క్రికెట్ వీరుడి కెరీర్ ముగిసిందా?

యాభై ఏళ్లకు పైగా చరిత్ర ఉన్న భారత క్రికెట్ జట్టులో చాలా మంది అద్భుతమైన బౌలర్లు ఉన్నారు. వారిలో కొందరు దశాబ్దాల పాటు జట్టులో ఉన్నారు. అలాంటి బౌలర్ల జాబితాలో మహ్మద్ షమీ పేరు కూడా ఉంటుంది. షమీ 2013లో భారత జట్టులోకి వచ్చాడు. రెండేళ్లలోపే జట్టులోని ప్రధాన బౌలర్లలో ఒకరిగా ఎదిగాడు. అయితే ప్రస్తుతం మహ్మద్ షమీ కెరీర్ ప్రశ్నార్థరంగా మారింది. ఇటీవల ప్రకటించిన ఆసియా కప్ జట్టులో మహ్మద్ షమీ పేరు లేకపోవడం క్రికెట్ అభిమానులకు ఆందోళన కలిగించింది. గత కొన్నేళ్లుగా గాయాల సమస్యలతో బాధపడుతున్న షమీ అంతర్జాతీయ క్రికెట్ కెరీర్ ముగిసిందా? లేక అతనికి విశ్రాంతి ఇచ్చారా? అనే ప్రశ్నలు ఇప్పుడు తలెత్తుతున్నాయి.

గత దశాబ్ధ కాలంలో భారత అత్యుత్తమ పేసర్లలో మహ్మద్ షమీ కచ్చితంగా ఉంటాడు. జస్ప్రీత్ బుమ్రా జట్టులో లేని సమయంలో కూడా టీమ్ ఫాస్ట్ బౌలింగ్ దాడిని సమర్థవంతంగా నడిపించాడు. అయితే 2019 నుంచి గాయాలు మహ్మద్ షమీ క్రికెట్ లైఫ్‌కు ప్రధాన అవరోధంగా మారాయి. ఇటీవల ఇంగ్లండ్ జట్టుతో జరిగిన సిరీస్‌లో, ఇప్పుడు ఆసియా కప్ జట్టులో మహ్మద్ షమీ పేరు లేకపోవడాన్ని బట్టి, అతను ఇకపై భారత సెలెక్షన్ కమిటీ ప్రణాళికల్లో లేడనే సంకేతాలు వెలువడుతున్నాయి. జస్ప్రీత్ బుమ్రా జట్టులోకి తిరిగి వచ్చిన నేపథ్యంలో మహ్మద్ షమీకి జట్టులో స్థానం దక్కే అవకాశం లేదని దాదాపు ఖరారైంది.

షమీ చివరగా ఆడిన సిరీస్‌లో ఏం జరిగింది?
మహ్మద్ షమీ చివరిసారిగా ఛాంపియన్స్ ట్రోఫీ సిరీస్‌లో ఆడాడు. ఆ సిరీస్‌లో 5 మ్యాచ్‌లలో 9 వికెట్లు పడగొట్టాడు. గణాంకాల ప్రకారం.. ఇది మంచి ప్రదర్శనే అయినప్పటికీ.. షమీ ప్రతాపం ఆ సిరీస్‌లో కనిపించలేదు. ఇది సెలెక్టర్ల మనసులో షమీ ఫిట్‌నెస్‌పై నమ్మకాన్ని సడలించి ఉండవచ్చు.

2027 ప్రపంచ కప్ కోసం షమీని దాచిపెడుతున్నారా?
ఆసియా కప్ టోర్నీకే మహ్మద్ షమీ ఎంపిక కానప్పుడు.. ఇక వన్డే, టెస్ట్ మ్యాచ్‌లలో ఆయనకు అవకాశం లభిస్తుందా అనే ప్రశ్న తలెత్తుతోంది. ఆసియా కప్ షమీ తన ఫిట్‌నెస్‌ను నిరూపించుకోవడానికి సరైన అవకాశం అయ్యుండేది. కానీ, సెలెక్టర్లు వేరే విధంగా ఆలోచించారు. వెనుక బీసీసీఐ దీర్ఘకాలిక ప్రణాళిక ఉండవచ్చని ఒక వర్గం భావిస్తోంది. అంటే, 2027 ప్రపంచ కప్‌ను లక్ష్యంగా చేసుకుని, మహ్మద్ షమీని కేవలం వన్డే మ్యాచ్‌ల కోసం మాత్రమే 'కాపాడుకునే' వ్యూహంగా ఇది ఉండవచ్చు.

ప్రపంచ కప్‌ల రాజు
స్టార్ పేసర్ మహ్మద్ షమీ ప్రపంచ కప్ గణాంకాలు అతనికి బలాన్ని చేకూరుస్తాయి. ప్రపంచ కప్ మ్యాచ్‌లలో మహ్మద్ షమీ రికార్డు అద్భుతంగా ఉంటుంది. కేవలం 18 మ్యాచ్‌లలోనే 55 వికెట్లు పడగొట్టాడు. షమీ బౌలింగ్ సగటు 13, స్ట్రైక్ రేట్ 15.8 అనేది నమ్మశక్యం కానిది. అంటే, ప్రతి ప్రపంచ కప్ మ్యాచ్‌లో షమీ సగటున 3 వికెట్లు తీశాడు. మహ్మద్ షమీ పూర్తి ఫిట్‌నెస్‌తో ఉంటే, ప్రపంచ కప్ వంటి పెద్ద టోర్నమెంట్లలో ఒక ముఖ్యమైన ఫాస్ట్ బౌలర్‌గా ఉంటాడు.

భవిష్యత్తును నిర్ణయించే సిరీస్
మహ్మద్ షమీ భవిష్యత్తు గురించి అసలు పరిస్థితి, రాబోయే ఆస్ట్రేలియాతో వన్డే సిరీస్‌లో స్పష్టమవుతుంది. ఆ సిరీస్‌లో మహ్మద్ షమీకి అవకాశం ఇస్తే, అతను కచ్చితంగా 2027 ప్రపంచ కప్ ప్రణాళికల్లో ఉన్నాడని అర్థం. లేకపోతే, మరో అద్భుతమైన ఫాస్ట్ బౌలర్‌ను భారత జట్టు గాయాల కారణంగా కోల్పోయే ప్రమాదం ఉంది. ఏది ఏమైనా, 2027 వరకు షమీ వేగాన్ని చూడటానికి భారత అభిమానులు ఆసక్తిగా ఎదురుచూస్తున్నారు.