ఇంగ్లండ్‌తో మ్యాచ్‌కు ముందు టీమిండియాను టెన్ష‌న్ పెట్టే వార్త‌!

కాస్త ఒళ్లు ద‌గ్గ‌ర పెట్టుకోవాల్సిందే..

కాలి కండ‌రాలు పట్టేయ‌డంతో ఇదివ‌ర‌కు ఇంగ్లండ్ ఆడిన రెండు మ్యాచుల‌కూ దూరం అయ్యాడు జేస‌న్ రాయ్‌. ప్ర‌పంచ‌క‌ప్‌లో ఇప్ప‌టిదాకా జేస‌న్ రాయ్ ఆడిన అన్ని మ్యాచ్‌ల‌లోనూ అద్భుతంగా రాణించాడు. ఆ జ‌ట్టు భారీ స్కోరు సాధించ‌డానికి బ‌ల‌మైన పునాదులు వేశాడు. ద‌క్షిణాఫ్రికాతో జ‌రిగిన మ్యాచ్‌లో జేస‌న్ రాయ్ 54 బంతుల్లో 53 ప‌రుగులు చేశాడు. ఆ మ్యాచ్‌లో ఇంగ్లండ్ టీమ్ 311 ప‌రుగుల భారీ ల‌క్ష్యాన్ని ద‌క్షిణాఫ్రికాకు నిర్దేశించింది. ఆ మ్యాచ్‌లో ద‌క్షిణాఫ్రికా ఓట‌మి పాలైంది. బంగ్లాదేశ్, ఇంగ్లండ్ మ‌ధ్య జ‌రిగిన మ్యాచ్‌లో జేస‌న్ రాయ్ విశ్వ‌రూపాన్నే చూపించేశాడు. ఆ ఇన్నింగ్‌ను ఇప్ప‌ట్లో ఎవ‌రూ మ‌రిచిపోలేరు. చిర‌స్మ‌ర‌ణీయ‌మైన ఆట‌తీరును ప్ర‌ద‌ర్శించాడత‌ను. బంగ్లాదేశ్‌తో మ్యాచ్‌లో 153 ప‌రుగులు చేశాడు. దీనికోసం అత‌ను ఎదుర్కొన్న బంతులు 121 మాత్ర‌మే. ఆ మ్యాచ్‌లో ఇంగ్లండ్‌లో 386 ప‌రుగులను ఏసింది.

ఇన్నింగ్ ఆరంభించ‌డం ఖాయం..

ఇలా అద్భ‌త ఫామ్‌లో ఉన్న జేస‌న్ రాయ్‌.. పాకిస్తాన్‌, ఆస్ట్రేలియా జ‌ట్ల‌తో జ‌రిగిన చివ‌రి రెండు మ్యాచ్‌ల‌కూ దూరం అయ్యాడు. కాలి కండ‌రాలు ప‌ట్టేయ‌డంతో మ్యాచ్‌ల‌ను ఆడ‌లేక‌పోయాడు. జేస‌న్ రాయ్ గైర్హాజ‌రీలో ఆడిన రెండింటినీ ఓడిపోయింది ఇంగ్లండ్‌. చివ‌రి మ్యాచ్‌ల‌ను ఓడిపోవ‌డంతో ఇంగ్లండ్ జ‌ట్టు సెమీ ఫైన‌ల్‌కు వెళ్లే అవ‌కాశాలు క్లిష్ట‌త‌రం అయ్యాయి. ఆ జ‌ట్టుకు రెండు మ్యాచ్‌లు మాత్ర‌మే మిగిలి ఉన్నాయి. పైగా టీమిండియా, న్యూజిలాండ్ వంటి రెండు స‌మ‌వుజ్జీల‌ను ఢీ కొట్ట‌బోతోంది. బ‌లహీన‌మైన జ‌ట్లు ఏవైనా ఉంటే ఇంగ్లండ్ టీమ్ మేనేజ్‌మెంట్ పెద్ద‌గా ఆందోళ‌న చెంది ఉండేది కాదేమో గానీ.. ఇప్పుడు త‌ల‌ప‌డ‌బోతున్నది స‌మ‌వుజ్జీల‌తో. ఈ నేప‌థ్యంలో- జేస‌న్ రాయ్‌ను త‌ప్ప‌నిస‌రిగా ఆడించ‌బోతోంది.

బెయిర్‌స్టోతో క‌లిసి..

ఓపెన‌ర్ జేస‌న్ రాయ్ అందుబాటులోకి రావ‌డం ఇంగ్లండ్‌కు క‌లిసి వ‌చ్చే అంశం. జేస‌న్ రాయ్ స్థానంలో జ‌ట్టులోకి తీసుకున్న జేమ్స్ విన్సీ ఏ మాత్రం ప్ర‌భావం చూపించ‌లేక‌పోయాడు. జేస‌న్ రాయ్ జ‌ట్టులోకి తిరిగి రావ‌డంతో అత‌ణ్ని ప‌క్క‌న పెడుతుంది ఇంగ్లండ్ టీమ్ మేనేజ్‌మెంట్‌. జానీ బెయిర్‌స్టోతో క‌లిసి జేస‌న్ రాయ్ ఇన్నింగ్‌ను ఆరంభించ‌డం దాదాపు ఖాయ‌మైన‌ట్టే క‌నిపిస్తోంది. ప్ర‌పంచ‌క‌ప్ ఆరంభ మ్యాచ్‌ల‌ల్లో ఈ ఇంగ్లండ్ ఓపెన‌ర్ల జోడీ జట్టుకు శుభారంభాన్ని ఇచ్చింది. బెయిర్‌స్టో, జేస‌న్ రాయ్ బాగా ఆడిన ప్ర‌తి సంద‌ర్భంలోనూ ఇంగ్లండ్ జ‌ట్టు భారీ స్కోరును సాధించింది. 300కు పైగా ప‌రుగులను ప్ర‌త్య‌ర్థికి నిర్దేశించింది. టీమిండియాతో ఆడ‌బోయే మ్యాచ్‌లో కూడా ఇంగ్లండ్ జ‌ట్టు అలాంటి ఆరంభాన్నే ఆశిస్తోంది. జేస‌న్ రాయ్‌, బెయిర్‌స్టో, జో రూట్‌, ఇవాన్ మోర్గాన్‌, బ‌ట్ల‌ర్‌, మొయిన్ అలీ.. వంటి హార్డ్ హిట్ట‌ర్ల‌తో బ్యాటింగ్‌లో రాణిస్తే.. మరోసారి ఇంగ్లండ్ ప‌రుగుల వ‌ర్షాన్ని కురిపించ‌గ‌ల‌ద‌నే భావిస్తున్నారు ఆ దేశ క్రికెట్ అభిమానులు.