నాకు అసలు ఆ అలవాటు లేదు.. కెప్టెన్ విరాట్ కోహ్లీ ఆదేశించాక తప్పలేదు: ఇషాన్‌ కిషన్‌

బ్యాట్‌ ఎత్తే అలవాటు లేదు:

తాజాగా మణికట్టు స్పిన్నర్, అల్లరి పిల్లాడు యుజ్వేంద్ర చహల్.. ఇషాన్‌ కిషన్‌ను ఇంటర్వ్యూ చేశాడు. ఈ సందర్భంగా ఇషాన్‌ పలు విషయాలు పంచుకున్నాడు. 'నిజం చెప్పాలంటే మ్యాచ్‌లో హాఫ్ సెంచరీ చేరుకున్నానని నాకు తెలియదు. గొప్ప ఇన్నింగ్స్‌ ఆడావని విరాట్ భాయ్ నాతో అన్న తర్వాతే తెలిసింది. ఫిఫ్టీ తర్వాత నాకు బ్యాట్‌ ఎత్తే అలవాటు లేదు. అయితే కోహ్లీ.. 'బ్యాట్‌ ఎత్తి మైదానంలోని నలువైపులకు చూపెట్టు. ఇది నీ తొలి అంతర్జాతీయ మ్యాచ్‌' అని వెనకాల నుంచి అరిచాడు. ఆ తర్వాతే బ్యాట్‌ ఎత్తి అందరికి అభివాదం చేశా. ఎందుకంటే.. అది కెప్టెన్‌ ఆదేశంగా భావించా' అని ఇషాన్‌ తెలిపాడు.

మొదట్లో ఇబ్బంది పడ్డా:

'విరాట్ కోహ్లీ లాంటి గొప్ప ఆటగాడితో కలిసి బ్యాటింగ్‌ చేయడం కొత్త అనుభూతినిచ్చింది. తొలి మ్యాచులోనే విరాట్ భయ్యాతో కలిసి ఆడుతానని ఊహించలేదు. అతని స్థాయిని అందుకోవడానికి మొదట్లో ఇబ్బంది పడ్డా. అత్యున్నత స్థాయిలో రాణించాలంటే ఎలాంటి శరీర భాష ఉండాలో అర్థం చేసుకున్నా' అని ఇషాన్‌ కిషన్‌ చెప్పాడు. భారత్-ఇంగ్లండ్ మధ్య మంగళవారం రాత్రి 7 గంటలకి మూడో టీ20 మ్యాచ్ జరగనుంది. ఇందులో కూడా ఇషాన్ ఓపెనింగ్ చేయనున్నాడు. అయితే రెండు మ్యాచ్‌ల్లోనూ వరుసగా 1, 0 పరుగులు చేసి నిరాశపర్చిన కేఎల్‌ రాహుల్‌ స్థానంలో రోహిత్‌ శర్మ ఆడే వీలుంది.

భారత జెండాను చూశాక:

తాను ఇక్కడిదాకా రావడానికి ఎంతో మంది కృషి చేశారని, ముంబై ఇండియన్స్‌ కెప్టెన్‌ రోహిత్‌ శర్మ తనకు అండగా నిలిచాడన్నాడు. 'మ్యాచ్‌కు ముందు రోహిత్‌ భాయ్‌ నా వద్దకు వచ్చి.. నున్వ్ ఈరోజు ఓపెనింగ్‌ చేస్తున్నావన్నాడు. ఎలాంటి ఆందోళనా లేకుండా ఐపీఎల్‌లో ఆడినట్లే ఇక్కడా ప్రశాంతంగా ఆడమని చెప్పాడు. కానీ బరిలోకి దిగినప్పుడు మాత్రం ఆందోళనకు గురయ్యా. చివరికి జెర్సీ ధరించి భారత జెండాను చూశాక.. ఏదేమైనా అత్యుత్తమ ప్రదర్శన చేయాలనుకున్నా' అని కిషన్‌ పేర్కొన్నాడు.

ఆ ప్రదర్శనే భారత జట్టులో చోటు దక్కేలా చేసింది:

ఝార్ఖండ్‌కు చెందిన ఇషాన్‌ కిషన్‌ ఎడమచేతివాటం వికెట్‌కీపర్‌ కమ్ బ్యాట్స్‌మన్‌. దేశవాళీ క్రికెట్లో పరుగుల వరద పారించాడు. ఇక ఇండియన్‌ ప్రీమియర్‌ లీగ్‌లో రెండేళ్ల పాటు ముంబై ఇండియన్స్ తరఫున నిలకడగా పరుగులు చేస్తున్నాడు. నిర్భయంగా క్రికెట్‌ ఆడుతూ భారీ సిక్సర్లు బాదడం అతడి శైలి. రోహిత్ శర్మ సారథ్యంలోని ముంబై వరుసగా రెండు ట్రోఫీలు గెలవడంలో కిషన్‌ పాత్ర ఎంతో ఉంది. ఐపీఎల్ 2020 సీజన్‌లో కిషన్.. 145.76 స్ట్రైక్‌రేట్‌తో ఏకంగా 516 పరుగులు చేశాడు. ఇందులో 36 ఫోర్లు, 30 సిక్సర్లు ఉండటం గమనార్హం. ఆ ప్రదర్శనే భారత జట్టులో చోటు దక్కేలా చేసింది.