అనిరుధ్‌తో కావ్యమారన్ పెళ్లి? క్లారిటీ ఇచ్చిన నటుడు!

ఐపీఎల్ 2026 సీజన్ ముగిసినప్పటికీ.. సన్‌రైజర్స్ హైదరాబాద్ జట్టు యజమాని కావ్యమారన్‌కు సంబంధించిన ఓ ఇంట్రెస్టింగ్ న్యూస్ సోషల్ మీడియాలో విపరీతంగా హల్చల్ చేస్తోంది. దక్షిణాదిలోనే కాకుండా బాలీవుడ్‌లోనూ టాప్ మ్యూజిక్ డైరెక్టర్‌గా దూసుకుపోతున్న అనిరుధ్ రవిచందర్‌తో కావ్యమారన్ త్వరలోనే వివాహ బంధంలోకి అడుగుపెట్టబోతున్నారంటూ వార్తలు వస్తున్నాయి. సన్ టీవీ నెట్వర్క్ ఎగ్జిక్యూటివ్ డైరెక్టర్‌గా వ్యవహరిస్తూ ఐపీఎల్ మ్యాచ్‌లలో తనదైన జోష్‌తో క్రికెట్ అభిమానులలో ఎంతో క్రేజ్ సంపాదించుకున్న కావ్యమారన్.. ఈ వార్తలపై ఇప్పటివరకు అధికారికంగా స్పందించలేదు. అయితే అనిరుధ్ కుటుంబ సభ్యుడే ఈ పెళ్లి వార్తలను ధ్రువీకరించడం ఇప్పుడు విశేషంగా మారింది.

అనిరుధ్ రవిచందర్‌కు వరుసకు పెద్దనాన్న అయ్యే ప్రముఖ సీనియర్ నటుడు వైజీ మహేంద్రన్ ఇచ్చిన ఓ ఇంటర్వ్యూలో ఈ పెళ్లి గురించి సెన్సేషనల్ కామెంట్స్ చేశారు. "అనిరుధ్ చాలా మృదుస్వభావి. నేను విన్న సమాచారం ప్రకారం వారిద్దరూ త్వరలోనే పెళ్లి చేసుకోబోతున్నారు. ఆ అమ్మాయి(కావ్య) సాదాసీదా అమ్మాయి కాదు.. సన్‌రైజర్స్ లాంటి ఓ పెద్ద క్రికెట్ జట్టును సమర్థవంతంగా నడిపించగల సత్తా ఉన్న మహిళ. తన తండ్రి నుంచి వ్యాపార నైపుణ్యాలను ఆమె అందిపుచ్చుకుంది. వారిద్దరిదీ చాలా అందమైన జంట.. ఇద్దరూ కలిసి మ్యూజికల్ బిజినెస్ లోకి అడుగుపెట్టాలి" అని వైజీ మహేంద్రన్ పేర్కొన్నారు.

2011లో 'వై దిస్ కొలవెరి డీ' పాటతో దేశవ్యాప్తంగా సంచలనం సృష్టించిన అనిరుధ్ రవిచందర్.. ఆ తర్వాత జైలర్, జెర్సీ, జవాన్, లియో వంటి బ్లాక్‌బస్టర్ చిత్రాలకు సంగీతాన్ని అందించి స్టార్ కంపోజర్‌గా ఎదిగాడు. తమిళ సూపర్ స్టార్ రజనీకాంత్‌కు అనిరుధ్ స్వయానా మేనల్లుడు కావడం గమనార్హం. మరోవైపు ప్రముఖ వ్యాపారవేత్త కళానిధి మారన్ కుమార్తె అయిన కావ్య మారన్.. కేవలం సన్‌రైజర్స్ హైదరాబాద్ జట్టుకే కాకుండా ఎస్ఏ20 (SA20) లీగ్‌లో సన్‌రైజర్స్ ఈస్టర్న్ కేప్, ది హండ్రెడ్ లీగ్‌లో సన్‌రైజర్స్ లీడ్స్ జట్లకు కూడా సహ-యజమానిగా వ్యవహరిస్తున్నారు. పాట్ కమిన్స్ సారథ్యంలో ఐపీఎల్ 2026లో అద్భుతంగా రాణించిన ఎస్‌ఆర్‌హెచ్, ఎలిమినేటర్ మ్యాచ్‌లో రాజస్థాన్ రాయల్స్ చేతిలో ఓడిపోయి ప్లేఆఫ్స్ ప్రయాణాన్ని ముగించింది.