'ఇకపై 24 గంటలూ జోకులు వేయను!': అసలు రహస్యం బయటపెట్టిన ఇషాన్ కిషన్

ప్రస్తుతం టీ20 వరల్డ్ కప్‌లో భారత జట్టు విజయకేతనం ఎగురవేస్తుంటే.. అందులో వికెట్ కీపర్ బ్యాటర్ ఇషాన్ కిషన్ పాత్ర అత్యంత కీలకంగా మారింది. గతంలో మెరుపు ఇన్నింగ్స్‌లు ఆడినా నిలకడలేమితో సతమతమైన ఇషాన్ కిషన్.. ఇప్పుడు మాత్రం పూర్తి భిన్నంగా దుమ్మురేపుతున్నాడు. ముఖ్యంగా నమీబియాపై కేవలం 24 బంతుల్లోనే 61 పరుగులు చేసి విధ్వంసకర ఇన్నింగ్స్‌తో ప్రత్యర్థి బౌలర్లను హడలెత్తించాడు. తన ఆట తీరులో వచ్చిన ఈ అనూహ్య మార్పు గురించి ఇషాన్ కిషన్ స్వయంగా వివరిస్తూ.. తన సక్సెస్ వెనుక ఉన్న 'మెంటల్ గేమ్' గురించి ఆసక్తికర వ్యాఖ్యలు చేశాడు.

జోకులు మానేసి.. ఆటపై దృష్టి పెట్టి!
ఒకప్పుడు టీమిండియాలో అత్యంత అల్లరి చేసే ఆటగాడిగా ఇషాన్ కిషన్‌కు పేరుండేది. ఎప్పుడూ నవ్వూతూ తోటి ఆటగాళ్లతో సరదాగా గడుపుతూ ఉండే ఇషాన్ కిషన్.. ఇప్పుడు మాత్రం చాలా సీరియస్‌గా మారిపోయాడు. "గతంలో నేను 24 గంటలూ ఏదో ఒక జోక్ వేస్తూ, సరదాగా గడిపేవాడిని.. కానీ ఇప్పుడు మైదానం లోపల, బయట కూడా చాలా ప్రశాంతంగా ఉండటానికి ప్రయత్నిస్తున్నాను" అని ఇషాన్ కిషన్ పేర్కొన్నాడు. బీసీసీఐ సెంట్రల్ కాంట్రాక్ట్ కోల్పోవడం, కెరీర్‌లో ఎదురైన ఒడిదుడుకులు తన కళ్లు తెరిపించాయని.. క్రమశిక్షణ లేని ఆట ఎంత నష్టాన్ని కలిగిస్తుందో అర్థం చేసుకున్నానని కిషన్ నిజాయితీగా అంగీకరించాడు.

గంభీర్ శిక్షణలో సరికొత్త పాఠాలు
ఇషాన్ కిషన్ ఫామ్‌లోకి రావడంలో టీమిండియా హెడ్ కోచ్ గౌతమ్ గంభీర్ పాత్ర స్పష్టంగా కనిపిస్తోంది. గంభీర్ తన కఠినమైన క్రమశిక్షణకు, దూకుడుకు పేరుగాంచిన వ్యక్తి. ఇషాన్ కిషన్ మాటల్లో చెప్పాలంటే.. గంభీర్ ఇచ్చిన 'క్లాస్' అతని ఆలోచనా విధానాన్ని పూర్తిగా మార్చేసింది. క్రికెట్ అంటే కేవలం ఫోర్లు, సిక్సర్లు కొట్టడమే కాదు, మానసిక దృఢత్వం కూడా అని గంభీర్ కిషన్‌కు నూరిపోశాడు. ప్రతి బంతిని కొట్టాలనే ఆరాటం కంటే, వికెట్ విలువ తెలుసుకోవాలని గంభీర్ చేసిన సూచనలు ఇప్పుడు కిషన్ బ్యాటింగ్‌లో స్పష్టంగా కనిపిస్తున్నాయి.

పవర్‌ప్లేలో పంజా.. వ్యూహాత్మక మార్పులు
నమీబియాపై జరిగిన మ్యాచ్‌లో అభిషేక్ శర్మ లేని లోటు తెలియకుండా, టీ20 వరల్డ్ కప్ చరిత్రలోనే అత్యుత్తమ పవర్‌ప్లే స్కోరు (86/1) నమోదు చేయడంలో ఇషాన్ కిషన్ కీలక పాత్ర పోషించాడు. గతంలో రెండు మూడు డాట్ బాల్స్ పడితే ఒత్తిడికి లోనై వికెట్ పారేసుకునే బలహీనత అతనికి ఉండేది. కానీ ఇప్పుడు మాత్రం.. "జట్టులో భారీ హిట్టర్లు ఉన్నప్పుడు డాట్ బాల్స్ పడినా టెన్షన్ పడాల్సిన అవసరం లేదు" అనే ఆత్మవిశ్వాసంతో ఆడుతున్నాడు. జేజే స్మిత్ వేసిన ఓవర్‌లో 4 సిక్సర్లు కొట్టిన తీరు చూస్తుంటే, అతను ఎంతటి పరిణతి చెందిన బ్యాటర్‌గా మారాడో అర్థం చేసుకోవచ్చు.

సంజూ శాంసన్‌తో పోటీలో విజేతగా..
గత కొంతకాలంగా టీమిండియాలో వికెట్ కీపర్ స్థానం కోసం సంజూ శాంసన్, ఇషాన్ కిషన్ మధ్య తీవ్రమైన పోటీ నెలకొంది. సంజూ శాంసన్ అడపాదడపా మెరిసినా, ఇషాన్ కిషన్ ఇప్పుడు చూపిస్తున్న నిలకడ అతన్ని రేసులో చాలా ముందుకు తీసుకెళ్లింది. తన టెక్నిక్‌ను మెరుగుపరుచుకోవడంతో పాటు మానసిక స్థితిని మార్చుకోవడం వల్ల ప్రస్తుతం ఇషాన్ కిషన్ భారత జట్టులో మొదటి ప్రాధాన్యత కలిగిన వికెట్ కీపర్-బ్యాటర్‌గా అవతరించాడు. తన తప్పులను సరిదిద్దుకుని, సరికొత్త ఉత్సాహంతో ఆడుతున్న ఇషాన్ కిషన్ ఫామ్, వరల్డ్ కప్ నెగ్గాలనే భారత్ ఆశలకు మరింత బలాన్ని చేకూరుస్తోంది.