బుడ్డోడు డకౌట్.. గాల్లోకి ఎగిరి గంతేసిన కావ్యపాప! (వీడియో)

ఐపీఎల్ 2026 సీజన్లో భాగంగా రాజస్థాన్ రాయల్స్, సన్‌రైజర్స్ హైదరాబాద్ జట్ల మధ్య జరిగిన ఉత్కంఠభరిత పోరులో ఓ ఆసక్తికర సన్నివేశం చోటుచేసుకుంది. ఈ సీజన్లో వరుసగా మెరుపు ఇన్నింగ్స్‌లతో ఆకట్టుకుంటున్న 15 ఏళ్ల సంచలనం వైభవ్ సూర్యవంశీపై భారీ అంచనాలు నెలకొన్నాయి. అయితే సన్‌రైజర్స్ బౌలర్ ప్రఫుల్ హింగే వేసిన అద్భుతమైన బంతికి వైభవ్ సమాధానం చెప్పలేకపోయాడు. క్రీజులోకి వచ్చిన మొదటి బంతికే భారీ షాట్‌కు ప్రయత్నించి ఔట్ కావడంతో సూర్యవంశీ 'గోల్డెన్ డక్'గా వెనుదిరిగాడు.

కావ్య మారన్ ఉత్సాహం
వైభవ్ సూర్యవంశీ వికెట్ పడగానే స్టేడియంలోని సన్‌రైజర్స్ యజమాని కావ్య మారన్ ఒక్కసారిగా సీటులో నుంచి లేచి ఆనందంతో చిందులేశారు. సాధారణంగా తన జట్టు వికెట్ తీసినప్పుడు ఎంతో ఉత్సాహంగా ఉండే కావ్య.. ఈ మ్యాచ్‌లో అత్యంత ప్రమాదకరమైన ఓపెనర్ సున్నాకే అవుట్ కావడంతో తన సంతోషాన్ని ఆపుకోలేకపోయారు. ఆమె చేసిన ఈ 'వైల్డ్ సెలబ్రేషన్'కు సంబంధించిన వీడియోలు, ఫోటోలు ప్రస్తుతం సోషల్ మీడియాలో విపరీతంగా వైరల్ అవుతున్నాయి.

పట్టు బిగించిన హైదరాబాద్:
ప్రఫుల్ హింగే వేసిన ఆ బంతి వైభవ్ బ్యాట్ స్టిక్కర్‌కు తగిలి గాలిలోకి లేవగా.. సలీల్ అరోరా సులభంగా క్యాచ్ అందుకున్నాడు. రాజస్థాన్ రాయల్స్ జట్టుకు ఇది కోలుకోలేని దెబ్బ కాగా.. సన్‌రైజర్స్ క్యాంపులో పండగ వాతావరణం నెలకొంది. వైభవ్ నిరాశగా పెవిలియన్ వైపు వెళ్తుండగా.. హైదరాబాద్ ఆటగాళ్లు ఒకరినొకరు కౌగిలించుకుని సంబరాలు చేసుకున్నారు. ఈ కీలక వికెట్ మ్యాచ్ ఫలితాన్ని సన్‌రైజర్స్ వైపు తిప్పడంలో ప్రధాన పాత్ర పోషించింది.