వైభవ్ సూర్యవంశీ వివాదం.. జితేష్ శర్మ క్లారిటీ!

ఇటీవల జరిగిన కొన్ని ఇంటర్వ్యూలు, పాడ్‌కాస్ట్‌లలో స్టార్ క్రికెటర్ జితేష్ శర్మ చేసిన కామెంట్స్ క్రికెట్ అభిమానుల్లో చర్చనీయాంశంగా మారాయి. ముఖ్యంగా రాజస్థాన్ రాయల్స్ తరఫున ఆడుతున్న 15 ఏళ్ల యువ సంచలనం వైభవ్ సూర్యవంశీని 'అన్‌ప్రొఫెషనల్' అని పిలవడంపై అభిమానులు తీవ్రంగా స్పందించారు. ఓ చిన్న వయసు ఆటగాడి పట్ల అలా మాట్లాడటం సరికాదని విమర్శలు వచ్చాయి. అయితే తాజాగా ఆర్సీబీ విడుదల చేసిన వీడియోలో జితేష్ ఈ విషయంపై స్పందిస్తూ.. తన మాటలను అభిమానులు తప్పుగా అర్థం చేసుకున్నారని వెల్లడించారు.

ఐస్‌క్రీమ్ ప్రేమనే అలా అన్నాను!
వైభవ్ సూర్యవంశీతో తనకున్న వ్యక్తిగత అనుబంధం గురించి జితేష్ శర్మ వివరిస్తూ.. "అతడు కేవలం 15 ఏళ్ల పిల్లాడు. ఈ వయసులో పిల్లలకు ఐస్‌క్రీమ్‌లు, కార్టూన్లు అంటే చాలా ఇష్టం. అతడు తరచూ నా గదికి వచ్చి నాతో కలిసి ఐస్‌క్రీమ్ తింటాడు. ఆ వయసులో పిల్లలు ఐస్‌క్రీమ్ అడగడం చాలా సహజం. అతడు మా ఇంటికి కూడా వస్తుంటాడు, నా భార్యతో మాట్లాడతాడు, యూట్యూబ్ వీడియోలు చూస్తాడు. మా మధ్య ఒక అన్నదమ్ముల బంధం ఉంది. అందుకే అతడిని నేను ఏదైనా అనగలను" అని జితేష్ పేర్కొన్నాడు. స్టేడియం బయట వైభవ్ ఇంకా ఒక పిల్లాడిలాగే ప్రవర్తిస్తాడని, దానినే తాను సరదాగా అన్నానని జితేష్ వివరించాడు.

ప్రొఫెషనలిజం ముసుగు వద్దు.. పిల్లాడిని పిల్లాడిలా ఉండనివ్వండి..
ఈ స్థాయి క్రికెట్‌లో వైభవ్ సూర్యవంశీ నుంచి ప్రతి ఒక్కరూ ఎంతో పరిణతి ఆశిస్తారని.. కానీ తాను మాత్రం అతడిని ఓ పిల్లాడిలాగే చూస్తానని జితేష్ అన్నాడు. "జనం ఏమనుకున్నా నాకు అనవసరం. వైభవ్ ఇంకా 15 ఏళ్ల బాలుడు మాత్రమే. నాతో ఉన్నప్పుడు అతడు స్వేచ్ఛగా తనకిష్టమైన టీవీ షోలు చూడొచ్చు, నచ్చినవి తినొచ్చు. ప్రొఫెషనలిజం పేరుతో అతడి బాల్యాన్ని దూరం చేయకూడదని నేను కోరుకుంటాను. కేవలం తన బ్యాటింగ్‌పై దృష్టి పెట్టమని, మిగతా సమయాల్లో పిల్లాడిలా ఎంజాయ్ చేయమని నేను అతడికి చెబుతుంటాను" అని జితేష్ శర్మ వెల్లడించాడు.

టీమిండియా భవిష్యత్తు స్టార్‌గా వైభవ్
లెజెండరీ క్రికెటర్ ఏబీ డివిలియర్స్‌తో జరిగిన సంభాషణలో కూడా జితేష్.. వైభవ్ ప్రతిభను కొనియాడాడు. "భవిష్యత్తులో భారత స్టార్‌గా ఎదిగే సత్తా ఎవరికి ఉందని ఏబీ నన్ను అడిగినప్పుడు.. నా నోటి నుండి వచ్చిన మొదటి పేరు వైభవ్ సూర్యవంశీ. అతడి టెక్నిక్, పని తీరు, మానసిక ధైర్యం చూస్తే మూడు ఫార్మాట్లలో టీమిండియా తరపున రాణిస్తాడని నాకు నమ్మకం ఉంది. మైదానంలో అతడు చాలా ప్రొఫెషనల్‌గా కనిపిస్తాడు, కానీ బయట మాత్రం ఇంకా పసివాడే" అని జితేష్ తన మనసులో మాట చెప్పాడు.