్ని నెలకొల్పడం ద్వారా, వన్డేలలో వారి సెంచరీ భాగస్వామ్యాల సంఖ్యను 20కి చేర్చారు. ఈ జాబితాలో సచిన్ టెండూల్కర్-సౌరవ్ గంగూలీ (26) తర్వాత అత్యధిక సెంచరీ భాగస్వామ్యాలు నెలకొల్పిన జోడీగా రోహిత్-కోహ్లీ ద్వయం నిలిచింది.