ప్రతీకారం కాదు, అది పెద్ద మాట: భారత కెప్టెన్ ధోనీ

హైదరాబాద్: ప్రతీకారమనేది చాలా పెద్ద పదమని, ఇంగ్లండ్‌తో జరుగుతున్న సిరీస్‌ ప్రతీకార సిరీస్ కాదని టీమిండియా కెప్టెన్ మహేంద్ర సింగ్ ధోనీ అన్నాడు. ఇంగ్లండ్‌తో ఉప్పల్ స్టేడియంలో శుక్రవారం జరిగిన తొలి వన్డే గెలుపొందడంతో భారత్ ఇంగ్లండ్‌పై ప్రతీకారం తీర్చుకుంటుందని చెప్పడం సబబు కాదన్నాడు. ప్రతీకారమనేది చాలా పెద్ద, పరుష పదమని దీన్ని వాడవద్దని ఆయన అన్నాడు. ఇంగ్లండ్ సిరీస్‌ రెండో భాగంలో భారత్ ధీటుగానే రాణించిందని, మన క్రికెటర్లు కూడా ఇంగ్లండ్ గడ్డపై మంచి స్కోరు సాధించారని, కానీ అనూహ్యంగా పరాభవం తప్పలేదని ఆయన వ్యాఖ్యానించాడు. బౌలర్లు ధీటుగా రాణించకపోవడం వల్ల ఇంగ్లండ్‌తో జరిగిన సిరీస్‌లో ఓటమి తప్పలేదని ధోనీ అన్నాడు.

ఇంగ్లండ్‌తో సొంతగడ్డపై జరుగుతున్న సిరీస్‌లో యువ క్రికెటర్లు లభించిన అవకాశాన్ని సద్వినియోగం చేసుకుంటున్నారని ధోనీ వ్యాఖ్యానించాడు. ఇంగ్లండ్‌తో జరిగిన తొలి వన్డేలో 87 పరుగుల ఇన్నింగ్స్‌ను మరిచిపోలేనని ధోనీ అన్నాడు. ఈ ఇన్నింగ్స్‌ తనకెంతో అమూల్యమైనదని చెప్పాడు. తన ఆటతీరుకు రేటింగ్ ఇవ్వడం తనకు ఇష్టం ఉండదని, అయితే ఈ ఇన్నింగ్స్ తనకెంతో విలువైందని ఆయన అన్నాడు.