వెస్టిండీస్ వన్డే, టీ20 కెప్టెన్‌గా కీర‌న్ పొలార్డ్!!

కెప్టెన్‌గా పొలార్డ్‌కు మద్దతు:

పోర్ట్ ఆఫ్ స్పెయిన్‌లో రెండు రోజుల రెగ్యులర్ త్రైమాసిక సమావేశం జరిగింది. మొదటి రోజైన శనివారం క్రికెట్ వెస్టిండీస్ బోర్డ్ ఆఫ్ డైరెక్టర్స్ వెస్టిండీస్ వన్డే, టీ20 కెప్టెన్‌గా పొలార్డ్‌ను నియమించాలనే నిర్ణయం తీసుకున్నారని సమాచారం తెలుస్తోంది. ఎంపిక కమిటీ కెప్టెన్‌గా కీర‌న్ పొలార్డ్‌కు ఓటేసిందట. పొలార్డ్‌కు కమిటీలోని ఆరుగురు డైరెక్టర్ల మద్దతు లభించగా.. మిగతా ఆరుగురు వ్యతిరేకంగా ఉన్నారని ఒక నివేదిక తెలిపింది.

2016లో చివరి వన్డే:

32 ఏళ్ల పొలార్డ్‌ విండీస్ తరపున చివరిసారిగా 2016లో వన్డే ఆడాడు. 2019 ప్రపంచకప్‌లో పొలార్డ్‌కు చోటు దక్కకపోయినా.. స్టాండ్‌ బై ఆటగాడిగా ఎంపికయ్యాడు. అయితే స్టాండ్‌ బై ఎంపికయినా.. ఇంగ్లాండ్ వెళ్ళలేదు. టీమిండియాతో ఇటీవలే ముగిసిన టీ20 సిరీస్‌లో పాల్గొన్నాడు. కష్టాల్లో ఉన్న జట్టును ఆదుకుని పర్వాలేదనిపించాడు.

విజయాల బాట పట్టేనా:

ఈ భారీ హిట్టింగ్ ఆల్ రౌండర్ ఇప్పటివరకు 101 వన్డేలు ఆడాడు. 25.71 సగటుతో 2,289 పరుగులు చేశాడు. ఇందులో మూడు సెంచరీలు, తొమ్మిది అర్ధ సెంచరీలు ఉన్నాయి. అంతేకాదు ఈ ఫార్మాట్‌లో 50 వికెట్లు కూడా పడగొట్టాడు. పొలార్డ్‌ 62 టీ20 మ్యాచ్‌లలో 21.50 సగటుతో 903 పరుగులు చేసి, 23 వికెట్లు పడగొట్టాడు. మరి కొత్త కెప్టెన్‌ సారథ్యంలోనైనా విండీస్ విజయాల బాట పడుతుందేమో చూడాలి.